De Vorsterman Bijbel

§ Dat .xxiiij. Capittel.

1

⁺DIe HERE thoonde mi, ende siet, twee coruen vol vigen waren gheset voor des HEREN tempel, na dien dat Nabuchodonosor die coninck van Babylonien ouergheuoert had Iechoniam ^* Ioachims) sone den coninck van Iuda, ende sine princen, ende ^* den smit ende den besluyter der costelijcker steenen) van Ierusalem, ende hadse gebracht in Babilonien.

+ A

* th. Ioakims.

* th. den wercmeester ende den poortwachter

2

Ende den eenen corf hadde seer goede vyghen, alsoo die eerstijdighe vigen pleghen te zijn, Ende dye ander corf hadde seer quade vighen, diemen nyet en mochte eten, om dat si quaet waren,

3

Ende dye HERE seyde

[p. N3v]

tot mi, Ieremia, wat siet ghi? Ende ic seyde, Goede vighen, vighen seer goet, ende quade seer quaet, diemen niet eten en mach, om dat si soo quaet zijn.

4

⁺Ende des HEREN woort gheschiede tot mi, seggende,

+ B

5

Dit seyt die HERE die Godt van Israel, Alsoo dese goede vighen zijn, also sal ic die ^* oueruaringe) van Iuda, dien ic wtghesonden hebbe van deser plaetse, inder Caldeescher landt int goede bekennen,

* th. gheuanghenis.

6

ende ick sal mijn ooghen op hen slaen, om int goede te setten, Ende ic salse weder brengen tot desen lande, Ende ic salse stichten, ende niet verderuen, ende ic salse planten, ende niet wtroeyen,

7

Ende ic sal hen gheuen een herte, dat si mi kennen sullen, dat ic die HERE ben. Ende si sullen mi wesen tot een volc, ende ic sal hen wesen tot een God, Want si sullen tot mi wederkeeren in alle haere herte,

8

⁺Ende alsoo die quaetste vigen zijn diemen niet eten en mach om dat si quaet zijn, so seyt die HEERE, Alsoo sal ick Sedechiam den coninck van Iuda gheuen, ende zijn princen, ende dat ander volc van Ierusalem, die in dese stadt ghebleuen zijn, ende die woonen in dat lant van Egypten,

+ C

9

⁺Ende ic salse gheuen in quellinghe ende in verdriet allen den conincriken der aerden tot lachter ende in ghelikenissen ende in een segwoort ende in vermaledijngen, in allen steden daer icse henen ghedreuen heb,

+ D

10

Ende ic sal onder hen seynden tswaert ende den honger, ende pestilencie, tot dat si verdoruen sullen worden vanden lande, dat ic hen gaf ende haeren vaderen.

§ Hoe geheel Iuda tseuentich iaren geuangen soude worden, Vanden beker daer alle heydenen afdeelen moesten, Ende die herders ende die edele werden totter beclaginghe geroepen.