De Vorsterman Bijbel

§ Dat .iij. Cap.

1

⁺ENde nv HEERE almachtich God van Israel, die siele in bangicheyt, ende de benauden geest roept tot v,

+ A

2

Hoort HEERE ende ontfermt onser, want ghi zijt die barmhertige God, ende ontfermt onser, want wij hebben gesondicht voor v,

3

Want ghy sidt inder eewicheyt, ende wi sullen vergaen inder eewicheyt.

4

HEERE almachcich God van Israel, hoort nv dat gebedt der dooden van Israel, ende haeren sonen die voor v ghesondicht hebben, ende en hebben dye stemme des HEEREN haers gods niet gehoort, ende veel quaden zijn op ons vergadert,

5

En wilt niet ghedencken die boosheyt onser vaderen, maer gedenct uwer hant ende ws naems in deser tijt,

6

want ghi zijt die HERE onse God, ende wi sullen v louen HERE,

7

want daer omme hebt ghi ghegeuen uwe vreese in onse herten, Op dat wi uwen naem aenroepen souden, ende louen v in onse gheuangenisse, Want wi sullen bekeert worden van die boosheyt onser vaderen die voor v gesondicht hebben.

8

⁺Ende siet, wi zijn huyden in onse gheuanghenisse daer ghi ons in verstroyt hebt tot lachter, ende in vermaledijnge, ende in sonde, na alle die boosheyt onser vaderen, die van v afgegaen zijn HEERE onse God,

+ B

9

Hoort o Israel die geboden des leuens, ontfanct metten ooren dat ghi weten moecht wijsheyt,

10

Wat ist o Israel dat ghi zijt inden lande der vianden? Ghi zijt oudt geworden in vreemden landen, ghi zijt besmet metten doden,

11

ghi zijt gerekent metten ghenen die neder climmen inder hellen

12

Ghi hebt achter gelaten die fonteyne der wijsheyt

[p. P6v]

13

Want waert sake dat ghi gewandelt hadt inden wech Gods, ghi soudt doch in vreden gewoont hebben opter aerden,

14

Leert waer wijsheit is, waer duecht is, waer verstant is, op dat ghi weten moecht, waer die lancheit des leuens is, ende des leuens ghebruyc, waer dat licht der ogen is ende vrede,

15

Wie heeft geuonden zijn plaetse? Ende wie is ingegaen in zijn scatcameren?

16

Waer zijn die princen der heydenen, ende die heerscappie hebben op die beesten die opter aerden zijn?

17

Die daer spelen met die vogelen des lochts,

18

die tot scatten vergaderen siluer ende gout, op die welcke de menschen betrouwen ende gheen eynde en is haerder vercriginge.

⁺ Die siluer smeden, ende sorchfuldich zijn ende daer en is gheen vindinge haerder wercken,

+ C

19

Si zijn wtuerdreuen ende nederghedaelt totter hellen, ende andere zijn weder op gestaen in haer plaetsen,

20

Die ionghelingen hebben tlicht ghesien, ende hebben opter aerden gewoont,

21

Maer si en hebben den wech der leeringhen niet gheweten, noch si luyden en hebben haer weghen niet verstaen, noch ooc haer sonen en hebbense niet ontfanghen, Si is verre verscheyden gheworden van haer aenschijn,

22

Si en is inden lande van Canaan nyet ghehoort, noch in Theman niet ghesien,

23

Ende Agars sonen die der aerden wijsheyt gesocht hebben, cooplieden des landts van Theman, ende die veel clappen, ende ondersoeckers der wijsheyt ende des verstandts, maer si en hebben niet gheweten den wech der wijsheyt ende en hebben haerder padekens nyet gedacht,

24

O Israel hoe groot is dat huys gods ende hoe groot is die plaetse zijnder besittinghen,

25

Groot ende gheen eynde hebbende, hooch, ende ongemeten,

26

Daer hebben ruesen genoemt geweest, die vanden beghinne geweest hebben groot van gesteltenisse, geleert ten strijde,

27

Die HEERE en heeft dese niet vercoren, noch si en hebben den wech der leeringhen niet gheuonden, daer om zijn si vergaen,

28

⁺Ende want si gheen wijsheyt gehadt en hebben, daer om zijn si om haerder onwijsheyt vergaen,

+ D

29

Wie is op geclommen inden hemel, ende heeft die wijsheyt ontfangen ende vanden wolcken wtgheleyt?

30

Wie heeft ouer die zee gheuaren, ende die wijsheyt gheuonden, ende heeftse bouen zeer wtuercoren gout ouergebracht?

31

Daer en is nyemant die haer wegen weten mach, ende die haer toepaden ouerdencken mach.

32

Maer die alle dinck weet hi heeftse bebent ende gheuonden, door zijn wijsheyt, Hi die dye aerde bereyt heeft in eewiger tijt, ende heeftse veruult met tweevoetige ende viervoetige ghedierte,

33

Die dat licht wtseynt, ende het gaet, ende hi riept, ende het [kolom] was hem onderdanich met vreesen,

34

Ende dye sterren hebben in haerder waken licht gegeuen, ende si zijn verblijt.

35

Si zijn gheroepen, ende si hebben gheseyt, hier zijn wij, Ende si hebben met vrolicheyt gelicht hem, diese ghescapen heeft,

36

Dit is dye HEERE onse God, ende gheen ander en sal teghen hem gheleken worden,

37

Dese heeft alle den wech der leeringen geuonden, ende Iacob sinen knechte, ende Israel sinen beminden gegeuen,

38

Na desen is hi in die aerde gesien, ende hy heeft metten menschen gewandelt.

§ Van die eewige wet, ende van diese houden, ende van diese versmaden, Ende die kercke die inden drucke ende lijden is, ende hoe die selue Ierusalem die kercke vertroostet wort.