De Vorsterman Bijbel

§ Dat .xxvi. Capittel.

1

⁺ENde het is gheschiet, ⁺ als Iesus alle dese sermonen gheeyndet hadde, so heeft hi sinen discipulen gheseyt.

+ A

+ Matthei. xiiij.a. Ioan. xi.f.

2

Ghi weet dattet nae twee daghen passchen wort, ende die soon des menschen sal geleuert worden, om ghecruyst te worden.

3

Doen zijn die princen der priesteren, ende die ouders des volcs vergadert geweest in die sael des princen der priesteren, de welcke genoemt wordt Cayphas.

4

Ende hebben eenen raet gehouden dat si Iesum door bedroch vanghen, ende dooden mochten.

5

Ende seyden Niet in die hoochtijt, op datter gheen oploop gheschiede onder twolck.

6

Als Iesus in Bethanien was, int huys van Symon leproos,

7

is tot hem gecomen een vrou, hebbende een bussche met coestelijcke salue Ende si heeftet wt ghestort op zijn hooft daer hy was aen die tafel sittende. ⁺

+ Ioan. xij.c

8

Ende die discipulen dat siende, hebben hen veronweerdicht seggende. Waer toe is dit verlies?

9

want dese salue mocht duer vercoht worden, ende den armen ghegeuen.

10

Ende Iesus dat kennende, heeft haer gheseyt. Wat zijt ghy dees vrou moeylic? want si heeft een goet werck in mi gewrocht:

11

Want dye armen hebt ghy altijt met v, mer mi en sult ghi altijt niet hebben

12

Want dat si dese salue op mijn lichaem gegoten heeft, dat heeftse gedaen om mi te begrauen.

13

Voorwaer seg ic v, waer dit euangely gepreect sal worden in de heele werelt, sal dyt vertelt worden in haer ghehoochnisse, ⁺ dat dese dyt ghedaen heeft.

+ B

14

Doen is wech gegaen een vanden twaleuen, ⁺ de welcke genoemt wort Iudas scarioth

+ Luc. xxij.a. Marci. xiiij.b

[p. C6r]

totten princen der pristeren,

15

ende heeft haer gheseyt. Wat wilt ghi mi geuen, ende ic sal hem v leueren? Ende si hebben hem gelooft .xxx. siluere penningen.

16

Ende van die tijt, socht hi gelegentheyt om hem te leueren.

17

Op den eersten dach des hoochtijs azyimorum, zijn die discipulen tot Iesum gecomen seggende hem. Waer wildi dat wi v bereyden tpaeschlam te eten?

18

Ende hi heeft geseyt. Gaet in die stadt tot eenen, ende segt hem. Die meester seyt. Minen tijt is bi, bi v maectk ic paesschen met mijn discipulen.

19

Ende die discipulen hebben gedaen gelijck als Iesus haer beuolen heeft, ende hebben tpaeschlam bereyt.

20

⁺Alst auont gheworden was, so sadt hi aen dye tafel by zijn .xij. discipulen,

+ C

21

⁺ ende als si etende waren, heeft hy gheseyt. Voorwaer seg ick v, een van v sal my verraden,

+ Ioan. xiij c

22

ende si zijn seer droeuich gheworden, ende hebben een yegelick hem beghinnen te seggen. Ben ict nyet heere?

23

Ende hy antwoordende heeft gheseyt. Dye met my dye hant in de schotel stect, dese sal mi verraden.

24

Die soen des menschen gaet ghelijck van hem ghescreuen is. Mer wee den mensch, door welcken die soen des menschen verraden sal worden. Het waer hem goet, dat dye mensch niet gheboren en waer geweest.

25

Ende Iudas, de welcke hem verraden hadde antwoordende heeft geseyt Ben ict niet Rabbi? Hy heeft hem gheseyt. Ghy hebtet gheseyt.

26

Als si etende waren, heeft Iesus tbroot genomen, ⁺ ende dat gebenedijt, ende gebroken, ende heeftet zijn discipulen gegeuen ende gheseyt. Neemt ende eedt, dat is mijn lichaem.

+ Marci xiiij.c Luc. xxij.b Ioan. vi.c. i.Cor. xi.c.

