De Vorsterman Bijbel

§ Dat .xiij. Capittel.

1

⁺ENde als hy wten tempel ghinck, seyde hem een van zijn discipulen. Meester, siet, ⁺ hoedanighe steenen, ende hoedanige timmeragie.

+ A

+ mat. xiiij.a Luce. xix.d ende .xxi.b.

2

Ende Iesus antwoordende, heeft hem gheseyt. Siet ghi wel dese groote timmeragien? dye een steen en sal op dye ander nyet ghelaten worden, dye nyet wtgeroeyt en sal worden.

3

Ende als hi op den olijfberch sadt, recht teghen den tempel ouer, so vraechden hem Petrus, Iacobus, Ioannes, ende Andreas bisonder.

4

Segt ons, wanneer sullen dese dingen geschien? ende wat teyken salder zijn, als alle dese dingen sullen beghinnen volbrocht te worden?

5

Ende Iesus antwoordende haer, heeft begonnen te segghen. Siet, dat v nyemant en bedriecht.

6

Want veel sullender comen in minen naem, seggende. Ick bent, ende si sullender veel bedrieghen.

7

Als ghy hoort oorlogen ende gheruchten van oorloghen, en wert nyet verstoort, want

[p. D7v]

het moet gheschien: maer ten is noch gheen eynde,

8

Want volck sal tegen volck op staen, ende rijck teghen rijck. Ende daer sullen aertbeuingen wesen in plaetsen, ende hongher, dit zijn die beginselen van droeuicheden.

9

⁺Maer wacht v ghi, want si sullen v leueren in dye raden, ⁺ ende in dye synagoghen, ghy sult gheslaghen worden, ende voor dye rechteren ende coninghen sult ghi staen om minen wil, haer tot een ghetuychnis.

+ B

+ Ioan. xvi.a Mat. vi.c

10

Ende by alle heydenen moetet Euangelie eerst ghepredict worden.

11

Ende wanneer si v leyden sullen, leuerende, en bedenct ghy nyet te voren wat ghi segghen sult, maer so wat v ghegeuen sal worden in dye vre, spreect dat. Want ghy en zijt nyet sprekende, maer dye heylighe gheest.

12

Ende broeder sal broederen inden doot leueren, ende dye vader den soon, ende dye kinderen sullen tegen haer ouders opstaen, ende sullen haer den doot aen doen.

13

Ende ghi sult gehaet worden van alle om minen naem Maer diet verdraghen sal totten eynde, die sal salich wesen.

14

+ Voort als ghi sien sult dye grouwelicheyt des verlatenis, ⁺ staende daer si niet en soude: diet leest die verstaet. Die dan in Iudeen zijn, die vlien totten berghen.

+ Matthei. xxiiij.b Luce. xxi d Danielis. ix.g.

15

Die inden dack zijn en clim niet neder int huys, ende en gae ooc nyet inne, om yet wt zijn huys te nemen.

16

Ende die inden acker wesen sal, en keer nyet weder, om te nemen zijn cleet.

17

Ende wee den beuruchten: ende dye voeden in dien dagen,

18

mer bidt dattet niet en geschiet in die winter.

19

Want dye daghen sullen van alsodanighen verdriet wesen, hoedanich van tbeghinsel der creaturen die god gescapen heeft, tot deser tijt toe niet gheweest en is, noch wesen en sal.

20

Ende ten waer dat de heer die dagen vercort had, alle vleesch en soude niet salich geweest hebben Mer om die wtuercoren, die hy wtuercoren heeft, so heeft hi die daghen vercort.

21

⁺Ende dan, als v yemant segghen sal. Siet hier is Christus. Siet daer is hi, en ghelooftet niet.

+ C

22

Daer sullen opstaen valsche Christi, ende valsche propheten. Ende sullen teykenen ende wonderlicheden doen om te bedrieghen, waert mogelic ooc die wtuercoren

23

Ghi luyden siet dan toe. Ic hebt v te voren altemael gheseyt. *

24

Maer in dien dagen na die tribulacie, so sal die sonne verdonckert worden, ende dye maen en sal haer schijnsel niet gheuen,

25

ende dye sterren des hemels sullen neder vallen: ende die crachten die in die hemelen zijn sullen [kolom] beroert worden.

26

Ende dan sullen si den sone des menschen sien in die wolcken comende, met groote macht ende glorie.

27

Ende dan sal hy zijn engelen seynden, ende sal zijn wtuercoren vergaderen van dye vier winden, vant opperste der aerden, tottet opperste des hemels.

28

⁺Ende leert gelikenisse vanden vijchboom Als zijn tack teer is, ende bladeren voort brenghen, so weet ghi dat die somer na by is.

+ D

29

Alsoe mede, als wanneer ghi siet dese dinghen geschien, so weet dattet na by in die dore is.

30

Voorwaer seg ick v, dyt geslacht en sal niet voorby gaen, tot dat alle dese geschiet zijn.

31

Hemel ende aerde sullen voorby gaen, mer mijn woorden sullen niet voorbi gaen.

32

Maer van dien dach ofte vre en weet nyemant, noch die engelen die inden hemel zijn, noch die soen selfs, dan die vader. *

33

Siet, waect ende bidt, want ghi en weet nyet wanneer dattet tijt is. ⁺

+ Matthei. xxv.a.

34

Ghelijck een mensche die pelgrimagie reyst, heeft zijn huys ghelaten, ende heeft zijn knechten macht ghegeuen van een yegelick werck, ende heeft den poortier geboden dat hi waken soude.

35

Daer om waect, want ghy niet en weet, wanneer dye heer vanden huys comen sal, laedt, oft in die middernacht, oft in de haengecraey, oft inde morgenstont,

36

op dat oft hy haestelic quaem, v niet en vint slapende.

37

Dat ic v segge, dat segge ick alleen. Waect. *