De Vorsterman Bijbel

§ Dat .xiij. Capittel.

[kolom]

1

⁺SIet ten derdermael come ick tot v, inden mont van twee oft drie ghetuygen, sal alle woort staen.

+ A

2

Ick hebt te voren gheseyt: ende ick segghet te voren, ghelijc als ick tegenwoordich was, also schriue ick nv wech wesende, den ghenen die te voren gesondicht hebben, ende al den anderen, ist dat ick come anderwerf, ick en sal niet sparen,

3

oft suect ghy een experiencye des gheens, dye in my spreect Christus? de welcke nyet cranc en is onder v, maer in v machtich is.

4

Want al ist dat hy ghecruyst is gheweest wt crancheyt nochtans leeft hi wt die macht gods, want wij zijn cranc in hem, maer wi sullen met hem leuen, wt die cracht gods, onder v.

5

⁺Ondersuect v seluen, oft ghi int gheloof zijt beproeft v seluen, of en kent ghy v seluen nyet, dat Iesus Christus in v is? Ten waer, dat ghy verworpen waert.

+ B

6

Ic hope dat ghy bekennen sult, dat wi nyet verworpen en zijn

7

Ende wi bidden by god dat ghy niet quaets en doet, nyet op dat wi gepresen schijnen te wesen, maer op dat ghi doet dat goet is ⁺ Wi zijn ghelijck verworpen:

+ C

8

want wi en mogen nyet tegen die waerheyt mer voor die waerheyt.

9

Wy verbliden ons, want wy cranc zijn, ende ghy starck, daer en bouen begheeren wy v volmaectheyt.

10

Daer omme scriue ick dit van v wesende: op dat als ick tegenwoordich wesen sal, niet straf en si, na die macht die my die heer ghegeuen heeft tot stichtinghe, ⁺ ende nyet tot verderuinghe.

+ D

11

Voort aen broeders verblijt v, zijt volmaect: hebt vertroostinge, weest eendrachtich. weest in vreden, ende god des vreets, ende der liefden, sal met v wesen.

12

Groet malcanderen, in eenen heylighen cusse. Alle dye heyligen groeten v.

13

Die gracie des heeren Iesu Christi, ende die liefde gods, ende die ghemeenschap des heyligen gheests, si met v allen. Amen.

§ Dye tweede Epistel totten Corinthen was ghesonden van Philippis in Macedonien, door Tytum ende Lucam.