De Vorsterman Bijbel

§ Dat .xvi. Capittel.

1

⁺+ ENde als den sabboth voorbi ghegaen was hebben Maria magdalena, ⁺ ende Maria Iacobi, ende Salome cruyden ghecocht, op dat si comen souden, ende saluen Ihesum.

+ A

+ mat. xviij Ioan. xix.a Lu. xxiiij.b

2

Ende seer vroech, den eersten

[p. E1v]

dach des sabboths, so comen si tot den graue, als die sonne op ghegaen was,

3

ende seyden tot malcanderen. Wie sal ons den steen vande dore des graefs rollen?

4

Ende toe siende sagen si den steen afgherolt, want hy was seer groot.

5

Ende int graf ghegaen zijnde, hebben ghesien eenen ionghelinck, aen die rechter side sittende, met een langhe wit blinckende cleet ghecleet zijnde, ende zijn veruaert gheworden.

6

Ende hy sprack tot haer. En vreest niet. Ghi soect Iesum van Nazareth, die gecruyst is. Hi is op gestaen hi en is hier niet. Siet die plaets, daer si hem gheleyt hadden.

7

Maer gaet henen, segt zijn discipulen, ende Petro, dat hy sal v voorgaen in Galileen, daer sult ghy hem sien, als hi v gheseyt heeft *

8

Ende wech ghaende, zijn si haestelijck vanden graue gheuloen, want vreese ende verscrictheyt hadde haer beuanghen, ende si en seyden niemant yet, want si vreesden

9

⁺+ Ende Iesus smorghens opstaende den eersten dach des Saboths heeft eerst gheopenbaert Marie magdalene, vander welcker hi seuen Duyuelen wt gheworpen had

+ B

10

Sy wech ghegaen zijnde, heeftet ghebootschapt den ghenen die met hem gheweest hadden, die daer waren huylende, ende screyende.

11

Ende als si ghehoort hadden, dat hi leefde, ende van haer ghesien was, so hebben zijt niet ghelooft.

12

Ende nae dese, alsser twee van haer wandelden nae dat dorp, in een ander ghedaente is hi hem vertoont, ghaende.

13

Ende si zijn wech ghegaen, ende hebbent dye ander ghebootschapt. * Ende die en hebben dese oock niet ghelooft.

14

⁺+ Ten laetsten, als die elf aen de tafel saten, so heeft hi gheopenbaert, ende heeft haer verweten haer ongelooue, ende hertheyt des herten, om dat si niet ghelooft en hadden de ghene, die hem ghesien hadden opuerresen.

+ C

15

Ende hy seyde haer. Gaet in alle die werelt, ende predict dat Euangelie allen creatueren,

16

die gheloouen sal, ende ghedoopt sal worden, sal behouden werden. Maer die niet gheloouen en sal, die sal verdoemt werden.

17

Voort, die ghene die gheloouen sullen dien sullen dese teekenen na volgen. Door minen naem sullen si die duyuelen wt werpen, si sullen met nieuwe tonghen spreken

18

die serpenten sullen si verdriuen. Ende ist dat si yet dootlicx drincken sullen, ten sal hen niet schaden. Si sullen haer handen op die siec-[kolom]ke legghen, ende sullen wel te pas wesen

19

Ende aldus, na dat die heere haer ghesproken hadde, so is hi op genomen inden hemel ende sidt aen die rechter hant Gods.

20

Ende die wt ghegaen zijnde, hebben allesins ghepredict, den Heere mede werckende, ende dye sermoenen sterckende met nauolghende teekenen.

§ Hier is voleynt dat Euangelie dwelc ons bescreuen heeft die Euangelist Sinte Marcus.