De Vorsterman Bijbel

§ Dat .ij. Capittel.

1

⁺BLaest in Sion metter trompetten, huylt op minen heylighen berch, Alle die inwoonders der aerden moeten verstoort worden, Want den dach des HEEREN coemt,

+ A

2

want den dach der duysternissen, ende des donckerheyts, den dach der wolcken, ende des onweders is na by nakende, Veel volcs ende starck, wtgespreyt, ghelijc den morgenstont, opten bergen, Vanden beginne en heeft niemant zijns ghelijc gheweest, Ende noch na hem gheen wesen en sal ^* tot inden iaren der geslachten ende totten geslachten)

* the. totten eewigen iaren nimmermeer.

3

Een verslindende vier salt zijn voor zijn aensicht, Ende achter hem een versenghende vlamme, ^* Als eenen hof der genoechten) was die aerde voor hem, ⁺ Ende na hem verlaten een woestijne Ende daer en is niemant, die hem ontulieden sal.

* th. ghelijck Eden

+ B

4

Haer aensicht is als dat aensicht der paerden, ende als paertrijders, so sullen si loopen,

5

Alst geluyt der waghenen op die hoofden der berghen, sullen si springhen, Als dat gheruysch der vlammen des viers verslindende die stoppelen, Als sterck volc bereyt totten strijde,

6

Van zijn aenscijn sullen die volcken ^* ghepijnt worden,) Ende alle aensichten sullen worden swart, ghelijck een podt.

* th. hen verscricken

7

Si sullen loopen als starcke, Ende sullen den

[p. V5v]

muer beclimmen, als mannen gheleert ten strijde, Dye mannen sullen ghaen in haere wegen, ende en sullen niet wijcken van haeren paden,

8

Niemant en sal sinen broeder drincghen, een yeghelijck sal wandelen in sinen wech, Ende si sullen door die vensteren vallen, ende en sullen nyet ghequetst worden.

9

Si sullen ^* gaen in) die steden, ende loopen op die mueren, ⁺ Si sullen beclimmen die huysen, ende inghaen door die vensteren als een dief,

* thebr. door rennen

+ C

10

Van zijn aenschijn heeft die aerde ghebeeft, die hemelen zijn beroert, Dye sonne ende dye mane zijn verdonckert, ende dye sterren hebben tot hen wederom ghetoghen haeren schijn,

11

Ende die HEERE heeft zijn stemme geheuen voort aenschijn zijns heyrs, want zeer vele zijn sine legheren, sterck zijn si doende zijn woort, Want groot is den dach des HEREN, ende zeer verscrickelijc, ende wie sal hem verdraghen?

12

Daeromme seyt die HEERE. Bekeert v tot my van al uwer herten, met vasten, ende met weenen, ende met clagen,

13

ende snijdt v herten, ende niet v cleederen, ⁺ Ende bekeert v totten HERE uwen God, want hi goedertieren ende barmhertich is, lancmoedich, ende van vele barmherticheden, ende milde om die boosheyt te vergheuen,

+ D

14

Wie weet oft hi bekeerde ende vergaue, ende liete na hem die gebenedijnge, tot ^* offerhande) ende vochtige offerhande den HEERE onsen Gode,

* h. spijsoffer

15

Blaest metter basoenen in Sion, heylighet een vasten roept die scaren,

16

vergadert dat volck, maect heylich dye verghaderinghe der gheloouiger, brengt die ouders bi een, vergadert die cleyn kinderkens, ende die die borst suyghen. Die bruydegom ga wt zijnder slaepcamere, ende die bruyt wt haer ^* slaepcamere)

* thek. voorhancsele

17

Tusschen dat portael ende den outaer sullen die priesteren weenen, die dienaers des HEREN, ende si sullen seggen, HEERE spaert v volc ⁺ ende en wilt niet gheuen v erffenisse tot lachter op dat die ^* natien) gheen heerscapie ouer hen hebben, Waerom salmen segghen onder den volcke, Waer is haer Godt?

