De Vorsterman Bijbel

§ Dat .v. Capittel.

1

⁺ENde ghi des menschen sone, neemt v een scharp swaert dat haer scheert, ende ghi sult dat nemen, ende doent gaen ouer v hooft ende ouer uwen baert, ende ghi sult v nemen een wageschale, ende ghi sullet deylen.

+ A

2

Dat derdendeel sult ghi verbranden metten vier, int midden vander stadt, na dat voldoen der dagen vander belegginge, Ende ghi sult nemen dat ander derdendeel, ende slaent intwee metten swaerde, al rontsom haer, Maer dander derdendeel sult ghi spreyen inden wint, ende ghi sult dat swaert na hen wter sceyden trecken.

3

⁺Ende ghi sult daer af nemen een cleyn ghetal, Ende ghi sult dat binden aen dat hoochste eynde van uwen mantel,

+ B

4

Ende ghi sullet daer af weder nemen ende worpent int midden vanden viere, ende ghi sullet metten vier verbranden, ende daer wt sal vier comen in alle thuys van Israel.

5

Dit seyt die HEERE, Dit is Ierusalem, In die middenwaert vanden heydenen heb icse gheset, ende rontsom haer dat lant.

6

Ende si heeft mijn oordeelen versmaet, dat si ongoddelijcker was, dan die heydenen ende versmade mijn gheboden meer, dan die landen die al om haer zijn. Want si hebben mijn oordeelen verworpen, ende en hebben niet gewandelt in minen geboden.

7

Hierom seyt die HEERE Godt. ☞

⁺ Om dat ghi die heydenen die om v zijn, te bouen gegaen hebt, ende in mijn ^* geboden) niet gewandelt en hebt, ende ghi mijn oordeelen niet gehouden en hebt, ende om dat ghi niet gedaen en hebt nader heydenen oordeelen die om v zijn,

+ C

* th. zeden

8

Hierom seyt dit die HERE, Siet, ic segge tot v, ende ic selue sal int middel van v oordeel doen, inder heydenen oogen,

9

ende ick sal met v doen dat ic niet gedaen en heb, ende dat ic dien dingen gelijcke nimmermeer doen en sal, om alle v onmenschelijcke afgriselicheden.

10

Hierom so sullen int midden van v die vaderen haer eygen kinderen eten, ende die kinderen sullen haer eygen vaderen eten, Ende ic sal v oordeel doen, ende ick sal alle uwe ouerbleuenen wannen in allen winden,

11

^* Hierom leue ic, seyt die HEERE God, Maer ten si) om dat ghi mijn heylige plaetse ontheylicht hebt met allen uwen ^* argernissen) ende in allen uwen onmen-[kolom]schelijcke afgriselicheden, so sal ic ooc breken ende mijn ooge en sal niet sparen, ende ic en sal niet ontfermen.

* h. So waer als ic leue seyt de heerscappende heere.

* h. afgoden

12

Dat een derdendeel van v sal vander pestilencie steruen, ende worden verteert int midden van v van honger, ende dat ander derdendeel van v sal metten swaerde vallen rontsom v, Maer dander derdendeel van v sal ic stroyen in allen winden, ende ic sal tzwaert wter scheyden trecken na hen.

13

Ende ic sal mijn gramscap volbrengen, ende ick sal doen rusten minen toorn aen hen, ende ic sal vertroost worden, Ende si sullen weten, dat ict die HERE gesproken heb in mijnen toorn, als ic alle mijn gramschap in hen volbracht sal hebben,

14

Ende ic sal v geuen tot verwoestheyt, ende in verwijte, ende in lachtere den heydenen die om v zijn, in den aenscouwen alle des genen, die voorbi v gaen sal.

15

⁺Ende ghi sult zijn lachter ende versmaetheyt exempel ende verwonderen onder den heydenen die om v zijn, als ic v gedaen sal hebben oordeel in mijnen toorn, ende in mine gramscap, ende in berispinge van gramscappen,

+ D

16

die ic v HERE heb gesproken, als ic scieten sal in hen die alre quaetste gescutten van honger, die dootlijck sullen zijn, ende die ic schieten sal om v te verstroeyen. Ende ick sal den honger op v vergaderen, ende ick sal in v breken den stock des broodts,

17

Ende ic sal den honger in v seynden, ende die alderquaetste beesten ^* tot der verderffenissen) Ende de pestilencie, ende ^* dat bloet) sal door v gaen, ende ic sal dat swaert op v in brengen. Ic die HEERE, hebt gesproken

* th. die v sonder erfghenamen maken sullen

* h bloetstortinghe

§ Van die plage die den volcke comen soude om der afgoderijen wille.