De Vorsterman Bijbel

[p. G2v]

[kolom]

§ Hier nae volcht dat Euangelium van Sinte Ioannes.

[afbeelding]

§ Dat .i. Capittel.

[p. G3r]

1

⁺+ INt beghin was twoort, ende twoordt was by God, ende God was dat woort,

+ A

2

dit was int beghin bi god.

3

Alle dingen zijn door hem gemaect Ende sonder hem en isser nyet gemaect, datter ghemaect is.

4

In hem was tleuen. Ende tleuen was tlicht der menschen

5

ende tlicht schijnt in die duysternissen, ende die duysternissen en hebbent nyet begrepen.

6

Daer was een mensch gesonden van god wiens name was Ioannes.

7

Dese is ghecomen in een ghetuychnisse, om ghetuychnis te geuen van tlicht. ⁺

+ Mat. iij.a.

9

⁺Het was een warachtich licht, twelck verlichtet alle mensch, die daer inde werelt coemt.

+ B

10

Twas inde werelt, ende die werelt is door hem ghemaect, end dye werelt en heeft hem niet ghekent.

11

Hy is in zijn eyghen ghecomen, ende die sine en hebben hem nyet ontfanghen.

12

Ende also veel alsser hem ontfangen hebben, die heeft hy macht ghegeuen Gods kinderen te worden desen die in sinen naem gelouen,

13

die welcke nyet wt den bloede, noch wt den wille des vleesch, noch wt den wil des mans, maer wt god gheboren zijn.

14

Ende twoort is vleesch gheworden, ⁺ ende heeft in ons gewoont, ende wij hebben zijn glorie gesien, een glorie als van een eenigen geboren des vaders, vol van gracie ende warachticheyt. *

+ Mat. i.d Luce. iij.c.

15

⁺+ Ioannes ghetuyget van hem ende roept, segghende. Dit was hi, daer ic af seyde. Na mi sal comen die voor my gheweest heeft, want hi was eer dan ic.

+ C

16

Ende van zijn volheit hebben wij alle ontfangen gracie om gracie

17

Want die wet is door Moysen gegeuen. Die gracy ende waerheyt is door Iesum Christum gheschiet.

18

Nyemant en heeft oeyt God ghesien, den eenigen geboren soon, dye daer is in die schoodt des vaders, dye heuet vertelt.

19

Ende dat is dat getuychnis van Ioannes, als dye Ioden, priesteren ende leuiten gesonden hebben van Hierusalem tot hem, om hem te vraghen, wie zijt ghi?

20

Ende hy heeftet beleden ende niet versaect, ende hi heeft beleden. Ick en ben Christus niet.

21

Ende si hebben hem geuraecht: wat dan? Sijt ghi Helyas? Ende hi seyt. Ic en bent niet. Sijt ghi dye propheet? Ende hy heeft gheantwoordt. Neen.

22

Daerom hebben si hem gheseyt. Wie zijt ghi? ⁺ op dat wi antwoordt geuen moghen, den ghenen die ons gesonden hebben. Wat segt ghy van v seluen?

+ Luce. iij.c. Mat. iij.a

23

Hi heeft geseit. Ic ben een stemme die daer roept in die woestine, schict den [kolom] wech des heeren, als Esayas dye propheet geseyt heeft. ⁺

+ Esay. xl.a.

24

⁺Ende die ghesonden waren, dye waren wten pharizeen,

+ D

25

ende hebben hem geuraecht ende gheseyt. Waer om soo doopt ghy, en zijt ghy Christus niet? noch Helyas? noch propheet?

26

Ioannes heeft haer geantwoort, seggende. Ic doop int water, mer hy staet midden onder v, die ghy niet en kent,

27

dat is dye ghene die na mi comen sal, die voor mi geweest is, wiens ick nyet waerdich en ben te ontbinden den bant van zijn schoenen.

