De Vorsterman Bijbel

[p. X4r]

§ Hier beghint die Propheet Naum

§ Hoe die Propheet Naum die bloetghierghe stadt Niniue strafte. Ende na dat si omghekeert is, so seyt hi, Siet op die bergen zijn dye voeten der ghenen die blijdelijc bootschappen ende vercondighen den vrede.

§ Dat .i. Cap.

1

⁺DEn last Niniue, Dat boeck des gesichts Naum Helchesei.

+ A

2

Die HERE is wt liefden gram ende wrekende, ende die HEERE is wrekende, ende heeft toorn, die HEERE wreect tegen sine vianden, ende hi is toornich sinen vianden,

3

Die HERE is lancmoedich ende groot van cracht, ende ^* reyn makende en sal hi niet onnoosel maken. Die HEERE in onweder ende in gedruysch, zijn sine weghen, ende die misten zijn stof zijnder voeten.)

* the. die niemant en ouer siet Des heeren wech is een onweder, ende ghedruysch ende die wolcken zijn zijnder voeten stof

4

Hi berispt de zee, ende maectse drooge, ende brengt alle wateren tot die woestine, Basan ende Carmelus zijn cranck geworden, ende die bloeme Libani is flau gheworden.

5

Die bergen zijn van hem beroert, ende die hueuelen zijn veruallen. ⁺ Ende die aerde heeft gebeeft van zijn aenschijn ende die werelt, ende alle die daer in woonen,

+ B

6

Wie sal mogen staen voort aensicht zijnder gramschapen, ende wie sal wederstaen inden tooren zijnder gramscapen? Sijn gramscap ^* is wtgestort) als een vier, Ende die steenen zijn geschoert van hem.

* h. versmiltet

7

Die HERE is goet, ende maect sterck inden dach des drucs, Ende hi kentse die op hem hopen.

8

Ende ghelijck een vloet voor bi ghaet, soo sal hi veruulinghe zijnder stede maken, ☞ ende die duysternissen sullen veruolghen zijn vianden.

9

Wat denct ghi, tegen den HERE? Hi ist dies een eynde sal maken, ⁺ Daer en sal gheen dubbel anxt opstaen,

+ C

10

want so die doornen malcanderen ^* beuangen) alsoo sal zijn die maeltijt der ghuen die te samen drincken. So sullen si verteert worden, als een stoppel vol dorheyts,

* th. verwerren

11

Want wt v sal wtgaen, die archeyt dencket teghen den HEERE, ^* ende tracterende metter herten ouertredinghe.)

* the. ende een raetsheere Belial.

12

Dit seyt die HERE ^* Ist dat si volcomen zijn, ende soo vele) so sullen si tsamen afgheschoren worden, ende sal voor bi gaen, Ick heb v ghecastijt, ende ic en sal v niet meer castijen [kolom]

* the. hoe ghi beter ghestelt ende hoe ghi meer zijt.

13

⁺Ende ick sal nv te samen breken zijn roede van uwen rugge, ende ick sal uwe banden schoeren

+ D

14

Ende die HERE sal op v gebieden, Wt uwen naem, en sal ^* niet meer gezayt worden) Ick sal v dooden inden huyse ws Gods, die ghesneden ende geghoten beelden sal ick v tot een graf setten, Want ghi ongheeert zijt.

* the. gheen zaet meer comen.

15

☞ Siet op die bergen zijn die voeten des ghenen, die blijde bootschap brengt, ende bootscapt vrede.

O Iuda, viert v hoochtijden, ende betaelt v beloften, want Belial en sal niet meer dencken, door v te ghaen, hi is al ghestoruen.

§ Hoe die wrake Gods tegen Niniue wesen sal. Ende van dat heyr van Babilonien.