De Vorsterman Bijbel

§ Dat .xv. Capittel.

1

⁺ANtiochus Demetrius sone sandt eenen brief wt den eylanden vander zee, tot Symon den oppersten priestere, ende den princen vanden Ioden, ende alle den volcke,

+ A

2

ende was inhoudende na deser manieren, Die coninc Antiochus ontbiet Symoni den oppersten priestere, ende den Ioetschen volcke saluyt,

3

Want eenige ouerdadighe hebben ghehouden ons vaders rijck, ende ic wil dat rijcke wreken, ende settent alsoot te voren was, ende daerom heb ick ghemaect een wtuercoren heyr van menichten, ende hebbe ghemaect schepen om te strijden,

4

Ende ick wil voort trecken door tlantschap, om dat ic worde gewroken teghen die ghene die onse lantschap ghecranct hebben, ende die vaste steden verdoruen hebben in mijn rijck.

5

Daerom geue ic v nv alle die offerhanden die die Coninghen v verlaten hebben voor mi, ⁺ ende soo wat ander ghiften si verlieten,

+ B

6

ende ick oorloue v te maken in v lantschappen eenen slach van penningen van eygender munten,

7

Ende dat Hierusalem heylich bliue ende geurijt, ende alle die wapenen die ghemaect zijn, ende die vaste steden die ghi gesticht hebt, die blijuen uwe,

8

Ende men verlaet v alle sconincs schout, ende datmen hier na schuldich sal worden van nv ende in alden tijt hier na,

9

Ende als wi onse rijc sullen hebben ghewonnen, so sullen wi v ende uwen luyden, ende den tempel verheffen, ende dien eeren met heerlicheyt, soo dat v eere vermaert sal worden ouer alle die werelt.

10

Int honderste ende vierentseuentichste iaer, soo quam Antiochus in zijns vaders lant, ende alle die heyren vergaderden tot hem, so datter seer luttel bi Triphon bleuen.

11

Ende Antiochus die Coninc volchde hem na, ende Triphon quam tot Doran, daer hi vlode door die zee.

12

Want hi wiste dat tquaet tegen hem vergadert wert, ende theyr verliet hem,

13

Ende Antiochus troc op tot Doram, ⁺ met hondert ende twintich duysent mannen te voete, ende acht duysent te paerde,

+ C

14

Ende si omleyden die stat, ende die schepen trockender toe vander zee siden, ende streden op die stat te lande ende ter zee, ende si en lieten daer niemant wt noch in varen,

15

Ende Numenius ende die met hem waren, quamen vander stadt van Romen, ende hadden brieuen die gescreuen waren aenden coningen ende lantscappen daer dit in gescreuen was

16

Lucius die borgemeester van Romen Ptolomeo den coninc saluyt.

17

Die Ioden legaten, onse vrienden, die zijn

[p. AA1v]

gecomen tot ons, ⁺ om te vernieuwen die voorleden vrientscap, ende geselscap, die gesonden zijn van Simon den hoogen prince der priesteren, ende den Ioetschen volcke,

+ D

18

Ende si brochten ons eenen gulden schilt van duysent dragmen,

19

hierom beliefdet ons, dat wi scriuen den coningen ende den lantscappen, dat si hen gheen quaet en doen, noch op hen en strijden, noch op haer steden ende haer landen, ende dat si gheen hulp en doen den ghenen die teghen hen strijden,

20

want ons dunct goet dat wi van hen den schilt ontfingen,

21

Ende oft ouerdadige van haren lantscappen tot v gheuloden zijn, die leuert Simoni den oppersten priestere dat hi daer wrake ouer doe na zijnre wet

22

Dit selue screefmen Demetrio den coninc ende Attalo, ende Arathe, ende Arsace,

23

Ende in allen lantscappen, ende Samsame, ende den Sparciaten ende Delo, ende Mido, ende Sidonien, ende Carie, ende Samun, ende Pamphilien, ende Liciam, ende Alacarnasum, ende Rodum, ende Phacelida, ende te Coo, ende te Siden, ende te Arado, ende te Gortinam, ende te Gnidum, ende te Cypres, ende te Cyrenen,

24

Ende dat wtscrift al hier af, screuen si Symoni den prince der priesteren, ende den Ioetschen volcke.

