De Vorsterman Bijbel

§ Dat .xlix. Capittel.

1

⁺DIt seyt die HEERE tot Ammons kinderen, En heeft Israel gheen kinderen oft en heeft hi gheen erfgenaem? Waerom heeft dan ^* Melchon) in erflicheyt Gad beseten, ende waer om heeft zijn volc in zijn steden gewoont?

+ A

* the. haer coninck.

2

Hier om siet, so comen die dagen in v, seyt dye HEERE, dat ic sal doen hooren op Rabbath van Ammons kinderen, een crijschs gheschrey, Ende het sal veruult zijn inden oploop, ende zijn dochteren sullen metten viere verbrant worden, ende Israel sal besitten den ghenen die hem besadt, seyt die HEERE.

3

⁺Huylt o Hesebon, want Hay is verwoest, Dochteren van Rabbath roept, cleet v met ^* haren cleederen) Weent ende gaet al omme neuen die thuynen, Want ^* Melchon sal geleyt worden inden oueruaert) zijn priesteren ende zijn princen te samen,

+ B

* th. sacken.

* th. haer Coninc sal geuangen gheuoert worden ende.

4

Wat verblijt ghi inden valleyen? ^* Weeldige) dochtere, dye betrouwen hadt in v scatten, v valleye is neder geronnen, Ende ghi seydet, Wie sal tot mi comen?

* th. dwalende

5

Siet, ick sal op v anxt brenghen, seyt dye HEERE dye God der heyrscaren, van alle den menschen, die ghene dye rontsomme v zijn, ende ghi sult verstroyt worden, yegelic

[p. O7v]

van uwen aenscouwen, ende niemant en sal zijn die vergaderen sal die ghene die vlieden,

6

Ende hier na sal ic doen wederkeeren die gheuanghen van Ammons kinderen, seyt die HEERE.

7

Tot Idumeen.

Seyt dit die HEERE der heyrscaren, En isser gheen wijsheyt meer in Theman? Is den raet vergaen vanden kinderen? Haer wijsheyt onnut gheworden?

8

Vliet ende keert uwen rugge, dye te Dedan woont climt neder in die holen, ⁺ want Esaus vernielinge heb ic op hem ghebracht, den tijt zijnder versoeckinge

+ C

9

^* Hadden die wijngaertlesers op v gecomen, si en hadden v gheen druyuen gelaten, hadden die dieuen inden nacht gecomen, si hadden ghenomen dat hen ghenoech geweest soude hebben).

* th. Als dye wijnlesers ouer v comen, soe en sullen si niet een nalesen ouer laten, Comen die dieuen des nachts ouer v, so sullen si stelen tot dat si ghenoech hebben.

10

Want ic hebbe Esau certeyn ontdect, zijn verborgentheyt heb ic geopenbaert, ende hi en sal niet mogen verborgen worden, Sijn saet is verwoest, ende zijn broederen, ende zijn ghebueren, ende si en sullen nyet meer zijn

11

Verlaet uwe weesen ende ic salse doen leuen ende uwe weduwen sullen in mi hopen

12

Want dit seyt die HEERE, Siet, die niet verordeelt en waren dat si den kelck drincken souden ^* drinckende sullen si hem drincken) ende wilt ghi als onnosel gelaten worden? Ghi en sult niet onnosel zijn, maer ^* drinckende suldy drincken).

* the die sullen dyen moeten drincken

* h. ghi moet dien drincken

13

Want bi mi seluen heb ic gesworen, seyt dye HEEER, dat Bozra sal zijn in ^* verwoestinge) ende in lachter, ende in spot, ende in vermaledijnge, ende alle haer steden sullen zijn tot eewige verwoestinge.

* th. verwonderinge

14

Een ^* gehoor) heb ic vanden HEERE gehoort, ende ^* een bode ben ic ghesonden totten heydenen) Vergadert v, ende coemt tegen haer laet ons op staen inden stride,

* th. gerucht.

* th. een bootscap die hi totten heydenen gesonden heeft

15

Want siet, ic heb v tot eenen iongen gegeuen inden heydenen, versmadelic onder die menschen, ⁺

+ Esa. xlvij.c

16

Ghy die daer woont in dye holen der steenen, ⁺ uwe vermetentheyt ende houaerdie heeft v bedrogen ende ghi ^* arbeyt v te begripen die hoocheyt des hueuels) Als ghy uwen nest verheuen hebt als een arent, so sal ic v daer af trecken, seyt die HERE, ⁺

+ D

* th. dat hooge geberchte besidt

+ Abdi. i.d.

17

Ende Edom sal woest zijn.

Elck die daer door gaen sal, hem sal verwonderen, ende hi sal tisschen op alle haer wonden,

18

gelijc Sodoma ende Gomorra ende dat lant daer neuen, omgekeert was, seyt die HEERE, Daer en sal gheen man woonen, noch gheens menschen sone en sal dat lant bewoonen,

19

Siet, hi sal opclimmen als eenen leeu vander Iordanen houaerdicheyt totter vroomer ^* schoonheit) want ic sal hem haestelic tot haer doen loopen ^* Ende wie sal die vercoren zijn, dien ic bouen hem setten sal) Want wie is mijns ghelijc? Ende wie sal mi ^* onderhouden) Ende wie is dese harder, die minen aensichte wederstaen [kolom] sal?

