De Vorsterman Bijbel

§ Dat .viij. Capittel.

1

⁺IN dien tijden, ⁺ seyt die HEERE, sullen si wt haeren grauen worpen der coningen gebeenten van Iuda, ende zijnre princen gebeenten [kolom] ende der propheten gebeenten, ende der priesteren gebeenten, ende dat gebeente der ghenen die te Ierusalem woonden,

+ A

+ Esaie. ij.d.

2

Ende si sullense spreyden, totter Sonnen, ende manen, ende tot al den heyre des hemels, dat sie lief hadden, ende dien si dienden, ende daer si na wandelden, ende die si sochten ende aenbaden.

Men en salse niet vergaderen, ende men en salse niet begrauen, si sullen tot mest zijn op dat aensicht der aerden,

3

Ende si sullen meer verkiesen die doot, dan dat leuen, alle die ouer bliuen sullen van deser zeer quaden geslachte, in so wat plaetsen die gelaten sullen zijn, daer icse toe gedreuen hebbe, seyt die HEERE der heyrscharen.

4

⁺Ende ghi sult tot hen seggen, Dit seyt die HERE, En sal die ghene die valdt niet weder op staen? ende die afghekeert is, en sal hi nyet weder keeren?

+ B

5

Waerom dan, is dit volc in Ierusalem afgekeert met strijdende afkeeringe? Si hebben die ^* luegenen) aengegrepen, ende si en wilden niet weder keeren,

* th. argelist

6

Ic mercte, ende si en wilden niet weder keeren, Ic mercte, ende ic hoorde toe, niemant en spreect dat goet is, Niemant en is die hem bekeert van zijnder sonden, ende seyt, Wat heb ic ghedaen?

⁺ Si zijn alle gekeert tot haeren loop, gelijc een paert, dat met gedruysche gaet ten strijde waert,

+ C

7

Die kiekendief bekende inden hemel sinen tijt, Die tortel duyue, swaluwe, ende die oyuaer wachten den tijt haers toecoemst, Maer mijn volck en kende des HEEREN vonnisse nyet.

8

Hoe segdy, wy zijn wijs, ende des HEREN wet is met ons? Waerlijck soo heeft luegenen gewracht der scriben lueghenachtighe griffie,

9

Die wijse luyden zijn beschaemt, si zijn veruaert ende geuangen.

⁺☞ Want si hebben des HEEREN woordt wech geworpen, ende in hen en is gheene wijsheyt.

+ D

10

Hierom sal ic haer wiuen gheuen vremden luyden, ende haer ackers vremden erfghenamen, Want vanden minsten totten meesten volghen si alle die die giericheit, vanden propheten totten priesteren doen si alle valscheyt.

11

Ende si genasen die bedroeftheyt der dochteren van minen volcke, ⁺ tot schanden, ⁺ seggende, het is vrede, vrede, alst gheenen vrede en was,

+ Esaie. lvi

+ E

12

Si zijn beschaemt die de afgriselicheit gedaen hebben, Maer immers en zijn si met beschaemtheyt niet beschaemt, ende si en consten hen nyet schroemen, Hierom sullen si vallen onder die ghene die vallen, Ende sulen vallen inden tijden haerder besoeckinge, seyt die HERE

13

^* Verghaderende sal ic haer verghaderen) seyt die HEERE, Gheen druyue is inden wijnghaerden, ende gheen vighe en is

* th. Ic salse zeer nauwe opvergaderen

[p. M5r]

aen den vigeboom, ⁺ dat blat is af gheuallen ^* Ende ic gaf hen datter ouerghegaen is)

+ Sapi. vi.c. Esaie. xv

* th. al dat ic hen gegheuen hebbe dat sal hen genomen worden

14

Waerom sitten wi? Coemt tsamen, ende laet ouergaen in die gemuerde steden, ende swigen aldaer, Want God die HEERE heeft ons doen swigen, ende heeft ons te drincken ghegeuen galle water, Want wi hebben tegen den HEERE gesondicht

15

⁺Wi ontbeyden den vrede, ende ten was nyet goet, Ende den tijt des genesens, ende siet vreese

+ F

16

Van Dan is gehoort dat gebriesch van sinen paerden, ende al dat lant is beroert van die stemme des geneijens van sinen vechters, Ende si quamen, ende verslonden dat lant, ende zijn volheyt, die stadt ende die daer in woonden,

17

Want siet, ic sal v seynden die basiliscus serpenten, diemen niet besweeren en mach, ende si sullen v bijten, seyt die HEERE,

18

mijn wee is bouen wee, in mi is mijn herte truerende

19

⁺Siet, die stemme des roeps der dochter van minen volcke van verren lande, En is die HEERE nyet in Sion? oft en is haer coninc niet in haer? Waerom hebben si dan mi verwect tot gramschap met haeren afgoden, ende met vremde ydelheden?

+ G

20

Den oost is ouerleden die somer is gheeyndt, ende wy en zijn nyet behouden.

21

Op die droefheyt der dochter mijns volcs, ben ick bedroeft ende beroert, een verbaestheyt heeft mi beuangen,

22

Ende isser gheen rosine in ^* Galaad) oft en is daer gheen medicine? Waeromme en is dan niet ouerheylt dat litteeken der dochter mijns volcs?

* th. Gilead

§ Van des Propheets beweeninge ende betlaginge. Ende van dat bedroch te wachtene.