De Vorsterman Bijbel

§ Dat .xlij. Capittel.

1

⁺SIet, mijn keecht ick sal hem ontfangen Mijn wtuercorene, mijn ziele heeft behagen in hem gehat, ic heb minen geest op hem gegheuen, ⁺ hi sal den heydenen doordeel voortbrenghen.

+ A

+ Mat. xxi.

2

Hi en sal niet roepen, ende ^* hi en sal gheenen persoon wtnemen) noch zijn stemme en sal buyten niet gehoort worden.

* theb. kiuen

3

Hi en sal dat gecrooct riet niet in stucken wriuen ende dat roockende vlas, en sal hi niet wtblusscen, inder waerheyt, sal hi dat oordeel voortbrengen.

[p. K8r]

4

☞ Hi en sal niet droeuich noch stuerich zijn, tot dat hi doordeel int aertrijck sette, ende die eylanden sullen zijn wet verwachten.

5

Dit seyt God die HERE ^* van Israel) sceppende die hemelen ende die wt reckende, vastmakende die aerde, ende haer spruyten, die den volcken dat op haer is adem gheeft, ende den gheest diese betreden.

* ten is niet int hebree.

6

Ic die HERE heb v geroepen inder rechtuaerdicheit, ende ic greep v hant, ende ic behielt v, Ende gaf v tot een verbont des volcs, ende tot een licht der heydenen

7

Om dat ghi opendoen soudt die ooghen der blinder, ende dat ghi den gebondenen wtleyden soudt vanden huise des kerckers, den sittenden in duysternisse.

8

☞ Ick ben die HEERE, dat is minen naem, Ic en sal mijn eere gheenen anderen gheuen, ende minen lof den gegroefden beelden.

9

⁺Siet, die eerste dingen zijn gecomen, ende ic vercondige oock nieuwe dinghen, eer dat si opgaen, sal icse v doen hooren.

+ B

10

Singet den HERE een niew liet ⁺ zijn lof is vanden palen der aerden, ghi die neder daelt totter zee, ^* ende haer volheyt), die eylanden ende haer inwoonders.

+ psal. c.xlix.

* th. met haeren geheelen hoop

11

^* Si worden verheuen, die woestine ende haer steden, ende Cedar sal in die huysen woonen, Ghi woonders des steens louet, vanden hoofde der bergen sullen si roepen.)

* th. die woestine sal roepen met haere steden ende dorpen die in Kedar liggen die in steenen woonen sullen roepen ende die bergen verluyden

12

Si sullen den HEERE eere aendoen ende sinen lof vercondighen in die eylanden.

13

Die HEERE sal ghelijc een starke wtghaen, ghelijc een oorloochs man sal hi toornicheyt verwecken, Hi sal geluit gheuen, Hi sal ooc roepen, Hi sal ouer zijn vianden gesterct worden.

14

Ick heb ghesweghen, ic heb altoos stille gheweest, ⁺ ick heb lijdsaem gheweest, Ic sal spreken, gelijc een die in arbeyt van kinde is, ic sal verscheyden ende verslinden te samen.

+ C

15

Ic sal die hooge bergen ende hueuelen verwoesten, ende ic sal alle haer gras verdorren, Ende ic sal die stroomen tot eylanden maken, ende die staende wateren sal ic verdroogen.

16

☞ Ende ic sal die blinde, inden wech leyden, dien si niet en wisten, ende ic salse doen wandelen in paden, die si niet en wisten, Ic sal die duysternissen voor hen tot licht setten, ende die scheeue, int effene Die woorden dede ic hen, ende ic en hebse niet verlaten.

17

Die zijn achterwaerts geweken, si moeten bescaemt worden met bescaemtheit, die betrouwen in gegroefde afgoden, segghende den geghotene, Ghi zijt onse goden.

18

Dooue, hoort, ende ghi blinde, aensiet om te sien,

19

Wie is blindt, dan mijn knecht, Ende doof, dan tot wien ic mijn geboden hebbe gesonden? wie is blint, dan die ^* vercocht is?) ende wie is blint, dan die knecht des HEREN?

* theb. volcomene

20

Ghi die vele siet en suldijs niet verwaren? Ghi die open ooren [kolom] hebt en suldijt niet hooren?

21

⁺Ende die HEERE heeft wel gewilt, dat hi hem heiligen soude ende dat hi de wet groot soude maken ende verheffen,

+ D

22

Maer dat volc selue is gerooft ende vertreden, si zijn alle eenen stric der iongelingen, ende si zijn verborgen in die huysen der kerckers Si zijn gerooft geworden, ende daer en was niemant diese verloste, ^* tot eenen roof) ende daer en was gheen segghende, Gheeft weder.

* th. Si zijn verwoest

23

Wie is onder v, die dit sal hooren? die aenmercke ende hoore toecoemende dinghen.

24

Wie heeft Iacob tot een vertredinge gegeuen, ende Israel, den verwoesters? Ist niet die HEERE? Hi ist selue dien si hebben gesondicht, ende si en wilden in zijn wegen niet wandelen, ende si en hoorden niet zijn wet.

25

Ende hi storte wt ouer hen die hitte zijnder gramscappen, ende een stercke oorloge, ende hi verbrande hen rontsomme ende hi en wiste dat niet, ende hi aenstack hen tot brant, ende hi en ^* verstonts niet.)

* the. nams niet ter herten

§ Hoe hi dat gheloouich volck vri maect ende belouet, dat ghelooue op alle siden, Ende hi straft die heydenen van haeren afgoden, Ende van der Ioden verworpinge, om dat si niet en geloofden, den ghenen diet hen bootscapten van haeren offerhanden ende wieroock.