27

Ende doe hy den kelc ghenomen, ende ghedanct hadde, heeft hijt haer gegeuen, seggende. Drinct daer wt alle gader,

28

want dit is mijn bloet des nieuwen testaments, dat voor veel wt ghestort sal worden, tot vergiffenis der sonden.

29

Ende ick segge v, ⁺ hier nae en sal ic niet meer drincken wt dese vrucht des wijnghaerts, tot dien dach toe, als ick dat nieuwe met v drincken sal int rijc mijns vaders.

+ Ioan. xviij a

30

Ende als si den lof geseyt hadden, zijn si wtgegaen op den berch van Oliueten.

31

Doe seyde Iesus haer. Ghi alle gader, sult ghescandalizeert worden om minen wil in dese nacht. ⁺ Want daer staet ghescreuen. Ic sal den herder slaen, ende die scapen des vergaderincs sullen verstroyt worden.

+ zacharie. xxxiij.c.

32

Mer na dat ic verresen sal wesen, so sal ic v voorgaen in Galileen.

33

Ende Petrus antwoordende heeft hem geseyt. ⁺ Al waert dat si alle gader ghescandalizeert souden worden om v, nochtans en sal ick [kolom] nemmermeer gheschandalizeert worden.

+ Marci. xiiij.d. Luce. xxij e

34

Iesus sprack tot hem. Voorwaer seg ick v, dat ghy in dese nacht eer dye haen craeyt, driemael mi versaken sult.

35

⁺Petrus heeft hem gheseyt. Ia al waert ooc van noode dat ic met v steruen moeste, ick en sal v niet versaeken. Des gelijcs hebben ooc alle die discipulen geseyt.

+ D

36

Doe is Iesus met haer gecomen in een dorp dwelc genoemt wort Gethsemani, ende heeft die discipulen geseyt. Sidt hier, ter tijt toe, dat ic gae ende bidde daer.

37

Ende als hy tot hem ghenomen hadde Petrum, ende die twee sonen van zebedeus, heeft begonnen droeuich ende bedruct te worden.

38

Doen heeft hy haer gheseyt. Mijn siel is bedroeft ter doot toe, blijft hier, ende waect met mi.

39

Ende een weynich voort ghegaen zijnde, is hy op zijn aensicht geuallen, biddende ende segghende Mijn vader ist moghelijcken laet van my gaen desen kelck, nochtans niet als ick wil, maer als ghi.

40

Ende hy quam tot sinen discipulen, ende vant haer slapende. Ende heeft gheseyt tot Peeter. En muecht ghy niet een vre met mi waken?

41

waect ende bidt, dat ghi niet en valt in becoringe. Die geest is bereit mer tvleesch is cranck

42

Weder om ten tweeden mael is hy wech ghegaen, ende heeft ghebeden seggende. Mijn vader, ist dat dese kelck van mi niet en mach gaen, ten si dat ick hem drincke, uwen wil moet geschieden.

43

Ende hy is weder gecomen, ende heeftse geuonden slapende, want haer ooghen waren beswaert.

44

Ende haer gelaten hebbende, is weder omme wech gegaen, ende heeft ten derden mael ghebeden, seggende dat selfste woort.

45

Doen quam hi tot sinen discipulen, ende seyde haer. Slaept nv, ende rust. Siet, die vre is ghenaket, ende die sone des menschen wort gheleuert in die handen der sondaren,

46

staet op laet ons gaen, siet, hy is hier by die mi verraden sal.

47

⁺Ende noch sprekende. Siet Iudas een vanden twafel is ghecomen, ⁺ ende met hem een groote schare, met swerden ende kudsen, ghesonden vanden princen der priesteren ende die ouders des volcs.

+ E

+ Ioan xviij a Marci. xiiij.e. Luce. xxij e

48

Dye hem verraden hadde, heeft haer een teeken gegeuen, seggende. Dye ick cussen sal, die ist, hout hem.

49

Ende ter stont gaende tot Iesum heeft gheseyt. Weest ghegroet meester, ende hy heeft hem ghecust.

50

Ende Iesus heeft hem geseyt. Vrient, waer toe sidi ghecomen? Doen zijn si aen ghegaen, ende hebben haere handen gheslegen in Iesum, ende hebben hem gheuanghen.

