De Vorsterman Bijbel

§ Dat .v. Capittel.

1

⁺+ ENde si zijn gecomen ouer dye zee, in dat rijck Gerasenorum.

+ A

2

Ende na dat hi wt den schepe was ghegaen, ⁺ is hem ter stont te ghemoet ghecomen wt den graue een mensche, die daer was gequelt met een onreyn gheest,

+ Mat. 8.d.

3

dye welcke had zijn wooninge inde grauen, ende nyemant mocht hem met eenighe ketenen binden,

4

daer om, want wanneer dat hi dicwil met boeyen ende ketenen ghebonden was, waren van hem dye ketenen gheschoort, ende die boeyen gebroken. Ende nyemant mocht hem betemmen,

5

ende was altijt dach ende nacht inden berghen ende inde grauen roepende, ende quetsende hem seluen met steenen.

6

Ende wanneer hy sach Iesum van vers, heeft hi ghelopen, ende hem aen gebeden,

7

ende roepende met een grote stemme, heeft gheseyt. Wat is mi met v Ihesu, sone des oppersten gods? Ic besweer v by god, dat ghi mi niet en pijnt:

8

ende hy seyde hem Ghi onreyne geest, gaet wt vanden mensche

[p. D2v]

9

Ende hi vraechde hem. Wat is v naem? Ende hi heeft gheantwoort, seggende hem. Mijnen naem is Legio, want wij veel zijn.

10

Ende hy heeft hem veel gebeden, op dat hi hem nyet en soude seynden wt dat lantscap.

11

⁺Ende daer was by die berghen een grote cudde van verkens weydende, ⁺

+ B

+ Mat. 8.d Luce. viij d

12

ende dye duuelen baden hem seggende. Seynt ons in die verkenen, dat wi moghen in haer gaen.

13

Ende Ihesus heeft haer dat ter stont toe ghelaten: ende wtgaende, zijn die onreyne gheesten gegaen in die verkens Ende die cudde worde ghedreuen met een ghedruyst inde zee, tot twee duysent toe, ende zijn altemael versmoort inde zee,

14

ende diese hoeden, zijn gheuloden, ende hebbent ghebootscapt inder stadt, ende inden ackeren. Ende si zijn ghegaen om te sien wattet was, datter was geschiet.

15

Ende si comen tot Ihesum, ende sien den ghenen die vanden duuel was ghequelt, sittende ende gecleet wesende, ende gesont van herten, ende si hebben geureest.

16

Ende diet ghesien hadden, hebbent haer vertelt, hoet met hem geschiet was, die daer hadde ghehadt den duuel, ende vanden verckenen.

17

Ende si hebben bestaen hem te bidden, dat hi soude gaen van haer plaetsen.

18

Ende als hy climmen soude in een schip, heeft hem ghebeden die daer hadde geweest vanden duuel gequelt, dat hi mochte wesen bi hem.

19

Ende hi en heeft hem niet toegelaten, maer heeft hem gheseit. Gaet in dijn huys totten uwen, ende bootscapt haer, hoe grote dinghen die heer v heeft gedaen, ende dat hy uwer ontfermt heeft.

20

Ende hi is gegaen, ende heeft bestaen te condighen inde thien steden, hoe groote dingen Iesus hem gedaen hadde. ⁺ Ende alle verwonderden si hem: *

+ C

21

Ende als Iesus weder om ouer gheuaren hadde met een schip aent ander oeuer, ⁺ so is gecomen een grote scare tot hem, ende was by die zee.

+ Luc. viij.d.

22

Ende daer is gecomen een vanden princen der synagogen, genaemt Iayrus, ende als hi hem sach, is neder geuallen tot sinen voeten,

23

ende badt hem zeer, segghende. Mijn dochter is inden wtersten, coemt, ende legt v handt op haer, op dat si mach wesen ghesont ende leuen.

24

Ende hi is wech ghegaen met hem ende een groote schare volchde hem, ende verdronghen hem.

25

Ende een vrouwe, ⁺ die daer had geweest inden loop des bloets twalef iaren,

+ Mat. 9 c

26

ende had veel geleden van veel medecijn meesters, ende hadde verteert al haer goet, ende nochtans niet gheuordert en hadde, maer niet dan te quader en hadde.

27

Als si hoorde van Iesu, is [kolom] si gecomen inde scare van achter, ende heeft geraect zijn cleet.

28

Want si seyde. Ist dat ic zijn cleederen rake, ic sal wesen gesont.

29

Ende ter stont is die loop haers bloets verdroocht, ende heeft geuoelt inden lichaem dat si ghenesen was van die plage.

30

Ende Ihesus kennende ter stont in hem seluen die cracht, die wt hem ghegaen was, keerende hem totten scharen, seyde. Wie heeft geraect mijn cleederen?

31

Ende zijn discipulen seyden hem. Ghi siet die schare v bedringhende, ende segt ghi, wie heeft mi gheraect?

32

Ende hi sach toe, om dat hi soude sien dye ghene die dat hadde ghedaen.

33

Ende die vrou vreesende ende beuende, kennende dat in haer gheschiet was, is gecomen, ende is hem te voet gheuallen, ende heeft hem geseyt de geheele waerheyt.

34

Ende hi heeft haer geseyt. Dochter v geloue heeft v gesont ghemaect gaet met vreden, ende weest genesen van v plage.

35

Die wijl dat hi noch sprack, zijn gecomen boden totten prince des synagoge, die daer seyden. V dochter is ghestoruen: ⁺ wat wilt ghi voort meer den meester moeyen?

+ Mat. ix.c.

36

⁺Als Ihesus hadde gehoort die woorden die daer worden gesproken, heeft geseyt totten prins der synagogen. En wilt niet vreesen, maer gheloeft alleen.

+ D

37

Ende heeft nyet toe gelaten, dat hem yemant soude volgen, dan Petrus, Iacobus, ende Ioannes, Iacobus broeder.

38

Ende si zijn ghecomen int huys vanden prince des synagoge. Ende hi heeft gesien een beroerende scare, screyende, ende weenende zeer.

39

Ende ingaende heeft haer geseyt. Wat versladi v aldus ende screyt? dit meysken en is niet ghestoruen, mer si slaept.

40

Ende si hebben hem begect. Mer nae dat hi haer allen wt hadde gedreuen, neemt hi tot hem die vader ende moeder des meyskens ende die ghene die met haer waren, ende si zijn ingegaen daer dat meysken was ligghende

41

Ende nemende dye handt vant meysken, heeft haer gheseyt. Tabitha cumi, dwelck is te verstaen, ick seg meysken rijst op.

42

Ende ter stont heeft op gheresen dat meysken ende wandelde: ende si was twalef iaer out Ende si hebben hen verwondert met grote verwonderinge:

43

ende hi heeft haer groteliken geboden dattet nyemant weten en soude, ende heeft beuolen datmen haer geuen soude teten.