De Vorsterman Bijbel

§ Dat .v. Capittel.

1

⁺EN bekijft den ouden nyet, mer vermaent hem geliken als vader, den iongheren als broeders,

+ A

2

den ouden vrouwen als moeders, den ionghen als susters, met alle cuysheyt.

3

Eert die weduwen dat rechte weduwen

[p. M6r]

zijn.

4

Ist dat die weduwe kinderen oft neuen heeft, leeren eerst haer eyghen huys regeren, ende den ouderen weder des ghelijcs doen, want dat is ontfanckelick voor god.

5

Die warachtich weduwe is ende verlaten, die hope in God, ende bliue volherdich in bedinghen ende smeekinghen, nacht ende dach.

6

Maer die in wellusten is, is leuende doot.

7

Ende ghebiet haer dit, dat si onstraffelick zijn.

8

Ende ist datter yemant dye sine ende bisonder zijn huysgenooten niet en voorsiet, die heeftet gheloof versaect, ende is arger dan een ongheloouighe.

9

⁺Laet gheen weduwe wt kiesen min dan tsestich iaren: die eens mans wijf gheweest heeft,

+ B

10

die ghetuychnis heuet in goede wercken, ist dat si kinderen op geuoet heeft, ist dat si gheerne geherbercht heeft, ist dat si der heyligen voeten gewasschen heeft, ist dat si den verdructen ghedient heeft, ist dat si in alle goede wercken stadich geweest heeft.

11

Voort schouwet die ionghe weduwen, want als si weeldich worden in Christo, willen si houwen,

12

hebbende verdoemenis, want si die eerste trouwe gebroken hebben,

13

ende ooc ledich leeren si tsamen die huysen omme te ghaen. Ende niet alleen ledich, maer ooc clapachtich, ende curioes, sprekende dat niet en behoort.

14

⁺Aldus wil ic dat die ionghe houwen, kinderen voort brengen, moeders des huysgesins zijn, gheen oorsaeck den teghen partie gheuen, dat hi een sake soude hebben om te vermaledien,

+ C

15

wanter sommige omgekeert zijn nae den Sathanas.

16

Ist dat yemant geloouige weduwen heeft, besorgen haer, op dat de kercke niet belast en wort. Ende dat den ghenen die warachtich weduwen zijn, ghenoech mach zijn.

17

Die priesteren die wel regeren, dye laet dubbelde eerwaerdich gehouden worden. Aldermeest den ghenen die arbeyt int woort, ende leeringe.

18

Want die scriftuer seyt. ⁺ Den osse die dat koren wt treet en suldy den mont niet toe binden. Ende die wercker is zijn loon waert

+ Deut. xxv. i.Corin. ix Deute. xix

19

Tegen den priestere en laet niet toe eenige beschuldinge, dan onder twee oft drie ghetuygen.

20

Die daer sondighen: die straffet voor allen, op dat die ander oock vrees hebben.

21

⁺Ick betuyghe voor God ende den Heere Iesu Christo ende zijn wtuercoren engelen, dat ghy dit bewaert sonder lichtuaerdich ordeel, ⁺ niet doende wt toeneygentheyt des anderen deels.

+ D

+ Deu. xxix.

22

En legt niemant lichtelick de handen op, noch en weest niet ghemeen [kolom] den vremden sonden. Hout v seluen reyn,

23

en drinct voort aen gheen water, maer besicht weynich wijns om v maghe wille, ende dicwils crancheden.

24

Somiger menscen sonden zijn openbaer, voor comende tottet oordeel, ende den somigen volgen

25

Des gelijcs ooc die goede wercken zijn openbaer. Ende die haer anders hebben, die en moghen niet verborgen worden.