De Vorsterman Bijbel

§ Dat .xiiij. Capittel

1

⁺DAniel was des conincs dagelics tafel gesin, ende gheeert bouen alle zijn vrienden,

+ A

2

Ende by die Babyloniers was een afgod geheeten Bel, ende aen hem werden alle dagen te cost geleyt twaelf vaten bloemen elcke mate houdende drie mudden, ende veertich scapen, ende ses stoopen wijns,

3

Die coninc eerde dien afgod, ende diende hem ooc, ende hy ghinc alle daghen hem aenbidden, Maer Daniel aenbadt sinen God,

4

Ende die coninc seyde hem, Waeromme en aenbidt ghi Bel niet? Hi antwoorde, ende seyde tot hem, Want ick en aenbidde gheene afgoden met handen gemaect, Maer den leuenden Godt, die welcke hemel ende aerde gheschapen heeft, ende heeft macht ouer alle vleesch.

5

Doen seyde die Coninc tot hem, En dunct v niet, dat Bel een leuende God is? Ofte en siet ghi niet wat hi dagelicx etet ende drincket?

6

⁺Ende Daniel seyde al lachende, Coninck en dwaelt niet. ⁺ Want dese is binnen leemich, ende van buyten metalen, noch hi en etet niet tot eenigher tijt,

+ B

+ Eccl. xxx.c

7

Ende die coninc wert gram, ende riep zijn priesters, ende hi seyde hen, Het en si dat ghi mi segget, wie dese is, die desen cost etet, so sult ghi steruen

8

maer ist dat ghi toont dat Bel alle dese dingen etet, soo sal Daniel steruen, want hy heeft in Bel gheblasphemeert, Ende Daniel seide den coninc, Het geschiede also na uwen woorden.

9

Die priesters Bel waren tseuentich, wt genomen die huysurouwen, die cleyne, ende die kinderen.

⁺ Ende die coninc quam met Daniel in Bels tempel,

+ C

10

Ende Bels priesters seyden, Siet, wy sullen buyten gaen, ende heer ghi coninc, sedt die spijse, ende menget wijn, ende sluytet die duere, ende besegheltse met uwen rinc,

11

Ende ist dattet niet al van Bel gegeten en is, des morgens als ghi daer in coemt, so sullen wi steruen oft Daniel, die teghen ons gheloghen heeft,

12

Si betrouden, want si hadden onder die tafel eenen verborgenen inghanc ghemaect, ende door dien ghingen si altoos in, ende verslonden dat.

13

Aldus ist geschiet, na dien dat si wtghe-[kolom]gaen waren, ende die coninc settede spijse voor Bel, so geboot Daniel sinen knapen, ende si brochten asschen, ende hi siftese ouer alle den tempel, voor den Coninc, ende si ghinghen wt, ende sloten dye duere, ende segheldense met des conincs rinck, ende si gingen wech,

14

Maer die priesteren ginghen daer snachts inne, na haer ghewoonte, ende haer huysurouwen, ende haere kinderen, ende si atent altemale, ende dronckent.

15

⁺Die coninc stont smorgens vroech op, ende Daniel met hem,

+ D

16

ende die coninc seyde, Daniel, en zijn die seghelen niet gants ende gheheel? Hi antwoorde, Here coninc, si zijn gants ende geheel,

17

Ende ter stont als hi dye duere opgedaen had, sach die coninc die tafel aen, ende riep wt met luyder stemmen, Bel, ghi zijt groot, ende bi v en is gheen bedroch,

18

Ende Daniel lachte, Ende hielt den coninc, dat hi nyet binnen en soude gaen, ende seyde, Siet dat plaueytsel, aenmerct, wiens voetstappen dattet zijn,

19

Ende die coninc seide, Ic sie voetstappen der mannen, ende wiuen, ende ionger kinderen, Ende die coninc wert gram,

20

Ende greep die priesteren ende haer huysurouwen, ende haer kinderen, ende si thoonden hem dye verborgen duerkens, door welcke si inghinghen, ende verteerden tghene dat op dye tafel was,

21

Hieromme soo doodese die coninc, ende hi leuerde Bel in Daniels macht, dye hem ende sinen tempel om werp.

