De Vorsterman Bijbel

§ Dat .xxiij. Capittel.

1

⁺⁺ WEe den herderen, die verstroyen ende verscoeren die cudde mijnre weyden seyt die HERE.

+ A

+ Eze. xxiiij.f

2

Hieromme seyt die HERE van Israel totten herderen, die mijn volc voeden Ghi hebt mine cudde verstroeyt, ghi hebtse [kolom] wt verdreuen, ende en hebtse niet besocht. Siet ic sal op v versoecken die boosheit van uwen naersticheden, seit die HERE,

3

Ende ic sal v vergaderen dat ouerblijft van minen cudden, wt allen landen daer icse toe wt verdreuen hebbe, ende ic salse keeren tot haeren ^* lande) ende si sullen wassen ende vermenichfuldicht worden,

* th. wooninghen.

4

ende ic sal op hen verwecken herderen, ⁺ ende die sullense voeden, ⁺ Si en sullen haer voortmeer nyet ontsien, noch hen vreesen, ende niemant en sal ^* gesocht worden wten getale) seyt die HERE

+ B

+ Deu. xxxiij.

* th. ghestraft worden

5

Siet die dagen comen seyt de HERE, ende ic sal Dauid verwecken een rechtuaerdich zaet, ende die coninc sal regeeren ende wijs zijn, ende doen oordeel ende rechtuaerdicheit opter aerden,

6

In dien dage sal Iuda behouden worden, ende Israel sal getrouwelijc woonen.

Ende dit is die naem daer si hem mede sullen noemen ^* onse rechtuaerdige HERE)

* th. die HERE onse rechtuaerdicheyt

7

Hierom siet, die daghen comen, seit die HERE, ende si en sullen niet meer seggen, die HERE leeft, die de kinderen van Israel wten lande van Egipten leyde.

8

Maer die HERE leeft, die dat zaet van Israel gheleyt heeft wten lande vant noorden, ende wt allen landen waer in dat icse wtgheworpen hadde, ende si sullen woonen in haeren lande,

9

Tot den propheten. Mijn herte is bedroeft in dat midden van mi, alle mijn gebeenten hebben gebeeft Ic ben geworden ghelijck als een droncken man, ghelijc een man die veruerscet is met wijne, van des HEREN aensichte, ende vanden aensichte zijnder heyliger woorden,

10

⁺want dat lant is veruult van ouerspele, want vanden aensichte der vermaledijnge so weende dat lant, ende die weyden der wildernissen zijn verdroocht. Ende haeren loop is quaet geworden ende haer stercheit ongelijc.

+ C

11

Want die prophete ende die priester zijn besmet, ende in minen huyse vant ic haer quaet, seyt die HERE.

12

Hierom sal haeren wech wesen, als slibberachtich int donckere, want si sullen daer ^* in gestooten worden) ende vallen daer in, Want ic sal quade dingen op hen brengen, dat iaer haerder versoeckinge, seyt die HERE,

* th. daer op slipperen.

13

Ende inden propheten van Samarien heb ic sotheyt gesien, ende si propheteerden door Baal, ende bedroghen mijn volc van Israel.

14

Ende aenden propheten van Ierusalem sach ic ^* die gelijckenisse des ouerspels) ende den wech der luegenen, ende si stercten der alderquaetster menscen handen, om dat elc niet bekeert worden en soude van zijnre boosheyt Si zijn mi alle worden als Sodoma, ende die gene die daer woonen als Gomorra.

* th. grouwelijcke dingen dat si ouerspel deden

15

Hierom seit die HERE der heyrscaren totten propheten.

Siet ick salse spijsen met alsen, ende ick salse doen drencken met galle, Want vanden

[p. N3r]

Propheten van Ierusalem is wtghecomen besmettinge op alle tlant

16

Dit seyt die HERE der heyrscharen, En wilt nyet hooren der propheten woorden, die v propheteren ende v bedriegen, Si spreken dat ^* visioen) haerder herten, ende niet wt des HEREN monde

* th. gesichte

17

⁺Si segghen den ghenen die my blasphemeren, dye HEERE heeft ghesproken, v sal vrede wesen, Ende al den genen die wandelen in die boosheyt haerder herten, hebben si geseyt, gheen quaet en sal op v comen,

+ D

18

Want wie was daer bi in des HEREN raet, ende hoorde ende sach des HEREN woorden?

