De Vorsterman Bijbel

§ Dat .x. Capittel.

1

⁺BRoeders, die wil mijns herten, ende tgebet tot god, geschiet voor hem totter salichheyt,

+ A

2

want ick geue hem getuych, dat si die liefde Gods hebben, mer niet na der wetenscap:

3

want si niet wetende gods rechtuerdichheyt, ende soeckende haer eyghen rechtuerdicheyt op te rechten, en zijn der rechtuerdicheit gods niet onderdanich,

4

want dat eynde des wets is Christus, tot rechtuerdicheyt allen ghelouighen.

5

Want Moyses scrijft van die rechtuerdicheyt die wt de wet is, dat die mensche diese doet, sal daer door leuen.

6

Maer die rechtuaerdicheit die wten geloof coemt seyt also. En segt nyet in uwe herte, wie sal opclimmen inden hemel, dat is, Christum van bouen af te leyden.

7

Oft wie sal neder dalen int afgront? dat is, Christum vanden dooden weder te brenghen.

8

Maer wat seyt dye scriftuere? By is twoort in uwen mont, ende in uwer herten.

⁺ Dit is twoort des geloofs dat wi prediken

+ B

9

want ist dat ghi belijt met uwen mont den here Ihesum, ⁺ ende ghelooft in dine herte, dat God hem verwect heeft vanden dooden, so sult ghi salich zijn.

+ Esa. 28.b.

10

+ Want metter herten gelooftmen totter rechtuerdicheyt, maer met den mont gesciet belijdinge totter salicheyt:

11

want de scriftuere seyt. ⁺ Al die in hem gelooft, en sal niet bescaemt worden.

+ Ioe. ij.g.

12

⁺Want daer en is gheen onderscheyt des Iode oft Griecken, want hi is selue een heer van allen, rijck ouer al die hem aenroepen:

+ C

13

want wie den naem des heeren aenroept, sal salich zijn.

14

Mer hoe sullen si aenroepen den ghenen, in wien si niet gelooft en hebben? Oft hoe sullen si hem gelouen, den welcken si niet ghehoort en hebben? Oft hoe sullen si hooren sonder predicant?

15

Hoe sullen si prediken, ten waer dat si gesonden worden? geliker gescreuen staet. Hoe schoon zijn die voeten der gheenre die vrede vercondighen die vercondigende zijn goede dingen. ⁺

+ Esa. lij.a

16

Mer si en zijn niet al gehoorsaem den Euangelio: Want Esaias seyt. ⁺ Here wie heeft ghelooft onsen gehoor?

+ Esa. liij.a.

17

Daer om so ist geloof wten ghehoor ende tgehoor doort woort Christi.

18

Maer ic seg en hebben zijt niet ghehoort? Ia voorwaer,

[p. I4r]

haer geluyt is wt gegaen in alle aertrijc, ende haer woorden in dye eynden des omloops der aerden. ⁺

+ psal. xviij.

19

⁺Mer ic seg. En heeft Israel nyet bekent? Moyses seyt eerst. Ic sal v verwecken tot veruolghinge door een volc, dat gheen volck en is, door een dwaes volc sal ic v bewegen tot toornicheit: ⁺

+ D

+ Deu. 32.a.

20

want Esaias derf ende seyt. ⁺ Ick ben geuonden van die gheen die mi niet en sochten, ende ben openbaer geworden den ghenen die mi niet en vraechden.

+ Esa. 63.a. Esa. lxv.a

21

Mer tegens Israel seyt hi. Den geheelen dach heb ic mijn handen wtgerect totten volck, dat nyet gelouende is ende mi tegen seggende.