De Vorsterman Bijbel

§ Dat .xvi. Capittel.

1

⁺ENde Ioannes trock op van Gazara, ende seyde Symoni sinen vadere, wat dingen dat Cendebeus dede in zijn volc,

+ A

2

Ende Simon riep zijn outste twee sonen, Iudam ende Ioannem, ende seyde hen, Ick ende mijn broeders ende mijn vaders huys hebben beuochten Israels vianden, van onse ioncheit tot op desen dage, Ende alsulcke werc hadde voorspoet in onsen handen, Israel te verlossen,

3

Maer nv ben ick out gheworden, ende weest ghi in mijn stadt, ende mijns broeders, ende trect wt, ende vecht voor onse volc, ende hulpe vanden hemel moet met v wesen,

4

Ende hy koos wten lande, twintich duysent mannen, vechters ende rosuolc, ende si trocken tot Cendebeum waert, ende sliepen in Modin.

5

Ende si stonden des morghens op, ende trocken te velde.

Ende siet, hen quam een groot heyr teghen, van luyden te voete, ende te paerde, ende tusschen hen was een schieten-

[p. AA2r]

de riuiere,

6

Ende hi stelde dat heyr tegen haer aensicht, hi ende zijn volck, Ende hi sach dat hem tvolc ontsach, ouer die riuiere te varen, ende hy voer eerst ouer. Ende die ander mannen sagen hem, ende voeren hem na ouer.

7

Ende hi deelde tvolck, ende dat rosuolc int midden der voetganghers, Want der vianden rosuolc was zeer vele,

8

Ende si sloeghen met die heylighe trompetten, ende Cendebeus, ende zijn heyr wert vliedende, ende van hen werter vele gewont, maer die andere vloden tot die stadt,

9

ende Iudas Ioannis broeder, wert daer ghewont, Ende Ioannes volchde den vianden starckelijck, tot dat hi tot Cedron quam, die Cendebeus gesticht had,

10

ende si vloden totten torrens dye in dye velden van Azoten stonden ende Ioannis aenstacse metten viere Ende van hen luyden vielender twee duysent mannen, ende hi keerde weder tot dat Ioetsce landt waert, met vrede.

11

Ende Ptolomeus Abobus sone was hertoech ghemaect int velt van Iericho, ende hi hadde veel siluers ende gouts,

12

Want hy was des opperste priestes behoude sone,

13

⁺Ende zijn herte verhief hem, ende woude dat lantschap behouden, ende dachte bedroch teghen Symon ende zijn sonen, dat hise dooden soude,

+ C

14

Ende Symon doorwandelde die steden die in dat Ioetsce lant waren, sorchfuldicheyt hebbende daer af, so troc hi neder in Iherico hy ende Mathathias ende Iudas zijn sone, Int honderste ende tweentseuentichste iaer, ⁺ in die elfste maent, dat was inder maendt Sabat,

+ Februarij

15

Ende Abobus sone ontfinck hen met valsheyden in een bewaert stedeken dat, Doch, hiet dat hi gesticht hadde, ende hi maecte hem een groote maeltijt, ende berchde daer mannen,

16

Ende doen Symon ende zijn sonen vol van drancke waren, soo stont Ptholomeus op metten sinen, ende si namen haer wapenen, ende quamen totter maeltijt, ende sloeghen Simon ende beyde zijn sonen doot, ende eenige van sinen knapen.

17

Ende hi dede groote bedriechenisse in Israel, ende ghaf quaet voor goet,

18

Ende Ptholomeus schreef dit, ende sandt, den coninc, dat hy hem een heyr tot hulpe sandt, ende hi soude hem tlantschap leueren, ende die steden ende den tribuyt.

19

⁺Ende hi sandt ander in Gazara om Ioannem doot te slaen, ende hi sandt totten capiteynen ouer duysenden, brieuen, dat si tot hem quamen, hi soude hen siluer ende gout ende giften geuen,

+ D

20

Ende hi sandt ander om Ierusalem te winnen, ende den borcht vanden tempel,

21

Ende een lieper voor, ende seydet Ioanni Symons sone in Gazara, dat zijn vader ende zijn broederen doot geslagen waren, ende dat Ptholomeus [kolom] ghesonden hadde om hem doot te slaen.

22

Ende doen Ioannis dit verhoorde, so wert hi anxtelijc zeer veruaert, ende hi vinc die mannen die ghecomen waren om hem te dooden, Ende hi sloechse doot Want hi wiste dat si hem dooden wouden,

23

Ende die ander redenen van Ioannis van zijn strijden, ende van sinen goeden duechden, die hi starckelic dede, ende die gestichten vanden mueren die hi stichte, ende die dingen die hi dede,

24

siet si zijn beschreuen inden boeck der dagen zijns priesterscaps, vander tijt dat hi prince wert vanden priesteren, na Simonem sinen vader

§ Hier eyndt dat eerste boeck der Machabeen.