* th. woninge.

* th. ende waer een eenige starcke is, dien sal ic ouer hem stellen.

* th. geliden.

20

Hier om hoort des HEEREN raet, dien hi aen gegaen heeft ouer Edom, ende zijn gedachten die hi gedacht heeft vanden ghenen dye tot Theman woonen, ^* Ist dat si haer niet neder en worpen, die cleyne vanden cudden, ten si dat si scheyden met hem haer wooninge).

* th. certeynlic sullense die knechtkens der harderen neder worpen ende haer wooninge verstooren.

21

Vanden geluyde haers vallens is dat lant beroert, in die roode zee is eenen roep van haerder stemmen gehoort.

22

Siet, hi sal opuaren als eenen aernt ende sal wtuliegen, ende zijn vlogelen wtspreyden op Bosra. ⁺ Ende der stercker herte van Idumeen sal zijn in dyen dage, als eens wijfs herte die in arbeyt van kinde leyt.

+ E

23

Tot Damascon is Emath bescaemt ende Arphat want si hebben een zeer quaet gerucht gehoort, Si zijn gestoort in die zee, si en mochten nyet rusten van sorgen,

24

Damascus is mat worden, si is gekeert totter vlucht, beuinge heeftse beuaen, verdriet ende rouwe hieldense, gelijc een wijf die in arbeyt van kinde leyt,

25

^* Hoe verlieten si) die priselike stadt, die stadt van bliscappen?

* th. Waerom en verlieten si niet.

26

Hier om sullen haer iongelingen valler in haer straten, ende in dyen dage sullen alle crijsknechten ^* swigen) seyt die HEERE der heyrscaren.

* th. vergaen.

27

Ende ic sal aensteken met vier dye mueren van Damasco, ende het sal verbernen Benadabs ^* vesten).

* th. palleysen.

28

⁺Tot Cedar ende totten rijcken van Asor, die Nabuchodonosor die coninc van Babilonien versloech, seyt die HEERE Staet op ende gaet op tot Cedar, ende verwoest die kinderen vant oosten.

+ F

29

Si sullen nemen haer hutten ende haer cudden, si sullen tot haren profite wech voeren haer vellen ende alle haer vaten ende haer kemels, ende si sullen op hen roepen vreese ronts om van hen

30

Vliet, gaet wech haestelic, ghi die tot Asor woont, sidt in die scueren vanden steenen, seyt die HERE, Want Nabuchodonosor die coninc van Babilonien, heuet tegen v eenen raet aengegaen, ende hi heuet tegen v gedacht gedachten,

31

Staet op, ende climt op totten rusteliken volcke, ende dat betrouweliken woont, seyt die HERE, Si en hebben gheen duere noch grendelen, seyt de HERE, si woonen alleen.

32

Ende haer kemels salmen roouen, ende die menichte van haer beesten tot buete, Ende ic salse stroeyen in alle winden, ^* die al omme bescoren zijn aen haer haer) ende ic sal op hen brengen die verderfenisse van allen eynden rontsom hen, seyt die HEERE.

* th. tot die op die side des platten lants woonen

33

Ende Asor sal zijn tot wooninge der draken woest inder eewicheyt, daer en sal gheen man bliuen, noch gheens menschen sone en salse bewoonen.

34

⁺Des HEREN woordt dat tot Ieremiam den propheet geschiede, tegen Elam int beghinsele van Sedechias des conincs van Iuda conincrijc, seggende,

+ G

35

Dit seyt dye

[p. O8r]

HERE der heyrscaren, Siet ic sal in twee breken den boge van Elam, ende ic sal haer stercheyt nemen,

36

ende ic sal brenghen op Elam die .iiij. winden vanden vier eynden des hemels, ende ic salse ^* wayen) met alle dese winden, Ende gheen volc en salder zijn, daer niet toecomen en sullen die vluchtinge van Elam,

* th. verstroyen.

37

Ende ic sal Elam doen vreesen voor haer vianden, ende in der genen aenschouwen die ^* haer siele soecken).

Ende ic sal op hen tquaet brengen die gramscap mijns toorns, seyt die HERE, Ende ic sal na hen wtseynden dat zwaert, tot dat icse verteert hebben sal,

* the. hen na tleuen staen.

38

Ende ic sal minen toorn setten in Elam, ende ic sal wt haer verderuen die coningen ende die princen, seit die HERE.

39

Ende inden laetsten dagen, so sal ic die geuangen van Elam doen weder keeren, seyt die HERE.

§ Gods woort tegen Babilonien, ende hi roept die Meden ende Persen tot haerder verderuenisse, Ende hi voorseyt Iuda, ende Israels wedercoemst wter geuanckenisse, ende verwondernisse van Babilons omworpinge, ende dat wraecswaert voor Iuda ende Ierusalem.