De Vorsterman Bijbel

§ Dat .viij. Capittel.

1

⁺ENde als hi vanden berge neder gedaelt was, soe zijn hem geuolcht veel scaren,

+ A

2

ende siet een malaetsch mensche quam bi hem, ⁺ ende heeft hem aengebeden, seggende. Here wildi ghi moeget my suueren.

+ Mar. i.d Luc. v.e

3

Ende wtstekende zijn hant, heeft hem gheraect segghende. Ic wil: wert suyuer. Ende ter stont so was zijn malaetsheyt gereynicht:

4

ende Ihesus sprac tot hem Siet dat ghi dit nyemant en segt. Met gaet ende verthoont v den priester, ende offert dijne ghifte, ⁺ die Moyses gheboden heeft haer tot een ghetuychnis.

+ Leui. xiiij.

5

+ Ende doen Iesus ingegaen was Caphernaum, ⁺ is tot hem gecomen een hooftman, hem biddende

+ Luce. 7.a

6

ende seggende. Heere mijn knecht leyt thuys ghichtich, ende wert leelic gequelt.

7

Ende Iesus seyt tot hem. Ic sal comen, ende hem gesont maken.

8

Ende dye hooftman antwoorde, ende heeft gheseyt. Heere ic en ben nyet weerdich, dat ghy onder mijn dack comen sout, maer spreect alleen een woort, ende mijn kint sal ghenesen worden:

9

want ick ben een ⁺ mensch die eens anders macht onderworpen is, ende heb onder mi knechten: ende ic segghe tot desen gaet, ende hi gaet, ende tot den anderen coemt, ende hi coemt: ende minen knechte, doet dat, ende hi doetet.

+ B

10

Hoorende Iesus dat, heeft

[p. B4v]

hem verwondert, ende sprac tot den ghenen dye hem na volchden. Voorwaer ic segghe v, ick en hebbe alsulcken gheloue in Israel niet geuonden.

11

Maer ic segge v. Veel sullender comen wt oosten ende westen, ende sullen sitten met Abraham, Isaac ende Iacob int rijck der hemelen.

12

Ende die kinderen des rijcs sullen wtgeworpen worden in die wterste duysternis, daer sal wesen screyinge, ende knersinge van tanden.

13

Ende Iesus heeft gheseyt den hooftman. gaet henen, ende ghelijc ghi ghelooft hebt also geschiede v. Ende zijn knecht is gesont geworden in die vre. *

14

+ Ende als Iesus gecomen was in dat huys Petri, so heeft hi gesien zijns wijfs moeder liggende, ⁺ ende hebbende die cortse:

+ Luce 4 b Mar. 1.c

15

ende hy heeft gheraect haer hant, ende die cortse heuet haer ghelaten: ende si is op gestaen, ende diende haer.

16

Alst auont gheworden was, so hebben si hem veel die duuelen hadden toe gebrocht ende hi heeft wt gheworpen die gheesten met een woort. ⁺ Ende al dye cranck waren heeft hy ghesont ghemaect.

+ Mar. i.d. Luce. 4.g.

17

Op dat veruult soude worden, dat gheseyt was door den Propheet Esaiam, segghende. Hy heuet onse crancheden ontfanghen, ⁺ ende onse sieckheden ghedragen.

+ Esa. liij i.Pet. ij.d

18

⁺Siende Iesus veel scaren om hem, heuet geboden zijn discipulen, dat si gaen souden ouer twater.

+ C

19

Ende tot hem gaende een Scribe, heeft geseyt. ⁺ Meester ic sal v volghen, waer dat ghi gaet.

+ Luce. ix.

20

Ende Iesus seyde tot hem. Die vossen hebben holen, ende dye vogelen des hemels nesten, die soon des menschen en heeft niet daer hi zijn hooft mach leggen.

21

Een ander van zijn discipulen heeft hem geseit. Here, laet mi eerst toe dat ic mach gaen ende grauen mijn vader.

22

Iesus heeft geseyt tot hem. Volcht my, ende laet die dooden haer dooden begrauen.

23

+ Ende hem climmende in een scheepken zijn na geuolcht zijn discipulen.

24

Ende siet, een groote beroerte is gheworden in die zee, also dat dat schip bedect wort van dye goluen Ende hi sliep.

25

Ende die discipulen tot hem comende, hebben hem ghewect segghende Heere verlost ons, wij vergaen.

26

Ende hy seyde haer: ⁺ wat zijt ghi vreesende cleyn van gheloue? Doe opstaende heeft geboden den winden ende die zee, ende daer is gheworden een groote stilte.

+ Luc. viij.d. Mar. 4.d

27

Ende die menschen verwonderden haer, seggende. Hoedanighe is dese, want die winden ende die zee zijn hem hehoorsaem. *

28

⁺Ende doen hy dat waterken ouer gheco-[kolom]men is in dat landtscap Gerasenorun, ⁺ zijn hem te ghemoet comen twee, hebbende duuelen, wt de grauen ghegaen zijnde. Ende waren bouen mate wreet, also dat nyemant door dien wech gaen mochte.

+ D

+ Mar. v.a

29

Ende siet si hebben geroepen seggende. Wat is ons met v Iesu, soon Gods? Sijt ghi hier ghecomen om ons te quellen voor der tijt?

30

Nyet verde van haer was een cudde van veel vercken weydende.

31

Die duuelen baden hem, segghende. Ist sake dat ghi ons werpt van hier, ⁺ seyndet ons inden hoop der vercken.

+ Mar. iij.b

32

Ende hij sprac tot haer: gaet. Si wtghegaen wesende, zijn ghegaen in die vercken. Ende siet, die heel cudde der vercken wort geuoert snellic met een groot ghedruyst inde zee, ende zijn gestoruen in die wateren.

33

Die hoeders zijn wech geloopen, ende comende in die stadt, hebben dit al gebootscapt, ende van die de duuelen hadden.

34

Ende siet, die ganse stadt is wtgegaen, Ihesus te gemoet. Ende als si hem gesien hadden, baden si, dat hi wech ghinge van haer eynden.