De Vorsterman Bijbel

§ Dat .iiij. Capittel.

1

⁺IEsus vol vanden heyligen gheest, is weder geghaen vander Iordanen, ⁺ ende is ghebrocht van den gheest inder woestinen,

+ A

+ Mat. iiij a Marc. i.b.

2

veertich daghen. Ende hi wert getempteert vanden Duyuel, ende en heeft niet gegheten in dien daghen, Ende veruult wesende die daghen, heeft hem gehonghert.

3

Doen sprack die Duyuele tot hem, Ist dat ghi zijt die sone Godts, segt desen steen, dat hi broot worde.

4

Ende Iesus heeft hem gheantwoordt, Het is gheschreuen,

[p. E4v]

Die mensche en leeft niet alleen inden broode, ⁺ maer in alle Gods woort.

+ Deut. viij.

5

Ende die Duyuel heeft hem gheleyt van daer, op eenen hoogen berch, ende heeft hem ghetoont in een cortte tijt, alle die rijcken des omghancs vander aerden,

6

Ende die Duyuel seyde tot hem, Ick sal v gheuen dese gheheele macht, ende haer glorie, want si mi ghegheuen zijn, ende ick gheefse dien ick wil.

7

Daerom in dien ghi op v knien vallende voor mi, mi aenbedet, alle dese sullen v wesen.

8

Iesus antwoordende, heeft hem geseyt, ⁺ Daer is ghescreuen, Ghi sult aenbeden uwen Heer uwen Godt, ende hem alleen dienen.

+ Deut. vi.a ende .x.d

9

Ende hi leyde hem tot Ierusalem, ⁺ ende heeft hem geset opter tinnen des tempels ende seyde tot hem, Ist dat ghi zijt die sone Gods, worpt v seluen nederwaert,

+ B

10

want daer is ghescreuen, ⁺ Dat hi geboden heeft van sinen enghelen, als dat si v bewaren sullen,

+ Psal. xc.c.

11

ende sullen v nemen in haer handen, op dat ghi niet quetsen en sout uwen voet aen den steen.

12

Ende Iesus antwoordende, seit hem, Daer is gesproken, ⁺ Ghi en sult niet tempteren uwen Heere uwen God.

+ Deut. vi.c.

13

Ende alle temptacien gheeyndt wesende, is die Duyuel gescheyden van hem een wijl tijts.

14

⁺Ende Iesus door die cracht des gheests, is wederom geghaen in Galileen, ende die faem van hem is wtgegaen door alle dat lant,

+ C

15

Ende leerde in haer Synagogen, ende wort gheeert van allen menschen.

16

Ende hi quam te Nazareth, ⁺ daer hi gheuoedt was, ende ghinc na zijnder gewoonten in die Synagoge, opten Sabboth dach, Ende stont op, om dat hi lesen soude.

+ Mat. iiij.d

17

Ende hem is ghegheuen tboec des propheets Esaye. Ende als hi tboec op gesleghen hadde, heeft hi gheuonden die plaetse, daer gescreuen was,

18

⁺ Die gheest des Heeren is op mi, daerom, dat hi mi gesalft heeft,, ende ghesonden mi, om te prediken, den armen, ende te genesen, die bedructe herten,

+ esaie. lxi.a

19

te kondighen die geuangen, verlossinge, ende den blinden gesicht, wt te laten die ghequetste, door verlossinge, te condigen dat ontfanckelike iaer des Heeren, ende den dach des vergeldinge.

20

Ende na dien hi tboec gesloten hadde, heeft hijt weder gegeuen den dienaere, ⁺ ende sadt neder. Ende die oogen van allen inder Synagogen, waren geuesticht op hem,

+ D

21

Ende begonste te segghen tot haer, Heden is dese scriftuer veruult in uwen ooren.

22

Ende alle gader gauense getuygenisse van hem, ende ver-[kolom]wonderden hen, van die aengenaemheyt zijnre woorden, ⁺ die daer wtgingen wt sinen monde, ende spraken, Is dit niet Iosephs sone.

