De Vorsterman Bijbel

§ Dat .xliij. Capittel.

1

⁺ENde nv dit seyt die HERE, v scepper Iacob, ende v maker Israel, En wilt niet vreesen, want ic heb v verlost, ende met uwen name riep ic, ghi zijn mijn.

+ A

2

Als ghi door die wateren gaet, met v sal ic zijn, ende die stroomen en sullen v niet oueruloeyen, Als ghi int vier wandelen sult, ghi en sult niet bernen, ende die vlamme en sal in v niet aensteken.

3

Want die HERE v God, die heylige van Israel, ben v salichmaker, ic heb v versoeninge gegeuen Egipten, Moorenlant ende Saba voor v.

4

Om dat ghi eerlijc voor mijn oogen waert geworden eerwaerdich daerom heb ic v liefgehadt, ende ick sal die menschen voor v geuen, ende die volcken voor v ziele.

5

En wilt niet vreesen want ic ben met v, vant oosten sal ic v zaet toebrengen, ende vant westen sal ick v vergaderen.

6

Ick sal seggen tot den noorden Geeft ende den zuyden, ⁺ En wilt niet verbieden, haelt mijn sonen van verre, ende mijn dochteren van deynde der aerden.

+ B

7

Ende alle die minen naem aenroept in mijnder eeren heb ic hen gescapen, ic heb hen geformeert, ooc heb ic hen gemaect.

8

Leydt buyten, dat blinde volc, ende oogen hebbende, ende die dooue ende dat ooren heeft.

9

Alle die heydenen zijn vergadert, ende die geslachten zijn versaemt wie dat sal onder ^* v vercondigen? ende doen v die eerste hooren?) laetse haer getuygen geuen, ende rechtuerdich worden ende laetse hooren, ende ^* si sullen seggen. Warachtich)

* th. hen vercondigen ende tvergangen laten hooren

* thebre. antwoorden metter waerheyt

10

ghi zijt mijn getuigen seyt de HERE ende mijn knecht dien ic vercoren heb, om dat ghi sout weten, ende mi geloouen, ende

[p. K8v]

verstaen, dat ict ben, Voor mi en is geen God gemaect, ende na mi en sal geen zijn.

11

☞ Ic, Ic ben die HERE, ende sonder mi en is geen salichmaker.

12

Ic hebt vercondicht, ende heb v geholpen, ic hebt v doen hooren, ende onder v en was geen vremde, ⁺ ende ghi zijt des mijn getuygen, seyt die HERE, ende dat ic God ben

+ C

13

^* Ende ic ben vanden begin selue, ende daer en is geen die van mijnder hant verlosset,) Ic sal wercken, ende wie sal dat keeren?

* the. Oock eert dach wert ben ende niemant en neemt mi iet wt mijnder hant

14

Aldus seyt die HERE v verlosser, die heylige van Israel, Om uwent wille heb ic in Babilonien ghesonden, ende ic hebbe alle ^* grendelen) neder getrocken, ende die Chaldeen in haer scepen hen verblidende.

* thebre. die vluchtighe

15

Ic ben die HEERE v heylighe Israels schepper, v coninck.

16

Dit seyt die HEERE, die inder zee den wech gaf, ende in die ^* beken) eenen pat.

* th. starcke wateren

17

Die wt leyde den wagen, ende dat paert, die schare ende den stercken Si zijn te samen intslaep geworden, ende si en sullen niet opstaen, si zijn vertreden, gelijc vlas zijn si wt ghebluscht. ⁺

+ ij.cor. v.d. Apo. xxi.e.

18

En ghedenct der eerster dingen niet, ende en siet niet aen die oude dinghen.

19

Siet, ic make nieuwe dingen, ende nv sullen si opgaen, ende ghi sultse sekerlijc bekennen, oock sal ic in die woestine eenen wech setten, ende stroomen in dongebaende

20

Ende die beeste des ackers sal mi prijsen, die draken ende die ^* struycen), om dat ic heb in die woestine water gegeuen, ende stroomen in dat ongebaende, op dat ic te drincken soude geuen minen volcke, mijnen wtuercorene.

* the. ionghe struicen

21

⁺Dit volck heb ic mi ghemaect, het sal minen lof vertellen.

+ D

22

Iacob ghi en hebt mi niet aengeroepen, noch ghi en arbeyde ^* in mi) niet Israel.

* theb. mi

23

Ghi en hebt mi niet geoffert den ram ws brantoffers, ende met uwen offerhanden en hebdi mi niet gheeert.

Ick en heb v niet doen dienen ^* in offerande, noch ick en heb v geenen arbeyt in wierooc ghegeuen.)

* thebr. met spijsofferen ende inden wierooc arbeyden

24

Ghi en cocht mi den riet scacht niet om ghelt, ende ghi en hebt mi niet droncken gemaect metten ruete uwer offeren. Nochtans hebdi mi doen dienen in uwe sonden, ghi hebt mi doen arbeyden in uwe onrechtueerdicheden.

25

Ic bent, ic bent selue die uwe sonden wt doe, om minent wille, ende uwer sonden en sal ic niet ghedencken.

26

Brenct mi wederom int gedencken, ende laet ons te samen geoordeelt worden, Vertelt ghi, hebdi yet, op dat ghi gerechtueerdicht wort.

27

V eerste vader sondichde, ende uwe beduyders zijn tegen mi ouergetreden.

28

Ende ic heb beulect die ^* heylige princen) ende ic ghaf Iacob in die doot, ende Israel ^* tot blasphemie.)

* th. ouerste des heylichdoms.

* the. den lasteraers

§ Van dat nieuwe doopsel, Ende hoe God die afgoden be-[kolom]spot, ende hoe hi tot berouwe roept, ende hoe hi zijn macht toont, ende dat hi die Heere is diet al doet.