25

⁺Ende Antiochus die coninc trock voor Doram anderwerf, met zijn heyr, ende stormde daer altoos op, ende maecte daer schransen, ende besloot Triphon, so dat hi niet voorder trecken en soude,

+ E

26

Ende Symon sandt hem twee duysent wtuercoren mannen tot hulpe, ende siluer ende gout, ende vele vaten,

27

ende hi en woudese niet ontfangen Maer hi brac al dat hy te voren met hem ouer een gedragen hadde, Ende hy veruremde hem van hem,

28

ende sandt tot hem Anthinobium, eenen van sinen vrienden, dat hi met hem handelen soude, ende segghen, Ghi hout Ioppen ende Gazara, ende die borcht die binnen Hierusalem is die steden van minen rijcke,

29

ende haer landt hebdy verwoest, ende hebt groote plagen ghedaen int lant, Ende hebt groote heerscappie gehadt int landt, tot vele steden binnen mijnen rijcke,

30

Nv dan so gheeft mi weder die steden die ghi mi genomen hebt, ende die tribuyten vanden steden daer ghi heerscappie bouen ghehadt hebt, buyten den lantpalen vanden Ioetschen lande,

31

⁺Ende en wildijt niet doen, so geeft vijfhondert ponden siluers, ende ouer die plage die ghi gedaen hebt, ende ouer den tribuyt vanden steden, so gheeft noch ander vijhondert ponden, Ende en doedijt niet, so sullen wij comen, ende beuechten v.

+ F

32

Ende Anthinobius des conincs vrient quam in Hierusalem, ende sach Symons heerlicheyt, ende zijn heerlijck cyraet van gout ende siluer, ende zijn groot ghesinne, ende hi verwonderde des, [kolom] Ende hi vertelde, hem des conincs woorden.

33

Ende Simon antwoorde hem, ende seide, Wi en hebben gheen lant ghenomen, dat onse niet en was, noch wi en houden gheen vremt lant, maer wi houden onser vaderen erflicheyt, die een wile ons onrechtuaerdelijcken onthouden was, van onsen vianden,

34

Maer als wi den tijt hadden, so creghen wi weder onser vaderen erflicheyt,

35

Want van Ioppen ende Gazara daer ghi af spreket, soo deden si daer in onse lantscap groote plagen onder den volcke, van desen geuen wi hondert ponden siluers, Ende Anthenobius en antwoorde niet een woort,

36

Ende keerde weder totten coninc met gramscappen, ende seyde hem dese dingen, ende Symons heerlicheyt, ende alle dat hi gesien hadde.

Ende dye coninc wert seer gram,

37

⁺ende Triphon vloot in een schip tot Ortosayda,

+ G

38

Ende dye coninc maecte Cendebeum leytsman ter zee, ende gaf hem een heyr van rosuolc, ende van voetknechten,

39

ende beual theyr te leyden na dat Ioetsche landt waert, Ende beual hem te maken een vaste stat diemen Cedron hiet, Ende dat hi die poorten van dier stat verstoppen soude, Ende datmen tvolc tonder doen soude met strijde, Ende die Coninc volchde Triphon na,

40

Ende Cendebus quam te Iamniam, ende hi begonste tvolc te bestormen, ende dat Ioetsche lant te verderuen, ende dat volck te slaen, ende te vanghen, ende Cedron te stichten,

41

Ende hy leyde daer dat heyr ende dat rosuolc, om dat si daer wt trecken souden, ende doorwandelen dat Ioetsce lant, alsoot die Coninc beuolen hadden.

§ Hoe Symon twee sonen sandt om Cendebeum te bestrijden, dat Iudas Symons sone gewont was, Hoe dat Symon met sinen sone in die maeltijt gedoot wert.