28

Dese dinghen zijn in Bethanien geschiet ouer die Iordaen, daer Ioannes doopte. *

29

+ Daechs daer an, siet Ioannes Iesum tot hem comende, ende heeft geseit. Siet dat lam Gods. Siet, dye de sonde der werelt wech nemet.

30

Dit is daer ick af seyde. Daer is een man nae mi ghecomen die voor my geweest is, want hi was eer dan ic,

31

ende ic en kenne hem nyet, maer op dat hy in Israel openbaer mach worden, ben ick ghecomen doopende int water.

32

⁺Ende Ioannes heeft ghetuyght, seggende. ⁺ Want ick heb ghesien den gheest in die ghedaente van een duyue, neder dalende vanden hemel, ende hi heeft op hem gebleuen

+ E

+ Mat. iij.d Mar. i.b Luce. iij.d.

33

ende ick en kende hem niet, maer die mi gesonden heeft om te doopen int water, die heuet my gheseyt. Op wien dat ghy den geest neder dalende sien sult, ende op hem blijuende, dat is die ghene die daer doopt met den heylighen gheest.

34

Ende ick hebt ghesien, ende hebt ghetuycht, dat dit die soon Gods is. *

35

Daechs daer nae stont Ioannes weder, ende twee van zijn discipulen,

36

ende siende Iesum wandelende, soo seyt hy. Siet dat lam Gods.

37

Ende twee discipulen hoordent hem segghen. Ende si zijn Iesum geuolcht.

38

⁺Ende Ihesus omgekeert zijnde, ende siende haer hem volghende, so seyt hy haer. Wat soect ghi? De welcke hebben gheseit, Rabbi, dat gheseyt is alst verduytst is meester. Waer woont ghi?

+ F

39

Hy seyt haer, Coemt, ende sietet Si zijn gecomen, ende hebben gesien waer hy bleef, ende zijn by hem gebleuen dien dach, ende het was by na thien vren.

40

Andreas die broeder van Symon Petrus wasser een vanden tween, die van Ioanne gehoort hadden ende hem gheuolcht waren.

41

Dese heeft Symonem sinen broeder ten eersten gheuonden, ende seyt hem. Wij hebben gheuonden Messiam, dwelck is te seggen Christus.

42

Ende hy heeft hem tot Ihesum

[p. G3v]

gheleit. Iesus hem aengesien hebbende, heeft geseyt. Ghi zijt Symon, soon van Iohanna Ghi sult genoemt worden Cephas, dwelck luydt als Petrus.

43

⁺Tsmorgens daer na heeft hi willen gaen in Galileen. Ende heeft Philippum gheuonden, ende seyt hem. Volcht my.

+ G

44

End Philippus was van Bethsaida, de stadt van Andreas ende Petrus.

45

Ende Philippus heeft geuonden Nathanael, ende seyt hem. Wi hebben gheuonden Iesum van Nazareth, Ioseps soon, vanden welcken Moses in die wet gescreuen heeft, ende die propheten.

46

Ende Nathanael heeft hem gheseyt. Van Nazareth mach wat goets comen? Philippus seyt hem Coemt ende sietet.

47

Ihesus heeft ghesien Nathanael comende tot hem, ende hy seyt van hem. Siet een warachtich Israhelijt, in welcken gheen bedroch en is.

48

Nathanael seyt hem. Waer kendi mi? Ihesus heeft gheantwoordt, ende heeft hem geseyt. Eer dat Philippus v riep, als ghy noch onder den vijchboom waert heb ick v ghesien.

49

Nathanael heeft hem geantwoort, ende seyt. Rabbi, ghi zijt die soon gods ghi zijt die coninck van Israel.

50

Ihesus heeft gheantwoort, ende hem gheseyt. Want ick v geseyt heb, dat ic v gesien heb onder den vijchboom, so gelooft ghi. Ghi sult meerder dingen dan dese sien, ende hi seyt hem.

51

Voorwaer voorwaer seg ic v, ghy sult sien den hemel geopent, ende die engelen gods opclimmende, ende afclimmende op die soon des menschen.