Logo DBNL
De Vorsterman Bijbel (ca. 1528-1531)

De Vorsterman Bijbel

(ca. 1528-1531)–Anoniem Vorsterman Bijbel–rechtenstatus Auteursrechtvrij

Vorige Volgende

§ Dat .xiiij. Capittel.

1

++ ENde twas paesschen, ende die daghen des hoochtijts azimorum na twee dagen. Ende die opperste priesters ende scriben sochten, + hoe dat si hem met bedroch vangen ende dooden souden.

2

Ende seyden. Niet op den feestdach, op datter gheen oploop en geschiede onder tvolck.

3

Ende als hy te Bethanien was in Symon leprosen huys. Ende als hy aen dye tafel geseten was, so isser een vrou ghecomen, hebbende een busch costelijcke nardus salue. Ende als dye bussche ghebroken was, so heeft sise hem gegoten op thooft

4

Ende daer waren sommighe dye haer veronwaerdichden by hem seluen ende seyden Waer toe is dit verlies des salfs ghedaen?

5

want dese hadde vercocht moghen worden meer dan om drie hondert penninghen, ende den armen ghegeuen te worden. Ende si grimden teghen haer.

6

Ende Iesus heeft gheseyt. Latet haer toe: waer om zijt ghi haer moeylick? si heeft een goet werck in my ghewrocht.

7

Want die arme hebt ghy altijt met v, ende wanneer dat ghi wilt, muecht ghy haer wel doen, maer my

en suldi altijt nyet hebben.

8

Dese heeft ghedaen dat si ghemogen heeft. Si heeft voor genomen om mijn lichaem te saluen in die begrauinghe.

9

+Voorwaer seg ic v. So waer dit Euangelie gepredict sal worden in die heele werelt, sal ooc dat dese gedaen heeft, vertelt worden in haer gehoochnis.

10

Ende Iudas scarioth een vanden twaeleuen is totten oppersten priesteren ghegaen, + om hem haer te leueren.

11

Als si dat gehoort hadden, zijn si verblijt geweest ende hebben hem belooft ghelt te gheuen. Ende hi socht hoe dat hy hem bequamelic leueren soude.

12

Ende op den eersten dach des hoochtijts azimorum als si tpaeschlam offerden, so seggen hem zijn discipulen. Waer wilt ghy dat wi gaen ende bereiden, dat ghi tpaeschlam sult eten?

13

Ende hi sende wt twee van zijn discipulen ende seyt haer. Gaet inde stadt, ende v sal te ghemoet comen een mensche dragende een cruyc waters, volcht hem,

14

ende waer dat hy ingaen sal, segget den heer des huys. Dye meester seyt, waer is mijn plaetse daer ic tpaeschlam met mijn discipulen ete?

15

Ende hy sal v thoonen een groote sael bereyt, bereyt ons daer

16

Ende zijn discipulen zijn wtgegaen, ende in die stadt gecomen, ende hebbent geuonden gelijck als hy haer geseyt hadde, ende hebben tpaeschlam bereyt.

17

+Ende alst nv auont was: is hy metten twaeleuen gecomen.

18

Ende als si saten ende aten, so heeft Iesus geseyt. Voorwaer seg ick v, een van v sal mi verraden, die met mi eet.

19

Ende si hebben beginnen droeuich te wesen, ende elc bisonder tot hem te seggen. Ben ict?

20

Ende hi antwoordende, heeft haer geseyt. Een van den twaeluen, dye met my die handt steect in dye scotel.

21

Ende die soen des menschen gaet: ghelijc van hem ghescreuen is. Maer wee den mensche, door welcken die soon des menschen verraden woort. Het waer hem goet, waert dat dye mensche nyet gheboren en had gheweest.

22

Ende als si aten: heeft Iesus tbroot ghenomen, + ende gebenediende, heeft dat gebroken, ende haer gegeuen ende geseyt. Neemt, dat is mijn lichaem.

23

Ende als hy den kelc ghenomen had, ende gedanct hadde, so heeft hy dien haer gegeuen, ende si hebben alle gader daer wt gedroncken,

24

ende hi heeft haer gheseyt. Dit is mijn bloet des nieuwen testaments, welck voor veel wt gestort sal worden.

25

Voorwaer seg ic v. Ick en sal hier na van die vrucht des wijngaerts niet drincken, tot die dach toe, als ick dat nieu drincken sal int rijck Gods. [kolom]

26

Ende als si lof gheseyt hadden, zijn si inden oliuen berch ghegaen

27

Ende Iesus seyt haer Alle gader sult ghi gescandalizeert worden om minen wil in desen nacht. Want daer staet gescreuen. + Ick sal den herder slaen, ende die scapen sullen verstroyt worden,

28

mer na dat ic op staen sal, sal ic v voorgaen in Galileen.

29

Ende Petrus seyde hem. Al waert ooc dat si alle gader gescandalizeert worden. Ic en sal niet gescandalizeert worden.

30

Ende Iesus seyt hem. Voorwaer seg ic v, dat heden in dese nacht, eer de haen tweemael crayen sal, sult ghy mi driemael versaken.

31

Ende hy seyde noch meer. Ia al waert sake dat ic met v steruen moest, so en sal ick v nyet versaken. Ende also seiden si ooc alle gader.

32

+Ende si comen in een dorp, welcs naem is Gethsemani, + ende hi seyt zijn discipulen. Sidt hier, tot dat ic bidden sal.

33

Ende hi heeft genomen Petrum ende Iacobum ende Ioannem met hem Ende hi heeft beginnen te vreesen, ende beanxt te worden.

34

Ende hy seyt haer. Mijn siel is droeuich ter doot toe, verbeyt hier, ende waect.