51

Ende siet een van die ghene die met Iesu

[p. C6v]

waren wtstreckende zijn hant, heeft zijn sweerdt wt getogen ende slaende den knecht des prins der priesteren heeft hem zijn oore af gehouwen.

52

Doe sprac Iesus tot hem. ⁺ Keert v sweerdt in zijn plaetse, want alle die het sweert nemen die sullen metten sweerde vergaen.

+ Gene. v.a

53

Meent ghi, dat ick niet bidden en mach minen vader, ende hy sal my gheuen meer dan .xij. legionen der engelen?

54

Daer om, hoe souden dan dye scrifturen veruult worden? want het moet also gheschieden.

55

⁺In dye vre heeft Iesus gheseyt den scharen: ghy zijt wt ghegaen, als tot een moordenaer met sweerden ende stocken om my te vangen, ⁺ daghelicx sadt ick by v leerende inden tempel, ende ghi en hebt mi niet gheuangen.

+ F

+ Marci xiiij.f.

56

Al dit is gesciet, op dat veruult souden worden die schriften der propheten. Doen al zijn discipulen hem latende, zijn gheuloden

57

Ende si Iesum geuangen hebbende, hebben hem gebrocht tot Caypham den prince der priesteren, daer die scriben ende ouderen vergadert waren.

58

Ende Petrus volchde hem na van verre, tot dye sael des princen der priesteren. Ende ingegaen wesende sadt hi by dye dienaers, op dat hi dat eynde sien soude.

59

Die princen der priesteren, ende die heele vergaderinge sochten tegen Iesum een valsch getuychnis, op dat si hem dooden souden,

60

ende si en vonden niet, alser ooc veel valsche getuygen by gecomen waren. Mer ten laetsten zijnder twee valsche ghetuygen gecomen,

61

ende hebben gheseyt. Dese heeft geseyt Ic mach te niet maken den tempel gods, ende in drie daghen die weder timmeren.

62

Ende dye prins der priesteren op staende, heeft hem geseyt. En antwoort ghi niet tot dien, dat dese tegen v getuyghen?

63

Iesus sweech.

Ende die prince der priesteren heeft hem gheseyt. Ick besweere v biden leuende god, dat ghi ons segt oft ghi zijt Christus die soon gods. ⁺

+ Marci xiiij.f

64

Iesus seyt hem. Ghi hebbet gheseyt. Mer nochtans seg ick v, van nv af sult ghi sien den soon des menschen sittende aen die rechter hant des crachts gods, ende comende in die wolcken des hemels.

65

Doe schoerde dye prins der priesteren zijn clederen, segghende Hy heeft gheblasphemeert, wat behoeuen wi daer bouen meer getuygen? ⁺ Siet ghy hebt nv blasphemie gehoort,

+ G

66

wat dunct v? Ende antwoordende hebben si geseyt. Hy is den doot sculdich.

67

Doe hebben si in zijn aensicht gespogen, ende gheslagen met vuysten. Ende dye ander hebben hem platte handen slagen in zijn aensicht gegeuen,

68

seggende. Propheteert ons [kolom] Christe, wie ist die v gheslagen heeft?

69

Ende Petrus sadt buyten in die sael, ende een dienst maecht quam tot hem seggende Ende ghi waert oock met Iesu van Galileen

70

Ende hi heeftet voor haer allen versaect seggende. Ic en weet niet wat ghi segt.

71

Ende als hi gegaen was wt der dueren, heeft hem een ander dienstmaget gesien, ende heeft geseyt den ghenen die daer waren. Ende dese was ooc met Iesu van Nazarenen.

72

Ende hi heeftet weder om versaect met eenen eedt, want ick en ben den mensch niet.

73

Ende nae een weynich tijts, zijn toegaen die daer stonden, ende hebben geseyt tot Peeter. Voorwaer ghi zijt mede van haer luyden, want v spraeck maect v openbaer.

74

Doen heeft hy begonnen te veruloecken, ende te sweren, dat hi den mensch niet gekent en hadde. Ende ter stont heeft die haen ghecraeyt

75

ende Peter heeft ghedachtich geweest des woorts Iesu, dat hy geseyt had. Eer die haen craeyt, sult ghy my driemael versaken. Ende wtgegaen zijnde heeft bitterlic gescreyt.