De Vorsterman Bijbel

§ Dat .xliij. Capittel.

1

⁺ENde hi leyde mi wt der poorten dye ten weghe na den oosten sach,

+ A

2

ende siet, dye heerlicheit Gods van Israel ghinc in, door den wech des oosten, ende hi hadde een stemme als een gheruysch van veel wateren, ende die aerde glinsterde van zijnder ^* mogentheyt)

* h. heerlicheyt

3

Ende ic sach dat visioen, na dye ghedaente, die ick ghesien hadde, als hy quam, om dye stadt te verderuen, ende zijn ghedaente na dat aensien, dat ick neffens dye ryuiere Chobar [kolom] ghesien hadde, Ende ic viel op mijn aensicht,

4

⁺Ende des HEREN ^* mogentheit) ginc inden tempel, door den wech der poorten, dye ten oosten sach,

+ B

* th. heerlicheyt

5

Ende die ^* geest) hief mi op, ende bracht mi in die binnenste zale, ende siet, dat huys wert veruult van die heerlicheyt des HEREN,

* th. wint

6

Ende ic hoorde hem wt den huyse tot mi spreken ende die man die neffens mi stont,

7

seyde tot mi, Des menschen sone, dit is die stat mijns coninclijcs stoels, ende die stadt der ^* voetstappen) mijnre voeten, daer ic int midden der kinderen van Israel woone inder eewicheit Ende dat huis van Israel en sal minen heylighen naem voort meer niet ontheyligen, si ende haer coninghen, door haere oncuyscheden, ende door haerder coninghen ^* vallen) ende door die hoochten

* th. voetsolen

* theb. doode lichamen

8

die si gemaect hebben haeren dorpel neffens den minen, ende haer posten neffens die mine, ende tusschen haer ende mi was eenen muer, Ende si besmette den minen heilighen naem, door haer onmenscelike afgriselicheden, die si deden. Ende hierom heb icse in mijnder gramschap verteert

9

Nv hierom so laetse wechdoen haer oncuysheit, ende haerder coningen ^* vallinge) verre van mi, ⁺ ende ic sal altoos int midden van hen woonen,

* theb. doode lichamen

+ C

10

Hierom ghi des menschen sone, thoont den huyse van Israel den tempel ende laetse bescaemt worden, van haeren ^* quaetheden) Ende laet hen dat gestichte meten,

* th. misdaden

11

ende laetse hen schamen, van al dat ghene dat si ghedaen hebben, Thoont hen dye figuere vanden huyse, ende zijn ghestichte, vanden inghanghe, ende den wtghanck, ende al des huys bescriuinghe, ende al sine geboden, ende al sine ordinancie, ende alle zijn wetten, ende ghi sullet voor haeren ooghen bescriuen, Op dat si zijn bescriuinghe, ende zijn gheboden bewaren, ende doen moghen

12

Dit is die wet des huys opten toppe vanden berghe, Alle zijn eynden rontsomme, het is dat alderheylichste der heyligher dinghen Dit is dan die wet vanden huyse.

13

Dit zijn die maten vanden outaer, na den alderwarachtichsten Cubitus, die een cubitus, ende een ^* palme) hadde.

⁺ In sinen ^* schoot was een cubitus, ende een cubitus in dye breede, ende dye eyndinghe tot sinen boorden, ende rontsomme hem een palme), Dat was oock die ^* gracht) des outaers.

* th. dwaerse hant.

+ D

* the. die gront was een cubitus diep ende wijt, ende zijn lijsten die rontsom gingen waren een spanne breet

* th. hoochte.

14

Ende vanden bodem der aerden totten laetsten sarcsteen waren twee cubitus, ende die breede van een cubitus, vanden meesten sarcsteen totten minsten, waren vier cubitus, ende die breede was een cubitus.

15

Ende ^* dat opperste deel vanden

* th. Ariel. § Ariel is dopperste stuc aenden outaer, op duytsce een stercke leeu daer af is de stadt Ierusalem Ariel genaemt Esa. xxix.

[p. S5r]

outaer) was van vier cubitus, ende vanden ^* oppersten deel vanden outaer) tot bouen waert, vier hoornen.

* the. Ariel

16

Ende dat wterste deel vanden outaer hadde .xij. cubitus. in die lengde, ende .xij. cubitus in die breede, Ende hi was viercantich met geliken zijden,

17

Ende den sarcsteen hadde .xiiij. cubitus in die lengde, ende .xiiij. cubitus in die breede in zijn vier hoecken, Ende om den outaer was een crone van een halue cubitus, ende haren ^* schoot) was van een cubitus rontsom, Maer zijn trappen waren gekeert ten oostenwaert.

* the. gront

18

⁺Ende hi seyde tot mi.

Des menschen sone, Dit seyt ^* God de HERE) Dit zijn die maniere des outaers, so in wat dage dat hy ghemaect sal zijn, datmen daer op brantofferen offere, ende dat bloet daerop ^* storte)

+ E

* th heerscappende here

* th sprenge

19

Ende ghi sult den priesteren geuen, ende den Leuiten die van Sadochs zade zijn, die tot mi toe gaen, seyt dye ^* HEERE God) dat si mi offeren sullen een calf vanden coeyen, voor die sonde,

* th. heerscapende here

20

Ende nemende van sinen bloede, sult ghijt ^* legghen) op die vier hoornen vanden outaer, ende op die vier hoecken vanden sarcsteene, ende op die crone al omme, ende ghy sult dien suyueren, ende versoenen,

* the sprengen

21

Ende ghy sult dat calf nemen dat gheoffert is voor die sonde, ende ghi sult dat verbernen in een verscheyden plaetse vanden huyse, buyten dye heylighe plaetse.

22

⁺Ende inden tweeden dach suldy offeren eenen bock vanden gheyten onbesmet, voor die sonde, ende si sullen den outaer suyueren, also si gesuyuert hebben metten calue,

+ F

23

Ende als ghi voldaen hebt den outaer suyuerende, soo sult ghi offeren een onbesmet calf vanden coeyen, ende eenen onbesmetten ram vander cudden,

24

ende ghy sultse offeren in des HEREN aenscouwen, ende die priesters sullender soudt op worpen, ende si sullense offeren den HERE tot een brantoffere

25

Seuen daghen suldi elcs daechs doen eenen bock, voor die sonde, ende ooc een calf van die coeyen, ende eenen ram vanden vee onbesmet sullen zijse offeren.

26

Seuen daghen sullen si den outaer versoenen ende die suyuer maken, ende si sullen zijn hant vullen.

27

Ende als dye daghen voldaen zijn, inden achsten dach, ende voort aen sullen die priesters opten outaer, uwe brantofferen maken, ende die si offeren voor den vrede, ende ghi sult mi aenghenaem zijn, seyt die ^* HEERE God.)

* th. heerscapende here

§ Van die gesloten poorte. Ende dat die onbesnedene in dye heylige plaetse niet comen en souden. Vander Leuiten heylicheyt ende erflicheyt.