De Vorsterman Bijbel

§ Dat .xiij. Capittel.

1

⁺AL waert dat ick sprake met tongen der menschen ende der enghelen, maer die liefte niet en hebbe, so ben ic gheworden gelijck metael luydende, oft een cimbel clinckende.

+ A

2

Ende waert dat ic hadde alle prophecie, ende wist alle verborgentheden, ende alle wetentheden, ende waert dat ick alle gheloue hadde, alsoo dat ick berghen versettede, en heb ick die liefte niet, so en ben ic niet

[p. K3r]

3

Ende al waert dat ick tot spijsen der armen ghaue al mijn goet.

Ende waert dat ick ouerleuerde mijn lichaem, alsoo dat ick bernde, heb ick dye liefte niet, so en ist nyet profitelick.

4

⁺Die liefte is lijdsamich, si is vriendelick die liefte en benijdt nyet, dye liefte en doet niet verkeert, si en wert niet opgheblasen,

+ B

5

si en is niet eer gierich, si en soect niet dat hare is, si en wert nyet ghetercht, si en denct gheen quaet,

6

si en verblijdt haer nyet van boosheyt, maer si verblijdt haer met dye warachticheyt,

7

alle dinghen verdraecht si al ghelooft zijt, al hoopt zijt, al lijt zijt.

8

Die liefte en vergaet niet, al ist dat dye prophecien sullen verghaen, al ist dat dye talen sullen ophouden, al ist dat die wetentheyt sal vergaen.

9

Want eens deels bekennen wij, ende eens deels propheteren wi.

10

Mer alst coemt dat volmaect is, salt vergaen dat eens deels is.

11

Als ic een kint was, sprack ic als een kint, geuoelde ic als een kint, ⁺ dochte ic als een kint Maer na dat ic een man ben geworden, heb ic afgedaen dye kintsche dingen.

+ C

12

Wy sien nv door een spiegel in een schijnsel, maer dan aensicht aen aensicht. Nv beken icx eens deels, maer dan sal ick bekennen, als ic ooc bekent ben.

13

Maer nv blijft gheloue, hope, liefte, dese drie. Maer die alder meeste onder desen is die liefte.