De Vorsterman Bijbel

§ Dat .iij. Capittel.

1

⁺ENde hi seyde tot mi, Des menschen sone al wat ghi vint dat eet, Eedt desen boec ende gaet, ende spreect totten ^* kinderen) van Israel [kolom]

+ A

* th. huyse

2

Ende ic ontdede minen mont ende hi spijsde mi met dien boec,

3

Ende hi seyde tot mi, Des menschen sone dinen buyc sal eten, ende uwe ingewande sullen veruult worden met desen boec, dyen ic v geue. ⁺ Ende ic adt dien boec, ende hi wert in minen mont soet gelijc honich,

+ Apo. v.d.

4

ende hi seyde tot mi

Des menschen sone, gaet totten huyse van Israel, ⁺ ende ghi sult mijn woorden tot hen spreken

+ B

5

Want ghi en wort niet gesonden totten volcke van dieper redenen, ende van onbekender tongen, maer ghi sult gesonden worden totten huyse van Israel,

6

Noch ooc en sult ghi niet gesonden worden tot veel volcs van dieper redenen, ende van onbekender tongen, welcker redenen ghi niet en sult mogen hooren. Ende waert ghi tot dien gesonden, si souden v hooren

7

Maer dat huys van Israel en wilt v nyet hooren, Want si en willen mi niet hooren, want alle dat huys van Israel is van doorwreuen voorhoofde ende van harder herten.

8

Siet, ic hebbe v aensichte gegeuen starker dan haer aensichten, ende v voorhooft harder dan haer voorhoofden,

9

⁺ende ic heb v aensicht gegeuen gelijc een adamant ende een key, En ontsietse niet noch en vreest v niet van haeren aensichte, want tis een wederspannich huys

+ C

10

Ende hi seyde tot mi, Des menschen sone alle mine redenen die ic tot v spreke, neemt aen in v herte ende hoortse met uwen ooren,

11

ende gaet ende gaet henen ^* totter oueruoeringe) totten kinderen van uwen volcke, ende ghi sult tot hen spreken, ende seggen hen, Dit seyt die ^* HERE God, oft zijt bi auentueren hooren ende rusten)

* th. toten geuangenen

* thebr. heerscappende. HEERE tsi si volgent oft latent.

12

Ende die geest nam mi op, ende ic hoorde achter mi dat geluyt eenre groter beroeringe, die seyde, Gebenedijt si des HEREN heerlicheyt van zijnre plaetsen,

13

Ende ic hoorde dat geluyt vander dieren vlogelen, die si sloegen den eenen vlogel aenden anderen, ende dat geluyt vanden raderen dien die dieren volchden ende dat geluyt eenre grooter beroeringe

14

Ende een ^* geest) hief mi oock op, ende nam mi met hem, ⁺ ende ic ghinck wech droeuich, in die gramscap mijns gheests, Want des HEEREN hant was met mi starckende mi.

* th. wint.

+ D

15

Ende ic quam ^* totter oueruoeringe) tot den hoop der nieuwen vruchten, tot dien, die woonden neuen die riuiere, Chobar ende ic sadt daer die saten, ende ic bleef daer seuen dagen truerende in die middenwaert van hen luyden,

* th. totten geuangenen

16

Ende doen seuen dagen ouerleden waren, so ghesciede des HEEREN woort tot mi ende seyde.

17

Des menschen sone, ick hebbe v tot eenen wachter gestelt den huyse van Israel, ⁺ ende ghi sult dat woort hooren van minen monde ende ghi sult dat hem bootscappen ^* wt mi)

+ E

* th. van minentwegen.

18

Ist

[p. Q1v]

dat ic totten ongoddelijken segge, ghi sult dye doot steruen, Ende en waerscout ghijt hen niet, ende en segdijt hem niet, dat hy bekeert worde van sinen quaden wege, dat hi leuen mach, so sal die ongoddelike steruen in zijn ^* boosheyt) maer ic sal zijn bloet eysschen van uwer hant.

* h. misdaet

19

Maer ist dat ghi den ongoddelijcken waerschout, ende hi niet bekeert en worde van zijnre ongoddelijcheyt, ende van sinen quaden weghe, so sal hi in sine ^* boosheyt) steruen maer ghi hebt v siele verlost.

* h. misdaet

20

Maer ist ooc dat een rechtuaerdige hem keert van zijnre rechtuaerdicheyt, ende onrechtuaerdicheyt doet, soo sal ick een letsele voor hem setten, Hi sal steruen Want ghi en hebbet hem niet vercondicht, In zijn sonden sal hi steruen, Ende zijn rechtuaerdicheden die hi gedaen heeft, en sullen in gheen gedenckenis zijn maer zijn bloet sal ic eyschen van uwer hant.

21

⁺Ende ist dat ghijt den rechtuaerdigen waerscout, dat die rechtuaerdige niet en sondige ende en sondicht hi niet, leuende, sal hi leuen, want ghi seydet hem, Ende ghi hebt v siele verlost.

+ F

22

Ende des HEREN hant wert daer op mi gedaen, ende hi seyde tot mi, Staet op ende gaet wt opt velt, ende daer sal ic met v spreken.

23

Ende ic stont op, ende ghinc opt velt, ende siet, daer stont des HEEREN heerlicheyt, gelijc die heerlicheyt die ic sach neuen die riuiere Chobar, Ende ic viel op mijn aensicht.

24

Ende eenen ^* gheest quam in mi,) ende stelde mi op mijn voeten, ende hi sprack tot mi, ende seyde tot mi, Gaet in, ende besluyt v int midden van uwen huyse.

* theb. wint quam aen mi.

25

⁺Ende ghi des menschen sone, siet, op v zijn ghegeuen banden, ende si sullen v daer mede binden, ende ghi en sult niet wtgaen in die middewaert van hen luyden,

+ G

26

ende ic sal v tonge doen cleuen bouen aen uwen mont, ende ghi sult stom zijn, ende niet gelijc een berispende man, Want tis een wederspannich ^* huys)

* th. ghesin

27

Ende als ic tot v spreken sal, so sal ic uwen mont op doen, ende ghi sult tot hen seggen, Dit seyt die ^* HERE God) Die hooret, die hoore, ende die rust, ruste, want tis een wederspannich huys)

* h. heerscappende here

§ Vanden steen daer geheel Ierusalem op bescreuen wert Ende van dat belegge, Ende van die geduricheyt des selfs belegs, Ende van die dierte