De Vorsterman Bijbel

§ Dat .iij. Capittel.

1

⁺UOort aen mijn broeders, verblijdt v inden Heere, dat selfde v te scriuen en verdriet mi niet, ende het is v van noode

+ A

2

Siet die honden, siet die quade werckers, siet dye besnijdinghe,

3

want wy zijn die besnidinghe dye welcke inden gheest God eeren ende glorieren in Christo Iesu, ende en betrouwen niet in dat vleesch.

4

Al is dat ic ooc betrouwe in dat vleesch Is dat yemant anders schijnt betrouwen te hebben int vleesche, ick hebt veel meer,

5

besneden zijnde opten achtsten dach, een Iode wt die afcoemst des gheslachts van Beniamin, een Hebreeusche wten Hebreen, na dye wet een Pharizee,

6

nae die neersticheyt veruolghende die kercke Gods, nae die rechtueerdicheyt die in die wet is, geconuerseert sonder clachte.

7

Maer wat mi ghewin was, dat hebbe [kolom] ick om Christus wil gerekent schade te wesen,

8

maer ooc reken ic alle dinc scade te wesen, om dye hoocheyt des kennis Christi Iesu mijns heeren, om wiens wille ick alle dinck voor schade hebbe gheacht, ende hebt voor dreck gehouden, op dat ick Christum mach winnen,

9

ende in hem geuonden worde niet hebbende mijn rechtueerdicheyt die wt die wet is, maer die, die wtet gheloof Christi Iesu is, welcke wt god is, een rechtueerdicheyt door tgeloof,

10

om hem te kennen ende die cracht zijns veerijsenis, ende die gemeenschap zijns lijdens, dat ick gelijc worde zijn doot,

11

⁺ofte ic oock in eenigher manieren mochte gemoeten die verrisenis die wt den dooden is.

+ C

12

Niet dat ick nv ontfanghen heb, oft vol maeckt ben, maer ick volch, op dat ick in eenigher manieren mach begrijpen gelijc als ic ooc begrepen ben van Christo Iesu.

13

Broeders, ic en meen niet dat ict noch begrepen heb, maer een dat achter rugge is, verghete ic, arbeydende na tghene dat voor mi is.

14

Nae dat teeken dat voor geset is volge ic, tot die prijs des operste roepinghe Gods, door Iesum Christum.

15

Aldus, wi die perfect zijn, laet ons dit gheuoelen.

Ende is dat ghy wat anders gheuoelt, dat sal v God openbaren.

16

Nochtans tghene dat wi vercregen hebben, laet ons van eenen sin zijn, ende bliuen in een regel.

17

+ Weest mijn nauolgers broeders, ende neemt huer waer die soe wandelen, ⁺ gelijc als ghi ons forme hebt,

+ D

18

Want veel wandelender, van welcken ic v dit geseit heb, ende nv al screyende v seg, vianden des cruys Christi.

19

Welckers eynde verdoemnis is, welcker God haer buyck is, ende welcker glorie in haer scaemte is, die aertsche dinghen smaken.

20

Want ons conuersacie is in den hemel, wt welcken wi oock ons verlosser verwachten, den Heere Iesum Christum,

21

Welc dlichaem onser ontmoedicheits vermaken sal, ghelijck ghefigureert den lichaem zijnder claerheyt, na der werckinghe zijnder macht, metter welcken hi ooc mach hem alle dinghen onderworpen. *