De Vorsterman Bijbel

§ Dat .iiij. Capittel.

1

⁺ICk betuyge voor god, ende den here Iesu Christo, welcke leuende ende doode oordelen sal, ende door zijn toecoemst ende rijc.

+ A

2

Preectet woort, hout aen, het si te tijde, of tontijde, straft, dreycht: vermaent met alle sachtmoedicheyt, ende leeringe,

3

want daer sal een tijt wesen: dat si goede leeringe niet verdraghen en sullen, maer nae haer begheerlicheden, sullen si haer seluen leeraers vergaderen,

4

die haer ooren kittelen, ende si sullen haer ooren vande waerheyt keeren, ende tot fabulen sullen si keeren.

5

Maer waect ghy in allen, volhert in tribulatien, voldoet twerck des Euangelistes, doet uwen dienst volcomelijcken, weest sober.

6

⁺Want ick worde nv gheoffert, ende die tijt mijnder ontlossinghe staet aen.

+ B

7

Ick hebbe een goede strijdt gestreden, ick heb den loop [kolom] voleynt, ick heb tgheloof gehouden.

8

Voortaen is mi op geleyt die croon des rechtueerdicheyts, welck my die heere gheuen sal, in dien dach: welc is een rechtueerdich rechter Ende niet alleen my, maer oock allen den ghenen die zijn toecomst lief hebben.

9

Weest neerstich dat ghy geringe tot mi coemt.

10

⁺Want Demas heeft my verlaten, ⁺ ende dye teghenwoordige werelt beminnende, is gereyst tot Tessaloniam, Crescens in Galaciam Tytus in Dalmaciam.

+ C

+ Colo. iiii.b

11

Lucas is met my alleen. Marcum genomen hebbende brengt met v, want hy is my seer profitelick totten dienst.

12

Voort: Tychicum heb ick tot Ephesum ghesonden.

13

Den mantel dye ick tot Troade ghelaten hebbe, by Carpum, als ghy comen sult brengtse, ende dye boecken, ende bysonder dye parchamenten.

14

Alexander die munteneere, heeft my veel quaets aenghedaen. Dye Heere verghefde hem na zijn wercken

15

welcken ghu ooc schouwet, want hi onse woorden seer wederstaen heeft.

16

⁺In mijn eerste bescherminge, en was niemant bi mi. Si hebben mi alle gader gelaten. En latet haer niet verweten worden.

+ D

17

+ Maer dye Heere heeft my by ghestaen ende ghesterct, om dat dye prekinghe door my veruult soude worden, ende dat alle heydenen hooren souden, ende ick ben verlost vanden mondt des leeus.

18

Dye Heere heeft my verlost van alle quade werck, ende onderhouden tot zijnen hemelschen rijcke, wien si glorie van eewicheyt tot eewicheyt. Amen. *

19

Groet Priscam ende Aquilam, ende Onesiphorus huysgesin.

20

Erastus is te Corinthen ghebleuen. Ende Trophimum heb ick gelaten in Mileto cranck.

21

Haest v voor den winter te comen. Eubulus groet v, ende Pudens, ende Linus, ende Claudia, ende alle die broeders.

22

Dye heere Iesus Christus si met uwen gheest. Gracie si met v. Amen.

Gheschreuen wt Romen, als Paulus weder gebrocht werde voer Nero den Keysere.