De Vorsterman Bijbel

§ Dat .iiij. Capittel.

1

⁺DIt is dat boec der gheboden Gods, ende dye wet dye inder eewicheyt is, Al die dese wet houden, sullen totten leuen comen Maer diese achter laten, sullen totter doot comen,

+ A

2

Bekeert v Iacob, ende aenueert dese wet, Wandelt doer den wech, tot haren schijnsel teghen haer licht,

3

En gheeft uwe heerlicheyt niet eenen anderen, noch den vreemden heydenen uwe waerdicheyt,

4

O Israel wi zijn salich, want ons zijn die dingen openbaer, dye Gode behaghen.

5

O volck Gods, zijt goets moets, Israel is der gedenckenissen waerdich,

6

Ghi zijt den heydenen vercocht, niet tot uwer verderffenissen, ⁺ maer want ghi den HEERE tot gramscappen verwect hebt, soo sidy uwen vianden ouer geleuert,

+ B

7

Want ghi hebt den eewigen god vertoornt, die v gemaect heeft, offerende den duyuelen, ende Gode niet,

8

Want ghi hebt den ghenen vergheten, die v gheuoet heeft, ende Ierusalem v voester hebdi verstoort,

9

Want si heeft die gramscap van Gode op v sien comen, ende heeft gheseyt.

Hoort ghi ghebueren van Sion, God heeft mi groote schreyinge toeghebracht,

10

Want ic hebbe die geuanghenisse mijns volcs ghesien, mijnder sonen ende mijnder dochteren welcke geuangenisse, hi de eewich is op haer ghebracht heeft,

11

Want ic hebse met vrolicheyt op gheuoedt, maer met schreyen ende droefheyt ghelaten,

12

Nyemant en verblide op mi een weduwe ende mistroostige, ende om dye sonde mijnder sonen, ben ic van veel menschen achter ghelaten Want si zijn vander wet Gods gheweken.

13

⁺Maer si en hebben zijn rechtuerdicheyt niet gheweten, ende si en hebben door die weghen der geboden Gods niet gewandelt, noch si en zijn met rechtuerdicheyt niet ingegaen door die paden zijnder waerheit,

+ C

14

Laet die gebueren van Sion comen, ende die geuangenis mijn-

[p. P7r]

der sonen ende dochteren ghedencken, die welcke hi die eewich is, op hem ghebracht heeft,

15

Want hi op hen gebracht heeft, een volc van verre, een oneerbaer volck, ende van eender ander spraken,

16

ende die den ouden niet ontsien en hebben, noch der kinderen ontfermt.

⁺ Ende si hebben die vercoren der weduwen wech geleyt, ende op haer sonen hebben si die eenige bedruct gemaect,

+ D

17

Maer wat mach ic v helpen?

18

Want die ghene, dye dit quaet op v gebracht heeft, die sal v van uwer vianden handen verlossen,

19

Wandelt mijn sonen, wandelt want ic ben alleen achter gelaten.

20

Ic heb dat cleet des vreden wt gedaen, ende den sack des biddens aengetogen, ende ic sal totten oppersten roepen in mijn dagen.

21

Mijn sonen, zijt goets moets, roept totten HERE, ende hi sal v verlossen van die hant der princen uwer vianden,

22

Want ick heb inder eewicheyt uwe salicheyt gehoept ⁺ ende mi is blijschap vanden heyligen gecomen, vander barmherticheyt, die op v comen sal, van hem die eewich is, onsen salichmaker,

+ E

23

Want ick heb v met droefheyt ende screyen wt ghesonden, Maer Godt sal v mi weder leyden, met blijscapen ende vrolicheyt inder eewicheyt,

24

Want gelijc als die gebueren van Sion, v geuangenisse van God gesien hebben, also sullen si haestelijc v salicheit in Gode sien, die welcke met grooter eeren, ende eeuwige scijnsel op v comen sal.

25

Mijn sonen, lijdt lijdtsaemlijc den toren die op v comen sal, Want v viant heeft v veruolcht, maer ghi sult zijn verderuenis haestelic sien, ende ghi sult op sinen neck climmen.

26

⁺Mijn teedere kinderen hebben scarpe wegen gewandelt, want als een cudde vanden vianden gerooft, so zijnse gheleyt.

+ F

27

Weest goetmoedich mijn sonen, ende roept totten HERE, Want uwe gedachtenisse sal vanden genen zijn die v geleyt heeft,

28

Want gelijc als uwen sin geweest heeft, dat ghi van God dwalen soudt, Wederom bekeerende suldy hem thien werf meer soecken,

29

Want hi die die quade dingen op v gebracht heeft, die sal v eewige vrolicheyt weder brengen, met uwer salicheit.

30

Ierusalem weest goetmoedich. Want die v genoemt heeft, vermaent v.

31

⁺Die v schade deden, sullen vergaen, ende die v gequelt hebben, Ende die verblijt gheweest zijn in uwen val, die sullen gestraft worden,

+ G

32

Die steden den welcken v sonen ghedient hebben, sullen gepijnicht worden, ende die v sonen genomen heeft,

33

Want ghelijck si verblijt is in uwen val, ende veruruecht in v, Also sal si bedroeft worden in haer verderfenisse,

34

Ende die verblijdinge haerer vermenichfuldicheit sal af gesneden worden, ende haer blijschap [kolom] sal tot droefheyt zijn,

35

Want dat vier sal hen comen vanden ghenen die eewich is, in lancheyt der daghen, ende sal vanden duyuelen bewoont worden in veelheyt des tijts.

36

Siet om Ierusalem, totten oosten, ende siet, die vrolicheyt die v van Gode coemt,

37

Siet, uwe sonen comen, die welcke ghi verstroeyt gelaten hebt, si comen verghadert vanden oosten, totten westen, in dat woort des heylighen verblidende die eere Godts.

§ Vanden Heere Christo die die blijschap is vanden Heere comende. Vanden Heere Christo ende die kercke