De Vorsterman Bijbel

§ Dat .vi. Capittel.

1

⁺ENde des HEREN woort gesciede tot mi seggende,

+ A

2

Des menscen sone, set v aensicht ten bergen van Israel waert, ende ghi sult tot hen propheteren,

3

ende seggen, Bergen van Israel, hoort des ^* HEREN Godts) woort

Dit seyt die ^* HEERE God) den bergen ende die hueuelen, den ^* rootscen,) ende den valeyen Siet, ic sal op v inbrengen dat swaert, ende ic sal v hoochten verderuen,

* h. heerscappende here

* h. heerscappende here

* the. beken

4

ende ic sal ^* omworpen) uwe altaren, ende uwe afgoden sullen worden gebroken Ende ic sal uwe verslagen voor uwe afgoden vellen,

* th. verwoesten

5

⁺Ende ic sal die doode lichamen der kinderen van Israel geuen, voor dat aensicht van uwen afgoden, Ende ic sal v beenen verstroeyen omtrent uwen altaren,

+ B

6

In alle uwen wooningen, die steden sullen woest zijn, ende die hoochten sullen wtgeworpen worden ende ^* verstroeyt. Ende uwe altaren sullen te niete gaen, ende tsamen worden gebroken, ende v afgoden ophouden, ende v tempelen sullen gebroken worden) ende v wercken sullen wtghedaen worden,

* h verwoest ende ontheylicht sullen uwe altaren worden ende uwe goden gebroken ende te niete gemaect worden

7

ende die ver-

[p. Q2v]

slaghen sal vallen int midden van v, ende ghi sult weten, dat ic die HERE ben.

8

⁺Ende ic sal onder v laten ouerbliuen die gene die den zwaerde ontuloden zijn onder die heydenen, als ic v inden lande verstroeyt sal hebben,

+ C

9

☞ Ende v verloste sullen mijns gedencken, onder den heydenen, totten welcken ghi geuangen geleyt sult worden, Want ic heb haer hoerich herte, dat van mi geweken is, ende haer hoerige oogen die na haer afgoden gesien hebben gebroken, ende si sullen hen seluen mishaghen, op dat quaet dat si gedaen hebben in allen haeren onmenschelijcke afgrijselicheden,

10

ende si sullen weten dat ic die HEERE, niet te vergeefs gesproken en heb, ☞ dat ic hen dit quaet doen soude.

11

Dit seyt die ^* HERE God) Slaet uwe hant ende stampt met uwen voet, ende segt, Wee, ouer allen afgrijselicheden, van des huys van Israels quaden wercken, want si vallen moeten door tswaert honger, ende pestilencie.

* h. heerscapende here

12

Die verre is sal steruen van die pestilencie, ende die bi is, die sal doort swaert vallen, ende die ouerbleuen zijn sal ende beleghen, die sal van honger steruen, Ende ic sal mijn gramschap in hen luyden voleynden.

13

Ende ghi sult weten dat ic die HERE ben, als v verslagene sullen zijn in die middewaert van uwen afgoden, rontsom van uwen altaren, op elcken hooghen hueuele, ende in allen hoocheden vanden bergen, ende onder elc ^* bosch hout, ende onder al geloouerde eycken) ende in die plaetsen, daer si verbranden alle haeren afgoden, welrieckende wierooc.

* the. groen boom ende dicke linden

14

⁺Ende ic sal mijn hant wtsteken op hen, ende ic sal tlant maken woest ende verlaten, vander wildernissen tot Deblata toe, in alle haeren wooningen, Ende si sullen weten, dat ic die HERE ben.

+ D

§ Van die geduericheyt der gheuanckenissen, ende die sake des selfs, Ende van Godts toornicheyt tegen dat volc