De Vorsterman Bijbel

§ Dat .xxviij. Capittel.

1

⁺+ INden auont vanden sabboth, dye begonste te schijnen opten eersten dach vanden sabboth, is ghecomen Maria Magdalena, ⁺ ende de ander Maria, om dat si dat graf sien souden.

+ A

+ Marci. xiiij.a Ioan. xx.a

2

Ende siet daer is een grote aertbeuinge gheschiet, want die engel des heeren is vanden hemel neder ghedaelt, ende comende, heeft den steen af gherolt, ende sadt daer op.

3

Sijn aensicht was gelijck een blixem, ⁺ ende zijn cleet was wit blinckende ghelijck snee,

+ Luc. xiiij.b

4

ende doer vreese van hem zijn die wachters verscrict gheworden, ende zijn ghelijc doden gheworden.

5

Die Engel antwordende, heeft totten vrouwen geseyt, en wilt ghi niet vreesen, want ick weet dat ghy Iesum die ghecruyst is soect.

6

Hi en is hier niet, want hi is verresen, gelijc hi geseyt heeft. Coemt, siet die plaetse daer die here gheleyt was.

7

Ende haestelic gaende, segget die discipulen, dat hy vanden doden verresen is, ende siet, hi sal v voorgaen in Galileen, daer suldi hem sien. Siet, ick hebt v voorseyt.*

8

+ Ende haestelick vanden graue gegaen zijnde, met vreesen ende met groter blijscappen liepen si, om zijn discipulen dat te bootschappen.

9

⁺Ende siet, Iesus is haer te ghemoete ghecomen, seggende. Weest gegroet, ende si zijn aen ghecomen, ende hebben zijn voeten gehouden, ende hebben hem aen ghebeden.

+ B

10

Ende doen heeft Iesus haer geseyt, en wilt niet vreesen. Gaet heen, ende bootscapt minen broederen, dat si gaen in Galileen, ende daer sullen si mi sien.

11

Ende na dat si wech gegaen waren. Siet, somige vanden wachters zijn inder stadt gecomen, ende hebben den princen der priesteren gebootscapt al datter geschiet was.

12

Ende vergadert zijnde metten ouders, ⁺ ende eenen raet gehouden hebbende, hebben si den knechten oueruloedich gelt gegeuen seggende.

+ C

13

Segt dat zijn discipulen des nachts gecomen zijn, ende hem gestolen hebben, die wijle dat wi slapende waren.

14

Ende ist, dat dit gehoort wort vanden rechter, wi sullent hem diets maken ende sullen v vrij maken.

15

Ende als si dit ghelt genomen hadden, hebben si gedaen ghelijck si geleert waren. Ende dese woorden zijn verbreyt by den Ioden, tot op den dach van huden. *

[p. C8r]

16

+ Ende die elf discipulen zijn gegaen in Galileen, op den berch daer Iesus hen beuolen hadde,

17

ende na dat si hem ghesien hadden, hebben si hem aenghebeden, ende die sommighe hebben ghetwifelt.

18

Ende Iesus comende heeft tot haer ghesproken seggende My is die macht ghegheuen inden hemel, ende inder aerden.

19

Hier omme gaende leert alle volck, haer doopende inden naem des vaders ende des soons ende des heyligen gheests,

20

haer leerende tonderhouden alle dat ick v beuolen hebbe. Ende siet ic ben bi v alle dage tot der voleyndinghe der werelt. *

§ Hier na volcht sinte Marcus Euangelie.