De Vorsterman Bijbel

[p. L1r]

[blanco]

[p. L1v]

[afbeelding]

§ Hier beghint die Epistel die Sinte Pauwels ghesonden heuet tot die van Galaten.

§ Dat .i. Capittel.

1

⁺PAulus, Apostel, niet vanden menschen, noch door een mensche, maer door Iesum Christum, ende God den Vader, die welcke hem verwect heeft vanden dooden,

+ A

2

ende alle broeders die met mi zijn. Den kercken tot Galacien.

3

Gracie si v, ende vrede, van God onsen vader, ende den Heere Iesu Christo,

4

die hem seluen gegeuen heeft voor onse sonden, op dat hi ons verlossen soude, van die teghenwoordige boose werelt, na den wille Gods ende ons vaders,

5

den welcken si glorie, inder eewicheyt, Amen.

6

⁺Ic verwonder mi, dat ghi also saen ouer ghebrocht zijt in een ander Euangelie van Christo, die v geroepen heeft in zijn gracie

+ B

7

dwelcke gheen ander en is, dan datter sommighe zijn die v verstooren, ende willen Deuangelie Christi verkeeren.

8

Maer al waert dat een Engel wt den hemel, v een Euangelie predicte, behaluen tghene, dat wy v ghepredict hebben, die si verbannen.

9

Ghelijcken als wi gheseyt hebben, seg ick weder, Ist dat v yemant, een Euangelie predict, behaluen tghene, dat ghy ontfangen [kolom] hebt, die si verbannen.

10

Ende seg ick dit voor den menschen, oft voor God? oft begheere ick den menschen te behagen? Want waert dat ick den menschen noch behaechde, soo en soude ick Christus knecht niet zijn.

11

⁺Maer broeders, ick doe v weten, dattet Euangelie van my ghepredict, nyet en is naden mensche,

+ C

12

want ick dat van gheenen mensche ontfangen, noch gheleert en heb, maer door die openbaringhe Iesu Christi

13

Want ghi hebt hier voortijts wel gehoort mijn conuersacie in die Ioetschap, dat ick bouen maten die kercke Gods veruolchde, ende beuochte haer,

14

ende ick ghinc voort in die Ioetschap bouen veel, van mijns gelijcke in mijn gheslachte, oueruloedigher een nauolgher wesende, der insettinghen mijnre voor vaderen.

15

⁺Maer, alst hem heeft behaecht, die welcke my van mijns moeders lichaem wt gescheyden heeft, ende door zijn gracie gheroepen heeft,

+ D

16

daer toe, dat hy sinen sone openbaren soude door mi, ende dat ick hem prediken soude onder die heydenen, ter stont heb ic my nyet ouer ghegheuen, den vleesche ende bloet,

17

noch ick en heb nyet weder om te Ierusalem ghecomen totten Apostolen, welcke voor my gheweest hadden. Maer ick hebbe geghaen in Arabien, Ende ben weder om gecomen in Damascum.

18

Daer na, na drie iaren, ben ick weder om te Ierusalem ghcomen, om Petrum te sien, ende ick ben by hem vijfthien daghen ghebleuen.

19

Ende van dander Apostolen en heb ic niemant ghesien, dan Iacobum den broeder des Heeren.

20

Ende dat ick v scrijf, siet, voor God, ick en lieghe niet.

21

Daer na, ben ick ghecomen in die landen van Syria, ende Cylicia:

22

Ende ick was onbekent van aensichte, den kercken in Iudea, dye in Christo waren,

23

maer si waren hoorende alleen, dat die ons hier voortijts veruolchde, die predict nv tgheloof, dwelc hy voortijts heeft veruolcht,

24

ende si glorificeerden God in mi.