De Vorsterman Bijbel

§ Dat .xiiij. Capittel.

1

⁺UOlcht na die liefte, staet na gheestelike dinghen, meer dat ghi moecht propheteren.

+ A

2

Want die metten talen spreect, en spreect den mensche niet, maer god, want nyemant en hoortet, mer den geest spreect verborgen dingen.

3

Voort: die propheteert, spreket den mensche tot stichtinge, tot vermaninge, ende tot trooste.

4

Die met talen spreect, die sticht hem seluen, maer die propheteert, sticht die kercke gods.

5

Ic wil dat ghi alle met talen spreect, nochtans meer dat ghi propheteert Want meerder is die propheteert, dan dye met talen spreect, ten waer dat hijt beduyde op dat dye kercke daer af stichtinghe crijghen mocht.

6

Ende nv broeders: ist dat ick come tot v sprekende met talen, wat sal ic v baten, ten waer dat ic v sprake, oft door openbaringe, oft door wetentheyt, oft door prophecien, ofte door leeringe?

7

⁺Des gelijcs ooc, dingen die sonder siel zijn geluyt geuende: het si scalmey oft herpe, ten waer dat si onderscheyt int gheluyt gauen hoe soudmen mogen bekennen datmen metter [kolom] scalmey ofte met dye harpe speelt?

+ B

8

Want ist dat die blasuyne een onseker gheluyt geeft wie sal hem tot den stride bereiden?

9

Also ghi mede, ten waer dat ghy doer dye tale een woort dat wat beteykenende is, geeft, hoe salt verstaen moghen worden, datter gheseyt wert? want ghi sult in dye lucht wesen sprekende.

10

Also menigerley, te weten zijnder tongen in die werelt, ende nyet en isser sonder stem.

11

Aldus ist, dat ic niet en weet die cracht des stems, so sal ic vreemt zijn den ghenen die ic spreeck, ende die mi spreect, sal my vreemt zijn.

12

Aldus ghi ooc, naden mael dat ghi naerstighe nauolghers der gheesten zijt, soo soect stichtinge des kerckes, op dat ghi oueruloeyt.

13

Daer om die met talen spreect, die bidde dat hi mach beduyden.

14

⁺Want ist dat ic met talen bid, so bidt mijnen geest, mer mijn verstant is sonder vrucht.

+ C

15

Daer om wat ist dan? Ic sal bidden metten geest, ende ooc bidden metten verstant. Ic sal singen metten geest, mer ooc singen metten verstant.

16

Want ist dat ghi gebenedijt inden gheest wie sal veruullen die plaetse des ongeleerden? hoe sal hi segghen Amen, tot uwer benedijdingen, want hi en weet niet wat ghi segt.

17

Ghi danct wel te recht, maer dye ander en wert niet gestichticht.

18

Ic danc minen god, dat ick met uwer alre talen spreke.

19

Maer inder kercken wil ic lieuer vijf woorden spreken met mijn verstant, op dat ic ooc den anderen mach leeren, dan .x. duysent woorden metter talen.

20

Broeders, en wilt niet kinderen worden van sinnen, maer zijt kinderen van boosheyt, ende zijt volmaect inden sinnen.

21

⁺Inder wet is gescreuen. Ic sal dit volck spreken met anderen talen, ende met anderen lippen, ende noch en sullen si mi so niet hooren, seyt die heere. ⁺

+ D

+ Esa. 28.

22

Aldus so zijn die talen tot een teeken, niet den ghenen die gelouen, mer den ongelouigen, weder om die prophecien, nyet den ongelouigen, mer den gelouigen.

23

Daer om, waert dat die gheheele vergaderinge te samen quaem, ende al te samen met talen spraken, ⁺ ende daer in quamen ongeleerden oft ongelouigen, souden si niet seggen, wat raesdi?

+ E

24

Mer ist dat ghy alle propheteert, ende daer in coemt een ongelouige oft een ongeleerde, die wert van hem allen verwonnen, die wert van hem allen veroordeelt,

25

ende also worden die verborgentheden zijns herten geopenbaert, ende also vallende op zijn aensicht, sal hi god aenbidden, te kennen geuende, dat god warachtich in v is.

[p. K3v]

26

Daer om broeders, wat ist? So dicwils als ghi te samen coemt, een yeghelic van v heeft sange, hi heuet leeringe, hi heeft talen hi heeft openbaringhe, hi heeft beduydinghe, latet al geschien tot stichtinghe.

27

Ist datter yemant talen spreect, latet geschien door tween, ofte ten alre hoochsten door drien, ende dat by gheboorten, ende latet een beduyden.

28

Maer isser gheen beduyder, so laet hem swighen in dye kercke, ende laet hem seluen ende God spreken.

29

⁺Laetter twee oft drie propheten spreken ende laet die ander ordelen.

+ F

30

Mer ist datter een andere daer by sittende gheopenbaert wort, so laet die eerste swigen:

31

want ghi moecht alle die een naden anderen propheteren, op dat si al leeren moghen, ende alle vertroostinge ontfangen.

32

Ende die gheesten der propheten zijn den propheten onderdanich:

33

want god en is gheen god des tweedrachticheden, mer des vredes als ick in alle kercke der heylighen leere.

34

Die vrouwen onder die vergaderinghe laet swigen, wantet haer niet toegelaten is dat si mogen spreken, ⁺ maer dat si onderdanich sullen zijn, ⁺ als oock de wet seyt.

+ G

+ Gen. iij.c

35

Ende ist dat si wat leeren willen, laetse thuys haer mannen vraghen: want het staet den vrouwen qualick in die kercke te spreken.

36

Is dat woort gods van v wtgecomen, oft ist tot v allen gecomen?

37

Isser yemant dye een propheet, oft geestelic schijnt te zijn, die bekenne wat ic scriue, wantet zijn geboden des heren,

38

maer isser yemant niet wetende, die en sal niet geweten worden.

39

Daer om broeders, arbeyt om te propheteren, ende en verbiet nyet met talen te spreken,

40

laet alle dingen eerliken ende door ordinancie geschien onder v.