De Vorsterman Bijbel

Dat .xxxix. Cap.

1

⁺IN Sedechias des conincs van Iuda .ix. iaer, in die thienste maent, so quam Nabuchodonosor die coninc van Babilonien, ende al zijn heyr tot Ierusalem, ende si beleydent.

+ A

2

Ende in Sedechias elfste iaer, in die .iiij. maent inden ^* vijfsten) dach vander maent, wert dye stat opgedaen,

* th. negende

3

ende daer quamen in alle des conincs princen van Babilonien, ende si saten in die middel poorte, Neregel, Sereser, Sameger, Nabu, Sar, sachim ^* Rapsaces) Neregel, Sereser, Rebmag, ende alle die ander princen des conincs van Babilonien.

* the. Rabsaris.

4

⁺Ende doense Sedechias die coninc van Iuda sach, ende alle die strijtbaer mannen, so vloden si ende gingen des nachts wter stat, den wech van des conincks houe, ende door dye poorte, die tusscen die .ij. mueren was, ende si trocken wt, ten wege ^* waert, vander wildernissen)

+ B

* th. ten blacken velde waert,

5

Ende dat heyr vanden Caldeeuschen volchde hen na, ende si vingen Sedechiam int velt der woestinen van Hiericho, ende si brochten hem geuaen tot Nabuchodonosor den coninc van Babilonien, in Reblatha, dat int landt van Emath is, ende hi sprac tot hem ^* oordeelen).

* th. van rechten.

6

Ende die coninc van Babilonien doode in Reblatha Sedechias sonen voor zijn oogen, ende alle die edele lieden van Iuda doode die coninc van Babilonien,

7

Ende hi stac Sedechias oogen wt, ende hi bant hem met ketenen datmen hem in Babilonien voeren soude.

8

Ende des conincs huys, ende der ghemeynten huysen, ontstaken die Caldeeussche metten viere, ende werpen die mueren van Ierusalem omme

9

Ende dat ouerblijfsel des volcs dat inde stadt bleef, ⁺ ende die vluchtighe die ouergeuoloden waren tot hem, ende die ouertallige vanden ghemeynen volcke die bleuen waren, dye voerde Nabusaradan dye veldthooftman ouer in Babilonien,

+ C

10

Ende vanden armen lieden die niet met allen en had-

[p. O3v]

den, liet Nabuzardan die velthooftman, een deel int lant van Iuda, ende hi gaf hen in dien dage die wijngaerden, ende die water putten,

11

Want Nabuchodonosor die Coninc van Babilonien hadde beuolen Nabuzardan den meester vanden heyre van Ieremiam, ende geseyt,

12

Neemt dien ende slaet uwe ooghen op hem, ende en doet hem niet quaets, maer ghi sult hem doen, also hy willen sal,

13

Hier om sant Nabuzardan die prince vanden heyre, ende Nabu, ende Sesban ende ^* Rabsaces) ende Neregel ende Sereser ende Rebmag, ende al des conincs van Babilonien princen, sonden,

* th. rabsaris

14

ende deden Ieremiam wt den voorportael vanden kercker, ende si leuerden hem Godolie Ahycams sone, dye Saphans sone was, dat hi int huys comen soude, ende woonen int volck.

15

⁺Maer doen Ieremias gesloten was int voorhuys vanden kercker, so was tot hem geschiet des HEREN woort, seggende,

+ D

16

Gaet ende segt Abedmelech den moriaen, seggende, Dit seyt die HEERE der heyrscaren, God van Israel Siet ic sal mijn woorden brengen op dese stadt int quade ende niet int goede ^* Ende in dien daghe sullen si in uwen aenscouwen zijn)

* the. ende ghy sullet sien alst geschiet

17

Ende ick sal v verlossen in dien daghe, seyt die HEERE.

Ende ghi en sult nyet geleuert worden inder mannen handen, die ghi ontsiet,

18

maer beschermende sal ic v verlossen, ende ghi en sult metten swaerde niet vallen, maer v siele sal v ^* in salicheyt) zijn, want ghi hebt in my betrouwen gehadt, seyt die HEERE.

* the. buet.

§ Hoe Ieremias verlost wert, ende van Godolia den prouoest des volcs, ende van Iohannan dye propheteerde dat Hismael Godoliam wilde doden.