De Vorsterman Bijbel

§ Dat .xv. Capittel.

1

⁺+ ENde daer waren hem nakende publicanen ende sondaren, ⁺ om dat si hem souden hooren.

+ A

+ Mar. 2.c mat. xviij b

2

Ende die pharizeen ende scriben murmureerden, seggende. Dese ontfanct die sondaren ende eet met haer.

3

Maer hi sprac tot haer dese parabel, seggende.

4

Wie so isser van v een mensche, die daer heeft .C. scapen, ende ist dat hi daer een van dien verloren heeft, en laet hi niet die .xcix. inder woestinen, ende gaet tot dat welck verloren was, ter tijt toe dat hijt geuonden heeft

5

Ende als hi dat geuonden heeft, verblijdende hem, sedt hijt op zijn scouderen,

6

ende thuys comende, soo roept hy tsamen zijn vrienden ende ghebueren, segghende haer. Verblijdt v met mi, want ick mijn scaep gheuonden hebbe, dwelck verloren was.

7

⁺Ic segghe v, dat alsoo groote blijscap wesen sal inden hemel van een sondaer penitencie doende, meer dan van .xcix. rechtuaerdighe, die gheen penitencie en behoeuen.

+ B

8

Oft so wat vrouwe isser, hebbende .x. penninghen, ist dat si eenen penninc verloren heeft, en ontsteectse nyet een kaersse, ende vaechtet huys, ende soect naerstelic, ter tijt toe datse hem gheuonden heeft?

9

Ende als si hem geuonden heeft, soo roeptse tsamen haer vriendinnen ende ghebuerinnen, segghende. ⁺ Verblijdt v met my wandt ick gheuonden heb den penninck, welcke ick verloren had

+ C

10

Ick seg v, dat alsulcke blijschap wesen sal voor den enghelen gods, van eenen sondaer penitencie doende. *

11

+ Ende hi seyde. Een man heeft gehadt twee [kolom] sonen,

12

ende die ioncste van dien sprack tot sinen vader. Vader, gheeft my dat deel des goets, dwelck mi toebehoort. Ende hi heeft haer tgoet gedeelt.

13

Ende na niet veel dagen, als dye ionghe soon alle zijn goeden tsamen vergadert hadde, is hi ghereyst pelgrimagie in verre landen, ende aldaer heeft hi door gebracht zijn goet, leuende oncuysschelick.

14

Ende na dat hi alle tsine door ghebracht hadde, isser geworden eenen grooten dieren tijt in dien landen. Ende hi begonde gebreck te lijden,

15

ende is gegaen, ende heeft hem geuoecht bi een vanden burgeren dies lants. Ende die heuet hem gesonden in zijn bouwerije, als dat hy die vercken hoeden soude.

16

Ende hi begeerde sinen buyck te vullen vanden draf, metten welcken die vercken geuoedt worden, ende nyemant en gaft hem.

17

In hem seluen gekeert wesende, seyde. Hoe veel huerlinghen int huys mijns vaders oueruloeyen van broot, ⁺ ende ick vergae hier van honger.

+ D

18

Ic sal opstaen, ende gaen tot minen vader, ende sal hem seggen. Vader, ic heb gesondicht inden hemel ende voor v,

19

ick en ben niet waerdich te heeten v soon, maer maect mi een van uwen huerlingen.

20

Ende opstaende is gecomen tot sinen vader. Ende doen hi noch veer van daer was, heeft hem zijn vader gesien, ende is bewegen geweest met barmherticheyt, ende tot hem loopende, is geuallen hem om den hals, ende heeft hem gecust.

21

Ende zijn soon heeft gesproken tot hem. ⁺ Vader ic heb gesondicht inden hemel ende voor v: ende ic en ben voort meer niet waerdich te heeten v soon.

+ E

22

Die vader heuet gheseyt tot sinen dienaers. Haelt geringe voort dat eerste cleedt, ende doetet hem aen, ende geeft den rinck aen zijn handt, ende schoenen aen zijn voeten.

23

Ende brengt hier dat gemeste calf, ende slatet: laet ons eten ende goede cyer maken,

24

want dese mijn soon was doot, ende is weder om leuendich geworden, hy was verloren, ende is weder gheuonden. Ende si begonsten vrolic te zijn.

25

Die oudtste soon was noch int velt, ende als hi quam ende genaket was den huyse, heuet hy gehoort een ghesanck ende danspel,

26

ende heeft geroepen een van sinen dienaers ende heeft gheuraecht wat dinghen dye waren.

27

Ende die heeft hem gheseit. V broeder is gecomen, ende v vader heeft geslaghen dat gemeste calf, om dat hi hem gesont weder ontfangen heeft.

28

Doe is hy veronwaerdicht gheworden, ende en woude niet ingaen Daer om is zijn vader wtgegaen, ende badt hem

29

Ende hi antwoordende, sprack tot sinen vader.

[p. F5r]

⁺ Siet, aldus veel iaren diene ic v, ende en hebbe noit ouergetreden v gebot, ende ghi en hebt my noeyt ghegeuen een bock, dat ick soude vrolick wesen met mijnen vrienden.

+ F

30

Maer nae dat dese v soon, die welck zijn goet doer gheslaghen heeft metten hoeren, ghecomen is, hebt ghy gheslagen dat ghemeste calf.

31

Ende hy seyde hem. Soon ghi zijt altijt met my, ende al dat mijn is, dat is v.

32

Maer het was van node vrolick ende blide te wesen, want dese v broeder was doot gheweest, ende is weder om leuendich gheworden, ende was verloren, ende is weder gheuonden *