+ Ioan. iiij.f ende .vi.c. mat. xiij.g

23

Ende hi seyde tot hen, Sonder twifel sult ghi tot mi seggen, dit gemeen woort, Medecijn gheneest vseluen.

+ Alle die dingen die wi gehoort hebben dat geschiet zijn in Capharnaum, doet ooc hier in v lant.

24

Iesus sprac, Ic segge v voorwaer, Gheen propheet, en is aengenaem in zijn eyghen lant.

25

⁺Maer inder waerheyt segge ic v, Vele weduwen waren in Israel inden daghe Helie, ⁺ wanneer gesloten was den hemel, drie iaren ende ses maenden, ende daer is gheworden grooten dieren tijt door tgeheele lant,

+ E

+ iij.re. xvij b

26

ende tot gheen van haer en is Helias gesonden, ⁺ dan tot een vrou weduwe in Sareptam, van Sydonien.

+ iiij.re. v.b.

27

Ende vele melaetsche waren in Israel, onder den propheet Helizeo, ende niemant van hen is ghesuyuert, dan Naaman, Syrus.

28

Ende alle die inder Synagogen waren, dese woorden hoorende, zijn veruult met toornicheyt,

29

ende zijn tegens hem opgestaen, ende hebben hem wt der stat geworpen, ende geleyt tot opt hoochste des berchs, opten welcken haer stat getimmert was, om dat si hem souden van bouen af stooten.

30

Maer hi doorghaende, ghinck door tmiddel van haer. *

31

Ende hi ghinc neder tot Capharnaum, een stadt van Galileen, ende daer leerde hi haer inden Sabboth.

32

Ende si verwonderden hen, van zijnder leeringhe, want zijn sermoen was in machten.

33

⁺Ende in haer Synagooch was een man, hebbende eenen onsuyueren Duyuel, ⁺ ende riep met luyder stemmen,

+ F

+ Mat. vij d Marc. i.c.

34

seggende, Laet wesen Iesu Nazarene, wat is ons met v? Sijt ghi gecomen, om ons te verderuen? Ick ken, ghi zijt die heylich Gods.

35

Ende Iesus heeft hem gestraft, seggende, Swijcht ende gaet wt van hem. Ende als die Duyuel hem geworpen had int middel, is hi wtgeghaen van hem, ende en is hem niet scadelic geweest.

36

Ende daer is geworden een vreese ouer hen allen, ende spraken met malcanderen onder hen luyden, segghende, Wat is dit woort? Want met macht ende cracht gebiet hi den onsuyueren gheesten, ende si ghaen wt.

37

Ende die fame van hem, wort verbreyt, in allen plaetsen des lantschaps.

38

⁺+ Ende Iesus opstaende vander Synagoghen, is ghegaen in Symons huys, ⁺ want Symons huysurouwen moeder was beuan-

+ G

+ mat. viij.c Marc. i.c

[p. E5r]

gen met een groote corts, ende si hebben hem ghebeden voor haer.

39

Ende staende bi haer, heeft geboden die corts, ende die corts heeft haer ghelaten, ende opstaende ter stont, so diendese haer.

40

Ende na dat die Sonne ondergegaen was Alle die ghene die siecken hadden van menigerley ghebreken, ⁺ leyden die tot hem. Ende hi leggende zijn hant op een yeghelic, maectese gesont. ⁺

+ Marc. i.d.

+ Mar. iij.b mat. viij.d

41

Ende die Duyuelen gingen wt van veel menschen, roepende, ende seggende, Want ghi zijt die sone Goods. Ende straffende, en heeft haer niet ghehenct te spreken, want si kenden hem Christum te wesen.

42

Ende alst dach geworden was, is hi wtgegaen in die woeste plaetse, ende die scharen sochten hem, ende quamen daer tot hem, ende hielden hem, dat hi van haer niet scheyden en soude,

43

den welcken hi toesprac, Ic moet mede ooc anderen steden condigen dat rijc Gods. * want daerom ben ic ghesonden.

44

Ende hi predicte in die Synagogen, van Galileen.