De Vorsterman Bijbel

§ Dat .ix. Capittel.

1

⁺WAnt van die aendieninge die inden heiligen geschiet, isset niet van node dat ick v beschriue.

+ A

2

Want ick kenne dye bereytheyt ws moets, vanden welcken ick glorieer van v bi die van Macedonien, want oec Achaya bereyt is vant voorleden iaer: ende v exempel heefter veel verwect,

3

nochtans hebben wi die broeders tot v gesonden, op dat onse gloriacie, met welcken wi van v glorieren, niet te vergheefs en wort in dyt deel, op dat ghelickerwijs ic seyde, ghi bereyt zijt,

4

dattet niet en gebuert, dat oft die van Macedonien met mi quamen, ende v onbereyt vonden, wy beschaemt worden, op dat wy niet en segghen v in desen dinghen te beschamen.

5

⁺Aldus heb ic gemeynt dattet van node was die broeders te bidden, dat si eerst tot v gaen souden, ende bereiden uwe beloofde goede gauen, als een goede ghift, niet als in vrecheyt.

+ B

6

+ Dat segghe ick, dye spaerliken saeyt, die sal spaerlicken maeyen, ende die daer saeyt in benedictien, sal vander benidictien maeyen

[p. K7v]

7

Eenen yegelijc na dat opsedt des herten niet wt droefheyt, ofte wt bedwange. Want god heeft eenen blide gheuer lief.

8

⁺Ende God is machtich te doen, dat alle weldaet in v oueruloedich si, op dat ghy in allen dinghen van als ghenoech hebbende oueruloedich zijt, in alle goede wercken.

+ C

9

Alser ghescreuen staet. ⁺ Hy heeft verstroyt, ende heeft den armen ghegeuen, zijn rechtuaerdicheyt blijuet inder eewicheyt.

+ psal. c.xi.

10

Dye aendient tzaedt den zayer, dese sal oec broot tot spijse gheuen ende sal v saet vermenichfuldighen, ende die vruchten uwer rechtuerdicheyt vermeren. *

11

op dat ghi in allen dinghen rijck gemaect wesende, oueruloedich zijt in alder simpelheyt, die daer werct voor ons, dancbaerheyt tot god.

12

⁺Want die weldaet van desen dienst en veruult niet alleen dat ghene dat den heylighen ghebreck is, maer het is oock oueruloedich daer in, dat door veel god gedanct wort,

+ D

13

die welcke door prijsinge van desen dienst god glorificeren van die onderdanicheyt ws belijdincs int Euangelium Christi, ende van dye simpelheyt des ghemeenschaps in haer ende in allen,

14

ende in haer ghebet voor v, dye welcke nae v verlanghen, om die oueruloedige gracie gods in v.

15

Ick danc god van zijn onwtsprekelicke ghaue.