De Vorsterman Bijbel

§ Dat .viij. Capittel.

1

⁺So en isser nv gheen verdoemenisse den ghenen die in Christo Iesu zijn, den ghenen die niet na den vleesch wandelen,

+ A

2

want de wet van die geest des leuens, heeft my vrij ghemaect door Iesum Christum vander wet der sonden ende des doots:

3

want dat onmogelic der wet was, in welcke si cranck was door tvleysche, God zijn soon sendende onder dye gedaente des sondigen vleysch, van die sonde heeft hi verdoemt die sonde door tvleysch,

4

op dat dye rechtuaerdicheyt des wets veruult soude worden in ons, die niet na den vleesche wandelen, mer na den geest.

5

⁺Want die na den vleesch zijn, smaken dat gheen dattet vleesch toe behoort, maer die na den geest zijn, geuoelen dat gheen dat den gheest toe behoort.

+ B

6

Want dye wijsheyt des vleeschs is die doot, mer dye wijsheyt des geests, leuen ende vrede. *

7

Daer om dat dye wijsheyt des vleeschs een vyantscap is tegens god, want si en is den wet gods niet onderdanich, noch oock nyet en mach.

8

Die inden vleesche zijn, en moghen god niet behagen.

9

Mer ghi en zijt niet inden vleesch, mer inden geest, ist anders dat de gheest Gods in v woont. Isser yemant die Christus gheest niet en heeft, dese en hoort hem niet toe,

10

maer is Christus in v, so is dat lichaem doot, om der sonden wille, mer die geest leeft om dye rechtuerdicheyts wille.

11

Ist dat die gheest des gheens dye Iesum vander doot verwect heeft in v woont, soo sal dye selfde die Ihesum Christum verwect heeft vander doot, ooc v sterffelike lichaem leuendich maken, om zijns geest wille, die in v wonende is.

12

⁺+ Daer om broeders, soo zijn wij schuldenaers, niet den vleesch, op dat wi na den vleesche souden leuen.

+ C

13

Want, ist dat ghy sult leuen na den vleesche, so suldi steruen. Mer ist dat ghi door den geest dye wercken des vleesch doodet, soo sult ghi leuen.

14

Want al dye vanden gheest Gods ghedreuen worden, zijn kinderen Gods.

15

Ghy en hebt nyet ontfanghen den gheest des dienstachticheyt weder tot vreesen, maer ghi hebt ontfanghen den gheest der verkiesinghen der kinderen Gods, door welcken wij roepen Abba vader.

16

Dye selfde gheest gheeft ghetuyghe onsen gheest, dat wij Gods kinderen zijn.

17

Sijn wij kinderen, soo zijn wij oock erfghenaem Gods, ende mede erfgenaem van Christo. *

[p. I3r]

Nochtans liden wi mede, wi sullen mede geglorificeert werden.

18

⁺+ Want ic meyne dat liden van dese tijt niet gelijc te wesen die glorie die in ons geopenbaert sal worden.

+ D

19

Die verwachtinghe des creatuers, verwacht die openbaringe des kinderen gods.

20

Want die creatuer der ydelheyt onderworpen is, niet willens, maer om sinen wille, die haer onderworpen heuet in hoop.

21

Dye creatuer selue sal verlost worden vanden dienst der verganckelicheyt, in die vrijheyt der glorien der kinderen gods.

22

Want wij weten dat alle creatuere mede sucht, ende te samen met ons arbeyt tot deser tijt toe.

23

Maer niet alleen die, mer ooc wij selue, die de eerste vrucht des gheests hebben, wi selue suchten in ons seluen, de verkiesinge der kinderen gods verwachtende de verlossinge ons lichaems. *

24

+ Want wij zijn behouden door den hoop Hope dye gesien wert en is gheen hope, ⁺ want dat yemant siet, wat hoopt hy?

+ E

25

Mer ist dat wi hopen dat wi niet en sien, dat verwachten wij door verduldicheyt.

26

Des gelijcs ooc die geest helpt onse crancheden: want dat selfde dat wi bidden sullen, so dat behoorlick is en weten wi niet, maer dye gheest selue bidt voor ons met onsprekelike suchten.

27

Dye ghene dye de herten ondersoect, weet wat dye gheest begheert, want na god bidt hy voor den heylighen. *

28

⁺+ Wi weten dat den ghenen die god lief hebben, alle dingen haer tsamen behulpelick zijn int goet. Te weten, den ghenen die na dat opsedt geroepen zijn heylighen.

+ F

29

Want die hi te voren gheweten hadde, die selfde heeft hy ooc gheschict, ghelijc te worden den beelde zijns zoons, op dat hy mach zijn dye eerste geboren onder veel broederen,

30

die hi te voren gescict hadde, die selfde heeft hi ooc geroepen, ende die hi geroepen heeft, heeft hy ooc rechtuaerdich ghemaect, ende dye hi rechtuaerdich ghemaect heeft, die heeft hy oock groot gemaect.

31

Wat sullen wi dan hier toe seggen? is god voor ons, wie tegen ons?

32

Die welcke sinen eygen soon niet gespaert en heeft, maer voor ons allen heeft hem ouer gegeuen: hoe macht zijn, dat hi ooc niet met den seluen alle dinc ons gegeuen heeft?

33

Wie sal tegen die wtuercoren gods clachtich wesen? God is, die welcke rechtuaerdich maect,

34

wie is dye verdoemen sal? Christus Ihesus is dye gheen dye ghestoruen is, ymmer die oock verresen is [kolom] die ooc is totter rechter hant gods, welc ooc voor ons bidt.

35

⁺Wie sal ons dan scheyden van die liefde Christi? tribulacie? oft bangicheyt? oft veruolghinge? oft hongher? oft naectheyt? oft perikel? oft swaert?

+ G

36

gelijc alsser ghescreuen staet. Om v worden wij ouer geleuert totter doot alle den dach. Wi zijn gheacht als scapen, die ter slacht gheschict zijn.

37

Mer in allen desen verwinnen wi door den ghenen dye ons lief gehadt heeft,

38

want ick ben seker, dat noch doot noch leuen noch engelen noch heerscappie noch machten noch aenstaende noch toecomende dinghen, noch stercheyt,

39

noch hoocheyt, noch diepte, noch eenighe ander creatueren en sal ons moghen scheyden van die liefte Gods, welck is in Christo Ihesu onsen heer. *