+ E

* th. heidenen

18

Dye HEERE heeft zijn lant in castijnghe bemint, ende heeft zijn volc gespaert,

19

Ende die HEERE heeft geantwoort ende gheseyt sinen volcke, Siet, ick sal v seynden tarwe, wijn ende olie, ende ghy sult daer af veruult worden, ende ick en sal v niet meer tot lachter onder die heydens geuen,

20

Ende ick sal verre van v maken, den ghenen dye vant noorden is, ende ic sal hem verdriuen in een ^* woest lant, daer gheen weghen in en zijn) Sijn aensicht teghen dye ooste zee, ende zijn wterste, tot die leste zee. Ende sinen stanc sal op [kolom] climmen, ende zijn onreynicheyt sal op climmen om dat hi soo hoouaerdelijck gedaen heeft.

* th. dorre ende woest lant.

21

O aerde, en wilt nyet vreesen, verblijt v, ende zijt vrolijc, want die HEERE heuet groote gemaect, so dat hi dat doen sal,

22

Ende ghi beesten des ^* lants) en wilt niet vreesen, want die schoone landen der woestinen ^* hebben vruchten voort ghebracht, Want den boom heeft gebracht zijn vruchten, dye vijchboom, dye wijngaert hebben haer cracht ghegheuen,)

* theb. velts

* the. sullen vruchten voort brengen, ende die boomen haere vruchten, ende die vijchboomen ende wijnghaerden sullen haere vermuegen gheuen

23

Ende ghi ^* dochteren) van Sion verblijt v, ende zijt vrolijc inden HERE uwen God, want hy v heeft gegheuen eenen leeraer der rechtuaerdicheyt, Ende hi sal doen neder comen tot v reghen des morghens ende des auonts, ^* als int begin)

* th. ghi kinderen

* th. inde eerste maent

24

Ende dye coren huysen sullen worden veruult met tarwe, ende dye wijnperssen sullen oueruloeyen met ^* wijn) ende olie.

* theb. most.

25

Ende ic sal v weder geuen die iaren, die de sprinchanen gheten hebben, die kappers, die cruytwormen ende die rupsen, ⁺ mijn groote starcheit die ic v gesonden heb,

+ F

26

Ende ghy ^* etende sult eten) ende ghi sult sadt worden, ende ghy sult louen den naem des HEEREN ws Gods, die met v wonderlike dingen gedaen heeft, Ende mijn volc en sal niet bescaemt worden inder eewicheyt,

* thebre. sult genoech te eten hebben

27

Ende ghi sult weten dat ic ben int midden van Israel. Ende dat ic ben die HERE v God, ende niemant meer, ende mijn volc en sal niet beschaemt worden inder eewicheyt,

28

Ende het sal zijn na desen, dat ic sal wtstortten minen geest op alle vleesch, Ende v sonen ende v dochteren sullen propheteren, V ouders sullen droomen droomen, Ende v iongen sullen visionen sien,

29

Maer in dien dach sal ic ooc minen geest wt storten op mijn knechten, ende op mijn dienstmaechden.

30

Ende ic sal opter aerden, ende inden hemel veruaerlike teekenen gheuen, bloet ende vier, ende domp des roocs,

31

Dye sonne sal in duysternisse verandert worden, ende dye mane in bloet, eer dat den grooten ende veruaerlijcken dach des HEREN comen sal.

32

Ende tsal zijn, dat al die ghene dye den naem des HEEREN aenroepen, sal behouden zijn, Want opten berch van Sion, ende in Ierusalem sal verlossinge zijn, alsoo als die HEERE gheseyt heeft, ende aen den anderen, dye die HEERE ooc gheroepen heeft.

§ Van dat oordeel na die bekeeringhe. Hoe die sonne ende mane sullen verduysteren.