De Vorsterman Bijbel

§ Dat .xij. Capittel.

1

⁺INden tijt sal opstaen Michael, die groote prince, die voor die kinderen ws volcs staet, ende ^* den tijt) sal comen des ghelijck niet en heeft geweest vanden tijt dattet volc heeft geweest tot dien tijt toe, Ende in dien tijt sal v volc worden behouden, alle die gene die beuonden sal zijn inden boec gescreuen.

+ A

* th. eenen tijt des drucs.

2

Ende veel vanden genen die daer slapen int stof der aerden sullen wacker worden, die zommige totten eewigen leuen, ende zommige tot die eewige bescaemtheyt ^* op dat si altijt sien mogen,)

* th. ende verdriet

3

Ende die daer geleert sullen zijn, sullen blincken als de claerheyt des firmaments, ⁺ ende die daer leeren tot rechtueerdicheyt veel menscen, ghelijc die sterren in die eewighe eewelicheyt.

+ B

4

Ende ghi Daniel sluytet die woorden, ende teekent den boec totten ^* gesetten) tijt, Vele sullen daer voor bi gaen, ende die const sal menigerhande zijn.

* th. laetsten

5

Ende ic Daniel hebt gesien, ende siet, gelijc twee ander stonden daer, die eene aen die een side vander riuieren, ende dander aen dander side vander riuieren

6

Ende ^* ic seide) totten man, die gecleet was metten linen cleederen, die daer stont opt water der riuieren, Tot wat tide sal zijn deynde deser

* the. deene seyde.

[p. T8r]

wonderliker dingen?

7

⁺Ende ic hoorde den man die met linen cleederen gecleet was, die opt water der riuieren stont, doen hi zijn rechte hant ende zijn slincke hant hadde opgeheuen ten hemele, ende hadde gesworen bi den leuenden inder eewicheyt, dattet sal eenen tijt, twee tijden, ende eenen haluen tijt vertrecken, Ende als veruult sal zijn die verstroeyinghe der hant des heylichs volcks, soo sullen dese dinghen altesamen worden volbracht.

+ C

8

Ende ic hoordet, ende ic en verstonts niet, ⁺ Ende ick seyde, Mijn Heere, wat salt zijn na dese dingen?

+ D

9

ende hi seyde, Gaet Daniel, want die woorden zijn ghesloten ende besegelt totten ^* ghesetten) tijt,

* th. laetsten

10

Daer sullender ^* worden wtuercoren ende gewit, ende vele sullender worden geproeft als een vier,) Ende die ongodlike sullen ooc ongoddelijc doen, ende alle die boose en sullens niet verstaen, Maer die geleerde, sullent verstaen.

* th. vele dit beghinnen te pureren ende te verclaren

11

Ende vanden tijt aen, dat afgedaen sal zijn die dagelicsche offerande, ende die afgriselike onmenschelicheyt sal ghestelt zijn tot een verwoestinge, duysent, tweehondert ende tnegentich dagen wesen.

12

Salich is hi die verbeyt ende is gecomen, tot duysent, driehondert, ende xxxv. dagen

13

Maer ^* ghi Daniel, gaet totten gesetten), ende ghi sult rusten, ende ghi sult staen in uwe lot, totten eynde der daghen.

^* Tot hier toe heb ic Daniel inden hebreeuscen boec geuonden, Dander datter na volcht totten eynde des boecs is van Theodosions wtlegginghe ouergheset.)

[afbeelding]

* h. ghi gaet tot dattet wt is.

* S. Ieronimus woorden.

§ Vanden twee ouders die welcke met begheerten waren beuaen tot Susannam, Ende werden veroordeelt door Daniel den ionghelinck.