De Vorsterman Bijbel

§ Dat .vi. Ca

1

⁺HOort wat die HERE seyt, Staet op, ende kijft int recht teghen die berghen, ende die hueuelen sullen v stemme hooren.

+ A

2

Ghi berghen hoort dat oordeel des HEEREN, ende ghi stercke fundamenten der aerden, want dat oordeel des HEEREN is met sinen volcke, ende met Israel sal hi ^* gheoordeelt worden)

* the. onderuraghen

3

Mijn volck, wat heb ic v ghedaen? ☞ oft waer in heb ick v moeylijck gheweest? Antwoort mi,

4

Want ick heb v wt gheleyt vanden lande van Egypten, ende vanden huyse des dienst heb ick v verlost, ende heb ghesonden Moysen, Aaron ende ^* Mariam) voor v aensichte.

* th. Miriam

5

⁺O mijn volck, ick bidde, dat ghi ghedenct, wat Balach die coninc van Moab, heeft ghedacht tegen v, ende wat hem

+ B

[p. X3v]

gheantwoot heeft Balaam Beors sone van Setim tot ^* Galgalam,) Op dat ghy dye rechtuaerdicheyt des HEEREN sout bekennen,

* th. Gilgal

6

^* Wat sal ic den HEERE waerdich offeren? Ick sal buygen mijn knien, den hoogen Gode, Sal ick hem offeren offerhande, diemen verbrant? ende iarige calueren?)

* the. Waer mede sal ic voor den here comen ende mi voor den hoogen god bucken, Sal ic met brantoffer ende iarighe calueren voor hem comen.

7

Sal die HEERE te vreden gheeset moghen worden, met duysenden der rammen? oft met ^* veel duysenden vetter bocken?) Sal ick geuen minen eerstgheborenen voor mijn sonde, die vrucht mijns buycs, ⁺ voor die sonden mijnder zielen?

* th. ontallijke backen olijs

+ C

8

O mensche ick sal v te kennen gheuen wat goet is, ende wat die HEERE van v eysschet ☞ Sekerlijck dat recht te doen, ende die barmherticheyt te beminnen, ende sorchfuldich te wandelen met uwen Godt.

9

Des HEEREN stemme roept tot die stadt, Ende salicheyt sal zijn, den ghenen die sinen naem vreesen. Hoort ^* ghi gheslachten, ende wie sal dat prijsen?

* th. wat die roede si, ende wie dat is, die haer vertelt Of sonden die ongoddelicke scatten, oft dat smael Epha daerdoor vertoorent wort, noch langer in des ongodliken huys bliuen oft soude ic die ongherechte wagheschale ende dat saxken metten valschen ghewicht steenen als suyuer achten

10

Noch isser vier int huys des ongodlijcken, schatten der boosheyt ende cleyn mate, vol des toorens,

11

Sal ick niet rechtueerdich maken die onrechte waghe, ende valsche ghewichte der saxkens?)

12

metten welcken haer rijcken veruult zijn met boosheyt, ende die daer in woonen, spraken lueghentale, ende haer tonghe was bedriechlijck in haeren mont.

13

Ende hierom heb ick v begonnen te slaen, met verderffenisse, om uwe sonden.

14

Ghy sult eten, ende niet sadt worden, ende ^* vernederinghe sal midden in v zijn.) Ende ghi sult aengrijpen, ende niet behouden, ende dat ghi behout, sal ick inden swaerde gheuen.

* the. het sal gramscap in v maken.

15

Ghi sult zayen, ende niet maeyen, Ghi sult die oliuen treden, ende niet met die olie smeren, ende den Most treden, ende den Wijn niet drincken.

16

Ende ghi hebt die ^* gheboden) Amri bewaert ende alle werc des huys Achab, ende ghi hebt in haeren ^* wellusten) ghewandelt, op dat ick v in verderffenisse gheuen soude, ende die daer in woonen, in een bespottinge, ende ghy sult den lachter mijns volcs draghen.

* the. zeden.

* h. voornemen.

§ Hoe die Propheet beweende datter so luttel ende weynich rechtuaerdige zijn. Hoe dat Ierusalem Verlost sal worden van Babilonien. Vanden herder Christo. Van der heydenen beschaemtheyt.