De Vorsterman Bijbel

§ Dat .xxix. Capittel.

1

⁺IN thienste iaer, ende in die .x. maent, in ^* eenen) dach van dier maent, so gheschiede des HEREN woort tot mi, seggende,

+ A

* the. den .xij.

2

Des menschen sone, sedt v aensicht tegen Pharaonem den coninc van Egypten, ende ghi sult van hem propheteren, ende spreect van gheheel Egypten,

3

ende segt, Dit seyt die ^* HEREE God) Siet, ick spreke tot v Pharao coninck van Egypten, groote draeck, die daer ligt in de middewaert van uwer riuieren, ende ghi segt ⁺☞ Die ryuiere is mijn, ende ic heb mi seluen ghemaect,

* h. heerscappende here

+ B

4

Ende ick sal eenen breydel in uwe wanghen doen, ende ic sal vergaderen die visschen van uwen riuieren met uwe scellen aen eenen hoop, Ende ick sal v wt trecken vant midden van uwen ryuieren, Ende al uwe visschen sullen cleuen aen uwe scellen,

5

Ende ic sal v wech worpen in die wildernisse, ende al die visschen uwer ryuieren sullen vallen opt aensichte des lants, Ghi en sult niet opghenomen noch verghadert worden. Ic heb v ghegheuen, om te verslinden, den beesten vander aerden ende den vogelen des hemels,

6

ende al die in Egypten woonen, sullen weten dat ick die HEERE ben, Om dat ghi waert een ryeten stoc den huyse van Israel,

7

Als si v begrepen metter hant, So zijt ghi gebroken, ende hebt verscoert al haer ^* scouderen) Ende als si op v leenden, so braecty, ende ghi ontsloot alle haer lendenen,

* the. die side

8

Daerom seyt dit die ^* HEERE God) ⁺ Siet, ick sal tswaert op brengen, ende ick sal verslaen van v, die menschen ende die beesten,

* h. heerscappende here

+ C

9

Ende dat lant van Egypten sal zijn verwoest ende een wildernisse, ende si sullen weten, dat ic die HEERE ben, Om dat ghi geseyt hebt, die ryuiere is mijn, ende ic maecte haer

10

hierom siet, ick wil tot v, ende uwen ryuieren Ende ick sal dat lant van Egypten in wilder-[kolom]nissen gheuen, verwoest metten swaerde, vanden torren Syenes, tot den pale van Mooren lant,

11

Door Egypten en sal gheens menschen voet ouer gaen, noch gheens beesten voet en salder door gaen, ende si en sal niet bewoont worden in veertich iaer.

12

Ende ic sal dat lant van Egypten woest geuen, in die middewaert vanden verwoesten landen, ende haer steden in die middewaert vanden steden, die om gheworpen zijn, Ende si sullen verwoest zijn veertich iaer, ⁺ Ende ick sal die van Egipten verstroyen inden ^* nacien) ende ick salse ^* waeyen) inden landen.

+ D

* h. heydenen

* thebr. verstroyen

13

Want dit seyt die ^* HERE God) Na dat eyde van vrertich iaren, sal ick Egypten vergaderen vanden volcken daer si in verstroyt waren,

* h. heerscappende here

14

ende ick sal die ^* geuanghenisse) wederbrengen van Egypten, ende ic salse setten in dat lant Phatures, in dat lant haerder gheboorten, ende daer sullen si, zijn in een vernedert rijcke,

* th. gheuanghene

15

ende het sal onder dander rijcken, dat cleynste zijn. Ende si en sal voortmeer niet verheuen worden bouen den ^* nacien) Ende ic salse verminderen, dat si gheen heerscappie hebben en sullen, bouen die heydenen,

* h. heydenen

16

Ende si en sullen voortmeer den huyse van Israel niet zijn in betrouwen ^* boosheyt) leerende, op dat si vlieden ende hen volgen sullen, Ende si sullen weten, dat ic die ^* HERE God) ben.

* h. misdaet

* h. heerscappende here

17

Ende tgheuiel inden .xxvij. iare, in die eerste maent, inden eersten dach vander maent, dat gesciede des HEREN woort tot mi seggende,

18

Des menschen sone, Nabuchodonosor die coninck van Babilonien, heeft zijn heyr doen dienen metten grooten dienst tegen ^* Tyrum.) Alle hooft is caluwe gheworden, ende alle schoudere is bloot van hare, Ende hem en is gheenen loon ghegheuen, noch sinen heyre, van ^* Tyro) voor den dienst daer si mede ghedient hebben teghen haer.

* thebr. Zor

* thebr. Zor

19

Hierom seyt die ^* HERE God) Siet, ic sal Nabuchodonosor den coninck van Babilonien geuen in dat lant van Egypten, ende hi sal nemen haer ^* menichte,) ende hi sal haer dooder cleederen roouen, ende roouen haeren roof, ende dien heyre salt een loon zijn,

* h. heerscappende here

* theb. haue

20

ende den wercke, daer hi mede diende tegen ^* Tyrum.)

Ende ic heb hem ghegheuen dat lant van Egipten, om dat hi mi gearbeyt heeft, seyt die ^* HEERE God.)

* thebr. Zor

* h. heerscappende here

21

In dien dach sal den horen des huys van Israel wt spruyten, ende ic sal v geuen eenen openen mont in die middewaert van hen, ende si sullen weten, dat ic die HERE ben.

§ Hier wort verhaelt, dat Egypten verdoruen wert, ende haer steden, ende die steden met haer verbonden vallen oock.