De Vorsterman Bijbel

§ Dat .Lv. Capittel.

1

⁺GHy alle die dorstende zijt, ⁺ coemt totten watere, ende die gheen siluer en hebben [kolom] coemt, coopet, ende etet, Coemt toch, ende coopt sonder siluer, ende sonder wisselinghe, wijn ende melck.

+ A

+ Apo. xxi.d

2

Waerom weecht ghi siluer, niet om broot, ende uwen arbeyt, niet in versadenisse, Hoorende hoort mi, ende etet goet, ende v ziele sal verlustighet worden in vetticheyt.

3

Neycht v oore, ende coemt tot mi, hoort, ende v ziele sal leuen, want ick sal met v een eewich verbont maken, die ghetrouwe ontfermherticheden Dauids.

4

Siet, ick ghaf hem den volcken tot eenen ghetuyge, tot eenen leytsman ende ghebieder der ^* Heydenen.)

* th. volcken.

5

Siet het volck welck ghi niet en kendet, dat sult ghi roepen, ende die Heydenen die v niet en kenden sullen tot v loopen, om den HEERE uwen God, ende den heylighen Israels, want hi heeft v gheeerwaerdicht.

6

Soect den HERE die wijle dat hi mach gheuonden worden, aenroepet hem, die wijle hi bi v is.

7

⁺Die ongodlijcke verlate sinen wech, ende elck ongerechtich man zijn ghedachten, ende hi keere weder totten HERE, ende hi sal zijns ontfermen, ende tot onsen God, want hi is ^* vele, om) ghenadich te zijn.

+ B

* th. menichfuldich int

8

Want mine ghedachten en zijn niet gelijck uwe ghedachten, ende mine weghen en zijn niet, ghelijck uwe weghen, seyt die HEERE.

9

Want ghelijck die hemelen verheuen zijn bouen die aerde, also zijn mine weghen verheuen, van uwe weghen, ende mijn ghedachten, van uwe ghedachten.

10

⁺Ende ghelijck wanneer den reghen neder daelt ende die snee vanden hemel, ende en coemt niet meer wederom, maer hi veruult die aerde, ende beghietse, ende doetse wtspruyten, ende geeft den zaeyende zaet, ende den etende broot,

+ C

11

Also sal mijn woort zijn, dat wt sal gaen van minen monde, ☞ Het en sal niet ydel tot mi weder keeren, maer het sal doen al dat ick ghewilt heb, ende het sal voorspoet hebben tot tghene, daer ict toeghesonden heb,

12

Want ghi sult in blijschapen wtgaen, ende ghi sult in vrede geleyt worden, Die berghen ende hueuelen sullen ^* singhen voor v lofsanck) ende alle houten ende velden sullen die hant tsamen slaen.

* th. verluyden.

13

Voor den Wilgenboom sal opgaen den Abeel boom, ende voor die Netele, den Myrtus. Ende ^* die HERE sal ghenaemt zijn) tot een eewich teeken, dat welck niet wech ghenomen en sal worden.

* th. tsal den Heere tot eenen name zijn.

§ Hoe God zijn volck totter rechtuaerdicheyt verwect, om zijnder salicheyt wille. Ende vanden besnedenen die Gods wille doet.