De Vorsterman Bijbel

§ Dat .xvi. Capittel.

1

⁺+ ENde hy seyde oeck tot sinen discipulen. Daer was een rijc man, die welcke hadde eenen rentmeester, ende dese is ghediffameert bi hem, als een die zijn goeden verquist hadde.

+ A

2

Ende hy heuet hem geroepen, ende sprack tot hem. Wat hoor ic doch dit van v? Geeft rekeninghe van v bediensticheit, want ghi en moecht nv voortaen niet meer regeeren.

3

Ende doen sprac dye rentmeester in hem seluen. Wat sal ick doen? want mijn Heere van my neemt dat officie? Ick en can niet grauen, ick schame mi te bidden.

4

Ick weet wat ic doen sal, op dat, wanneer ick verlaten ben vant officie, si my ontfanghen in haren huysen.

5

⁺Ende tsamen gheroepen hebbende, een yegheliken vanden sculdenaren zijns heeren, heeft hy geseyt den eersten. Hoe veel zijt ghy minen heer schuldich? Ende hi seyde. Hondert vaten olijs.

+ B

6

Ende hi heeft hem geseyt. Neemt v rekenboeck, ende sidt, ende scrijft gheringe vijftich

7

Daer nae seyde hy totten anderen. Hoe veel zijt ghy sculdich? Die welcke sprac hondert maten teruwe. Ende seyde dien. Neemt v brieuen, ende scrijft tachtentich.

8

Ende die Heere heuet gepresen den boosen rentmeester, ⁺ dat hy wijsselicken gedaen hadde. Want dye kinderen deses werelts zijn cloecker, ⁺ dan dye kinderen des lichts in haer gheslachte.

+ C

+ Mat. vi.c.

9

Ende ick segge v, maect v vrienden wt den schat des boosheyts, op dat wanneer ghy ghebrekich zijt, si v ontfanghen in dye eewighe tabernaculen.

10

+ Die daer is ghetrou int minste, is oec getrou int meeste. Ende dye onrechtuaerdich is int minste, dese is oec mede onrechtuaerdich int meeste.

11

Ist dat ghi niet geweest en zijt getrouwe inden onrechtuaerdigen mammon, dat waerachtich is, wie salt v gheloouen?

12

⁺Ende ist dat ghi niet ghetrou geweest en zijt in vreemde, ⁺ dwelcke v toebehoort, wie salt v geuen?

+ D

+ Mat. vi.c.

13

Gheen knecht en mach dienen twee heeren: [kolom] want oft hy sal den eenen haten, ende den anderen beminnen, oft den eenen aenhanghen ende den anderen versmaden. Ghi en moecht niet dienen god, ende den rijcdom.

14

Ende alle dese hebben gehoort die pharizeen, die welcke ghierich waren, ende bespotten hem.

15

Ende hy sprack tot haer. Ghi zijt die daer rechtuaerdich maect v seluen voor den menschen, mer god kent v herten, want dat ghene dat hooch is den menschen, dat is verworpen voor gode. *

16

⁺⁺ Die wet ende propheten zijn tot Ioannem toe van dien tijt af soe wort gecondicht dat rijcke gods, ende een yegelic doet gewelt teghen dat

+ E

+ Mat. v.b.

17

Maer tis lichter hmel ende aerde voorbi te gaen, dan een tittel des wets te vallen.

18

Soe wie zijn huysurouwe verlaet, ende een ander trouwet, die doet ouerspel. Ende so wie dye verlaten trout, doet ouerspel.

19

+ Daer was een rijc man, ⁺ de welcke gecleet wert met purper ende side, ende adt dagelics leckerlick.

+ Mat. x.a Mar. v.a. i.Cor. vi.b

20

Ende daer was een bedelaer ghenoemt Lazarus, die welcke lach voor zijn dore vol sweeren,

21

begerende versaet te worden vanden crumelen, die daer vielen van dye tafel des rijcken mans, ende nyemant en gaf hem. Maer die honden quamen ende licten zijn sweren.

22

Ende het is gheboert dat die bedelaer starf, ende worde ghebrocht vanden engelen in Abrahams schoot.

Ende die rijcke is oec gestoruen, ende is begrauen inder hellen.

23

Ende op slaende zijn ooghen doen hi was in tormenten sach hi Abraham van verde, ende Lazarum in zijnen schot,

24

ende hi roepende seyde. Vader Abraham: ontfermt mijnre, ende seynt Lazarum, op dat hy wil dat wterste zijns vingers steken int water, ende wil vercoelen mijn tonge, want ick ghepijnicht worde in dese vlamme.

25

Abraham heeft gheseyt. Soon weest ghedachtich, als dat ghy goeden ontfanghen hebt in v leuen, ende Lazarus des ghelijcs quaden, maer nv so wort dese vertroost, ende ghy wort ghepijnicht.

26

⁺Ende bouen alle dese, so is vast ghemaect een groot onderscheet tusschen ons ende v, als dat dye ghene die welcke willen van hier tot v gaen, en moghen nyet, noch van daer herwaerts comen.

+ F

27

Doen seyde hi. Hier om bid ic v vader dat ghi hem seynden wilt in mijns vaders huys.

28

Want ick hebbe vijf broeders, dat hy haer wil bekent maken, op dat si doch niet en comen in dese plaetse der pinen.

29

Abraham sprack tot hem. Si hebben Moysen ende die propheten, laetse dye hooren.

30

Ende die seyde. Neen vader Abraham, Maer in dyen yemandt

[p. F5v]

vanden dooden ghinge tot haer, si sullen penitencie doen.

31

Maer hy sprack tot hem. Ist dat si Mosen ende die propheten niet en horen, al waer dat yemant vanden dooden verrese, si en sullen oeck niet ghelouen. *