⁺ Wie mercte zijn woort, ende hoordet?

+ E

19

Siet den storm van des HEREN toornicheyt sal wt comen, ende onweder wt brekende sal comen op der ongodliker hooft.

20

Des HEREN toorn en sal niet weder keeren, voor dat hy ghedaen sal hebben, ende tot dat hi veruullen sal die gedachten zijnre herten, Inden wtersten daghe suldy sinen raet verstaen,

21

Ic en sandt die propheten niet, ende si liepen, Ic en sprac tot den propheten niet ende si propheteerden.

22

Hadden si in minen raet gestaen, ende hadden si minen volcke cont gedaen mine woorden, soo had icse certeyn gekeert van haere quade wegen, ende van haeren quaden gedachten,

23

Meynt ghi dat ick niet een God van hier by si, seyt die HERE, ende niet een Godt van verren?

24

Sal een man verborgen worden in heymelicheyt, dat ic hem niet sien en sal, seyt die HERE. En veruulle ick niet hemel ende aerde, seyt die HERE?

25

Ic hebbe ghehoort wat die propheten seyden, propheterende in minen name luegenen, ende seggende, Ic heb gedroomt, Ic heb ghedroomt,

26

Hoe langhe is dit inder propheten herte, voorseggende lueghenen, ende propheterende, die verleydingen haerder herten?

27

Die doen willen, dat mijn volc vergete mijns naems, om haer droomen, die si vertellen, elck tot haeren naesten, also haer vaders mijns naems vergaten om Baals wille,

28

Een propheet die den droom heeft, hi vertelle den droom, ende die mijn woort heeft, hi spreke waerachtelijc mijn woort

⁺ Wat is dit caf te rekenen teghen die tarwe? seyt die HERE,

+ F

29

En zijn mijne woorden niet als een vier, seyt dye HERE, ende als eenen hamer, die eenen steen intween slaet?

30

Hieromme so spreke ic den propheten toe, die mine woorden stelen, elck van sinen naesten, seyt die HERE,

31

Siet, ic spreke den propheten toe, seyt dye HERE, die haer ^* tonghen) [kolom] aennemen ende seggen, ^* dit seyt die HERE)

* th. spraken

* the. dit seyt hi

32

Siet, ic spreke den propheten toe, die luegenen droomen, seyt die HERE, die luegenen vertelt hebben, ende hebben mijn volc verleyt met haere ^* luegenen, ende met haeren wonderen,) als icse niet en hadde gesonden, noch hen beuolen en hadde, die niet en hebben desen volcke gheuordert, seydt die HERE,

* th. bedroch ende lichtueerdicheyt

33

Hierom ist dat v dit volck vraecht, oft een propheet, oft een priester, seggende, Wat is des HEREN last? Soo sult ghy tot hen seggen, Ghi zijt den last, Want ic sal v wech worpen, seyt die HERE,

34

Ende die propheet ende die priester, ende dat volc, dat seyt des HEREN last, ick sal versoeck doen op dien man, ende op zijn huys.

35

Dit suldi segghen, elck tot sinen naesten, ende tot sinen broeder, Wat antwoorde dye HERE, ⁺ ende wat heeft die HERE gesproken?

+ G

36

Ende des HEREN last en salmen voort meer niet ghedencken, Want elcken sal zijn woort tot last wesen, Ende ghy hebt verkeert des leuenden Gods woorden, des HEREN der heyrscharen ons Godts,

37

Dit sult ghi totten propheet seggen, Wat heeft dye HERE v gheantwoort, ende wat heeft dye HERE ghesproken?

38

Want ist dat ghy segt, des HEREN last, Daerom seyt die HEERE dit, Om dat ghi gheseyt hebt, dit woort is des HEREN last, Ende ic heb tot v gesonden, segghende, En wilt nyet segghen des HEREN last,

39

Hierom siet sal ic v wech nemen, v draghende, ende ic sal v, ende die stadt die ic v ende uwen vaderen gaf, van minen aensichte verlaten,

40

Ende ic sal v geuen tot eewighe lachter, ende tot eewighe schande, die nimmermeer wtghewist en sal worden met verghetentheyt.

§ Van dye figuere van die twee vijchkoruen, die welcke Ieremias sach. Ende hoe zedechias gheplaecht wert