22

⁺Ende in dye plaetse was eenen grooten draeck, ende die Babyloniers dienden hem

+ E

23

Ende die coninc seyde tot Daniel, Siet, nv en cont ghi niet geseggen, dit en is een leuendige god, Hieromme aenbidt hem,

24

Ende Daniel seyde totten coninck, Ick aenbidde den HERE minen Godt, want hi is een leuendighe God, Maer dit en is gheen leuendige godt,

25

Maer heere coninc, geeft ghi mi die machte ick sal den draeck sonder swaert oft stoc dooden, Ende die coninc seyde, Ick gheue v dye machte,

26

Doen nam Daniel peck ende ruet, ende har, ende hi soodt dat te gader, ende hi maectese tot clompen ende gaft inden mont des draecs ende die draeck berstede, Ende Daniel seyde Siet, wien ghy diendet,

27

Doen die Babyloniers dat hoorden, zijn si seer verbolgen, ende vergadert zijnde teghen den coninc, seyden si, Die coninc is een Iode geworden, Hi heeft Bel verdoruen, ende hi heeft den draeck gedoot, ende die priesters doot geslagen.

28

⁺Ende als si totten coninc quamen, seyden si, Leuert ons Danielem, ofte anders sullen wi v dooden, ende v huys,

+ F

29

Dye coninc sach, dat si toornichlijc op hem vielen, ende mits

[p. V1v]

nootsakelicheyt bedwongen, leuerde hi hen Danielem,

30

Dye welcke hem inden cuyl der leeuwen sonden, Ende hi was daer ses dagen,

31

In dien cuyl waren seuen leeuwen, ende hen werden dagelicx twee lichamen, ende twee schapen gegeuen, ende doen en zijnder hen gheen gegeuen, op dat si Danielem verslinden souden.

32

Doen was Abacuck een propheet in dat Ioetsche lant, ende hi hadde eenen bry gecooct, ende hi hadde broot in een schotel ghebrocket, ende hi ghinck opt velt, dat hijt soude den maeyers draghen,

33

Ende die Enghel des HEEREN seyde tot Abacuck, Draecht die spijse, die ghi hebt in Babylonien Danieli, die inden cuyle der leeuwen is.

34

Ende Abacuk seyde, Heere, ic en heb Babylonien nyet ghesien, ende ick en wete den cuyl niet,

35

Ende die Enghel des HEEREN greep hem bi sinen toppe, ⁺ ende hi droech hem biden hare zijns hoofts, ende hi settede hem in Babilonien, opten cuyle, inden ghedruysche zijns gheests,

+ G

36

Ende Abacuk riep, seggende, Daniel, knecht Godts, neemt die spijse, dye v God ghesonden heeft,

37

Ende Daniel seyde, God ghi hebt mijns gedacht, ende ghi en hebtse niet verlaten, die v lief hebben.

38

Ende Daniel stont op, ende adt, Ende die Engel des HEEREN stelde Abacuk ter stondt weder in zijn plaetse,

39

Aldus quam die coninc opten seuensten dach, dat hi Danielem soude beweenen ende hi quam totten cuyle, ende sach daer inne, ende siet, Daniel sadt int midden der leeuwen,

40

Ende die Coninc riep wt, met luyder stemmen, segghende, HERE, Daniels Godt, ghi zijt groot, Ende hi track hem wten cuyle der leeuwen,

41

Maer die die saecke zijnder verderffenissen hadden gheweest, liet hi binnen inden cuyle, ende si zijn in eenen oogenblick voor hem verslonden,

42

^* Doen seyde die coninc, Alle dye daerde bewoonen, moeten Daniels Godt schroemende, vreesen, Want hi is die behouder ende verlosser, doende teekenen ende wonderlicheden inden hemel, ende inder aerden, die Danielem vanden cuyle der leeuwen verlost heeft.)

* Ten is niet int griecx.

§ Hier eyndet die Propheet Daniel.

§ Hier na volghen die twaelf cleyn Propheten.