De Vorsterman Bijbel

§ Dat .xv. Capittel.

1

⁺ENde dye HEERE seyde tot my, Al waert dat Moyses ende Samuel voor mi stonden, so en is mijn ziele tot desen volcke niet, worptse wt van minen aensichte, datsi wtgaen,

+ A

2

Ende ist dat si tot v seggen, Werwaert sullen wi wtgaen? so suldy tot hen seggen, dit seyt die HEERE, Die wtgaet ter doot, hy gae ter door, ende die ten sweerde, hi gae ten swaerde, ende die ten honger, hi gae ten hongere, ende die ter geuanckenisse, hi gae ter geuanckenisse,

3

Ende ic sal op hen versoecken, seyt die HEERE, vierderhande manieren, Dat swaert, om doot te slaen, ende honden, om te verscoren, ende die vogelen des hemels, ende die beesten der eerden, om te verslinden ende te verderuen,

4

⁺Ende ic salse geuen in hittigen toorne, allen rijcken der werelt, om Manasses wille Ezechias sone des conincs van Iuda, om alle die boosheyden die hi gedaen heeft in Ierusalem

+ B

5

Want wie sal uwer ontfermen o Ierusalem, Oft wie sal bedroeft worden om uwen wille? Oft wie sal gaen te bidden om uwen vrede?

6

want ghi hebt mi verlaten, seyt die HEERE, ende ghi zijt achterwaert gegaen, Ende ick sal mijn hant wtsteken op v, ende ic sal v dootslaen, ic heb gearbeyt biddende,

7

ende ic salse verstroyen met eenen wanne door die poorten vanden lande ^* Ic heb gedoot ende verstroyt) mijn volc, ende nochtans en zijn si niet wedergekeert van haeren wegen.

* the. Ic heb weesen gemaect ende vernielt

8

Haer weduwen zijn mi vermenichfuldicht bouen tsandt der zee, Ic heb hen inghebracht, op ^* eens iongelincs) moeder, inden middage eenen verwoester, Ic heb haestelijc op die stede gesonden anxt.

* the. der bester iongelinghen

9

⁺Die .vij. sonen baerde, si is cranc geworden ende haer ziele gebrac, Die sonne ginc onder haer, doent noch dach was, si [kolom] is bescaemt worden ende si scaemde haer, Ende haer sonen die ouerbliuen, die sal ic geuen inden sweerde in haerder vianden aenscouwen, seyt die HERE die God.

+ C

10

⁺Wee mi, mijn moeder, Waerom baerdy mi eenen man van gekijf, eenen man van onurede in alle tlant. Ic en heb niet gewoeckert, noch niemant en heeft mi ghewoekert Alle vermaledien si mi,

+ E

11

Die HERE seyt, Oft ic uwen ouerbliue niet en helpe int goede ^* oft ic v niet te gemoet en come inden tijt des drucs ende verdriets inden tijde van ongeluc ende van bangicheyt tegen uwen viant)

* th. ende make dat die vianden selue v noch bidden moeten inden tijt des onghelucs ende drucs.

12

En sal dat yser niet ^* een verbont maken metten) yser van noorden ende coper?

* th. Sal een yser breken. deu. xxiij c

13

Ick sal v rijcdom ende uwe scatten geuen tot danck inden roof om alle uwe sonden, ende in alle uwe palen,

14

ende ic sal uwe vianden toebrengen van eenen lande dat ghi niet en kent, want een vier is ontsteken in minen toren ende op v salt bernen.

15

Ghi wetet HERE, gedenct mijns ende versoect mi ende verlost mi van dien die mi veruolgen, En wilt mi niet ontfaen in uwer lancmoedicheyt, weet dat ic om uwen wille lachter geleden heb,

16

V woorden zijn geuonden ende ic adtse. Ende v woort is mi geworden tot blyschap ende in vruechden mijns herten, want uwen naem is op mi aengeroepen HERE God der heyrscaren,

17

⁺Ic en heb niet geseten inder ^* spelender) raet, ende ben verblijt van dat aensicht ws hants, Ick sadt alleene want ghi veruuldet mi met bitterheyt

+ D

* th spotteren

18

Waerom is minen rouwe eewich geworden, ende mijn plage ^* mistroostich.) Sy weygerde ghenesen te worden? Si is mi geworden als die luegene van ongetrouwen wateren.

* h. so quaet

19

Hierom seyt die HEERE dit, Ist dat ghi v bekeert, so sal ic v bekeeren, ende ghi sult voor mijn aensichte staen, ende ist dat ghi scheyt dat costelike vanden snooden, so suldy zijn als minen mont, Si sullen tot v bekeert worden, ende ghi en sult niet bekeert worden tot hen,

20

Ende ic sal v dit volc geuen tot eenen metalen ende starcken muer, Ende si sullen tegen v striden ende v niet verwinnen, want ic ben met v, om dat ic v behouden ende verlossen soude, seyt die HEERE,

21

Ende ic sal v verlossen vander quaetster menscen handen, ende ic sal v verlossen vander hant der ^* starcken.)

* h. tyrannen

§ Vander toecomende elendicheyt der Ioden, Van die christenen der heydenen