35

Ende een cleyn weynich voort gegaen zijnde, is hi neder gheuallen in die aerde, ende badt, op dat, oft moegelick ware, dye vre van hem gaen soude.

36

Ende hi seyde. Abba vader, alle dingen, zijn v mogelijcken. Neemt desen kelc van mi Nochtans niet wat ick wil, mer wat ghi.

37

Ende hi is gecomen ende heeft haer slapende geuonden. Ende hi seyt Petro. Symon slaept ghi? mocht ghy niet een vre met my waken? +

38

Waect ende bidt, op dat ghi nyet en coemt in becoringhe. Die gheest is bereyt, mer tvleesch is cranck.

39

Ende weder om wech gaende, heeft hi gebeden seggende die selue woorden.

40

Ende weder gecomen zijnde, heeft hy haer weder slapende geuonden. Want haer ooghen waren beswaert. Ende si en wisten nyet, wat si hem souden antwoorden.

41

Ende hi is ten derden mael ghecomen, ende seyt haer. + Slaept nv, ende rustet. Het is ghenoech. Die vre is ghecomen. Siet die sone des menschen sal geleuert worden, inde handen der sondaren.

42

Staet op, laet ons gaen. Siet die my verraden sal is by.

43

Ende ter stont als hy noch sprack, soe coemt Iudas een vanden twaleuen, ende een groote schare met hem, met swaerden ende stocken gesonden vanden oppersten priesteren, ende scriben ende ouders.

44

Die verrader hadde haer een teeken gegeuen seggende. Soe wien dat ick cussen sal, dye ist, vanget hem ende leyt hem behendelijc wech.

45

Ende als hy ghecomen was, + ter stont coemt hi tot hem ende seyt hem: weest gegruet Rabbi, ende hy heeft

hem gecust.

46

Ende si hebben haer handen in hem gheslegen, ende hebben hem gheuangen.

47

Ende een van dien dye daer om stonden het sweert wt treckende, heeft des oppersten priesters knecht gheslegen, ende hem zijn oore af ghehouwen.

48

Ende Iesus antwoordende, heeft haer gheseyt. Ghy zijn wtgegaen met sweerden ende stocken, als tot een moordenaer om my te vanghen.

49

Ick was dagelics by v inden tempel leerende, ende ghy en hebt my nyet gheuangen. Maer op dat die scriften moghen veruult worden.

50

Doen, die discipulen hem latende, zijn alle gheuloeden.

51

Een ionghelinck met linden ghecleet, op zijn naecte volchde hem, ende si vinghen hem.

52

Ende hy dat linden cleedt af werpende, is naect van haer gheuloden.

53

+Ende si hebben Ihesum totten oppersten priester gheleyt. Ende daer quamen te samen alle dye priesters ende ouders, + ende scriben.

54

Petrus volchde hem van verre: tot in dye sael des oppersten priesters, ende hy was sittende met die dienaers by tvier, ende warmde.

55

Die ouerste priesters, ende den gheheelen raet, sochter getuychnis teghen Iesum, om hem ter doot te leueren, ende en vonden gheen.

56

Want veel hadden valsche getuychenis tegen hem gheseyt, ende daer en waren gheen getuychnissen bequaem genoech.

57

Ende sommige stonden daer op, ende seyden valsche getuychnis teghen hem seghende.

58

Wy hebben hem hooren seggen. Ick sal desen tempel dye met handen ghemaect is breken, ende een ander sonder handen gemaect op timmeren in drie daghen.

59

Ende ten was nyet ghenoech haer ghetuych.

60

Ende die opperste priester in midden opstaende, + vraechde Iesum segghende. En antwoort ghy niet op tghene dat dese teghen v getuygen:

61

Hy sweech, ende en antwoorde niet Weder om heeft hem die opperste priester geuraecht, ende seyde hem, Sijt ghi Christus dye soon gods des ghebenediden?

62

Ende Iesus heeft gheseyt, Ick bent, ende ghy sult den soon des menschen sien, sittende aen die rechter hand des crachts gods, ende comende in dye wolcken des hemels.

63

Ende die opperste priester schuerende zijn clederen, heeft gheseyt. Wat behoeuen wij meer ghetuyghen?

64

Ghy hebt blasphemie gehoort. Wat dunct v? Ende si hebben hem alle gader veroordeelt, den doot schuldich te wesen.

65

+Ende sommige hebben beghinnen te spouwen in hem ende zijn aensicht te verdecken, ende inden hals te slaen, ende hem te segghen. Prophe-[kolom]teert. Ende dye dienaers hebben hem kinnebac slaghen ghegeuen.

66

Ende als Petrus beneden in die sael was is een vanden dienstmaechden des oppersten priesters gecomen,

67

ende als si Petrum ghesien hadde wermende, + hem aensiende, seyt si. Ghi hebt ooc met Iesu van Nazareth gheweest

68

Ende hi heeftet versaect seggende Ic en bens niet, noch en weet niet wat ghi segt. Ende hi is wtgegaen inden portael, ende die haen heeft gecraeyt.

69

Ende als hem die dienstmaecht gesien hadde: heeft si weder beghinnen te seggen tot die ghene die daer bi stonden. Dese is van haer lieden.

70

Ende hy versaectet weder om. Een weynich daer nae seyden Petro, die ghene dye daer by stonden. Voorwaer ghy zijt van haer lieden, want ghi zijt een Galileesche.

71

Ende hy heeft beghinnen te vermaledijen, ende te versweeren seggende. Ic en ken desen mensche niet daer ghi af segt,

72

ende die haen heeft weder gecrayt. Ende Petrus heeft gedachtich geweest des woorts, dat Iesus hem geseyt hadde. Eer dye haen tweemael craeyn sal, so sult ghy my driemael versaecken. Ende hi heeft beghinnen te screyen.


Vorige Volgende