De Vorsterman Bijbel

§ Dat .x. Capittel.

1

⁺UOort, ick Paulus selue, bidde voor v, door die sachtmoedicheyt ende gematicheyt Christi, die na dat aenschijn onder v ootmoedich si, nochtans van v wesende, betrouwe ick in v.

+ A

2

Ende ick bid v, dat ick niet en derf tegenwoordich door die betrouwinge, van welcken ick gherekent worde, teghen die somige stout gheweest te zijn, die welcke meynen dat wy wandelen als naeden vleesche,

3

want inden vleesche wandelende nochtans en striden wi niet naden vleesche.

4

Want die wapenen van onse strijt en zijn nyet vleeschelick mer machtich god, tot een vernyelinge der wederspannigen, door welcke wy te niet doen dye raden

5

ende alle hoecheyt, die welcke verheuen wort tegen die kennisse gods, ende gheuangen nemende alle verstant in dien dienst Christi.

6

Ende bereyt hebbende wraech teghen alle ongehoorsaemheyt, als v gehoorsaemheyt veruult sal wesen.

7

Siet ghy tgene dat na den aenschijn is.

⁺ Ist dat yemant van hem seluen betrout dat hy Christo toebehoort, laet hem dat weder om rekenen wt hem seluen, dat gelikerwijs hi Christo toebehoort, wi also mede Christo [kolom] toebehoren.

+ B

8

Want al ist dat ick yet meer glorieer van onse macht, die welcke die heer ons ghegeuen heeft tot stichtinge, ende nyet tot v verderuinge, so en sal ic niet beschaemt worden,

9

op dat ick niet en schijn, als v te veruaren door brieuen.

10

Want die brieuen (seggen si) zijn wel swaer ende sterck, maer die tegenwoordicheyt des lichaems is cranck, ende dat woort is ongeacht.

11

Dye aldusdanich is, dye dencke, dat ghelijck als we zijn int woort van v wesende doer brieuen, also zijn wi oeck teghenwoordich int werck.

12

⁺Want wi en derren ons niet mede mengen oft geliken metten somigen, dye haer seluen prijsen. Maer wi ons seluen: in ons seluen metende, ende ons seluen ghelikende ons seluen

+ C

13

Wij en sullen nyet bouen maten glorieren: maer nae dye maet des reghels, door welcke god ons gedeylt heeft, met een mate oeck tot v comen.

14

⁺Want wi en hebben ons niet wt ghestelt: recht oft wi tot v toe niet en quamen, ⁺ want wij zijn tot v toe gecomen in dat Euangelie Christi,

+ D

+ Ephe. iiij. Apo. xxi.c

15

nyet bouen maten glorierende van eens anders arbeyt, hopende dattet geschien sal dat v ghelooue in v wassende wi groot ghemaect sullen worden nae onsen regel tot oueruloedicheyt,

16

op dat ick oeck dye landen dye voorby v zijn, dat Euangelie predicken mach. Niet door eens anders regel, gelijck als van tgheen dat bereyt is glorieren wi,

17

maer dye daer glorieert, laet hem inden heer glorieren,

18

want niet die hem seluen prijst, is ghepresen maer die den heer prijst.