De Vorsterman Bijbel

§ Dat .xxij. Cap.

1

⁺DEn last des dals des ghesichts, Wat is v oock, ⁺ dat ghi al heel op die daken zijt gheclommen?

+ A

+ § Dal des ghesichts, dat is Ierusalem.

2

Vol roeps, ghestadelijck besette stadt, verhuegende stadt, uwe ghedoode en zijn niet ghedoodet metten swaerde, ende uwe verslaghen en zijn niet ghestoruen in die oorloghe.

3

Alle uwe hooftluyden zijn tsamen ^* gheulucht) si zijn hardelijc ghebonden, alle die ghebonden zijn, zijn ghebonden, si zijn te samen verre gheulucht.

* th. van boghen gheschut gheulucht.

4

Hierom seyde ick, Gaet wech van mi, Ick sal bitterlijck weenen, en wilt niet daer aen staen, om dat ghi mi troost, ⁺ ouer die verwoestinghe der dochtere mijns volcs.

+ B

5

Want den dach des dootslaechs, ende der vertredinghe, ende der beschreyinghen des HEEREN des Gods der heyrscharen in dat dal des ghesichts, ^* doorgrauende die mueren, ende groot van daden opten berch.)

* the. die die mueren ondergraeft ende tot den berge roepet.

6

Ende Elam heeft den pijlkokere ghenomen, ende den waghen des menschen die een ruyter te paerde is, ende den schilt sal den want bloot maken,

7

Ende uwe wtuercoren dalen sullen met waghenen veruult wesen, ende die reysigers sullen haer stoelen inder poorten setten.

8

Ende dat decsel van Iuda sal ontdect worden, ende ghi sult in dien daghe, die wapen camere des huys des wouts sien.

9

Ende ghi sult die schoeringen der stadt Dauids sien, want si vermenichfuldicht zijn, ende ghi hebt die wateren der onderster visscherijen vergadert.

10

Ende ghi hebt die huysen van Ierusalem getelt ende ghi hebt die huysen verdoruen, om die

[p. I8v]

mueren vast te maken.

11

Ende ghi hebt eenen cuyl ghemaect tusschen twee mueren, ende die wateren der ouder visscherijen, ende ghi en hebt niet opwaerts ghesien tot haeren maker ende haeren ^* wercmeester) en hebdy van verre niet ghesien.

* h. schepper

12

Ende die HEERE die God der heyrscharen sal in dien daghe roepen tot weeninghe ende schreyinghe, tot caluheyt, ende tot begordinghe des sacs.

13

Ende siet blijschap ende ghenoechte, die calueren te dooden ende rammen die kele af te steken, vlees te eten ende wijn te drincken, ☞ Laet ons eten ende drincken, want morghen sullen wi steruen,

14

ende die stemme des HEEREN der heyrscharen is gheopenbaert in minen ooren, Dese uwe onrechtuaerdicheyt en sal v niet vergheuen worden, tot ⁺ dat ghi sterft, seyt die HERE die God der heyrscharen.

+ C

15

Dit seyt die HERE die God der heyrscharen, ⁺ Gaet trect in tot dien ^* die woont inden Tabernacule) tot Sobna den prouoost des tempels,

+ i.Co. xv.d

* the. schatmeester.

16

ende ghi sult hem seggen.

Wat hebdy hier te doen? ende als wie sidy hier? dat ghi v hier een graf wt hebt ghehouwen? Ghi hebt v ghedenckenisse naerstelijck in die hoochte wtghehouwen, ende inden steen, een wooninghe voor v.

17

Siet die HEERE sal v ^* doen verdraghen, ghelijck een capoen wechghedraghen wort)

* the. wechworpen gelijck een sterck man eenen verworpt.

18

ende ghelijck een ommecleet sal hi v oplichten, Hi sal v croonende croonen met drucke, als eenen bal sal hi v worpen tot een ruymlant, ende wijt te wandelen, daer suldy steruen, ende daer sal zijn dien waghen uwer eeren, ende die oneere des huys des Heeren.

19

Ende ick sal v verdrijuen van uwer stacie, ende van uwen dienste sal ick v afsetten.

20

⁺Ende het sal in dien daghe zijn, ende ick sal roepen minen knecht Eliachim Helchie sone.

+ D

21

☞ Ende ick sal hem uwen rock aendoen, ende ick sal hem met uwen gordele stercken, ende ick sal v macht in zijn hant gheuen, ende hi sal den woonderen van Ierusalem, ende den huyse van Iuda tot eenen vader zijn.

22

Ende ick sal den sluetel des huys Dauids op zijn schouderen gheuen, ⁺ ☞ ende hi sal open doen, ende daer en sal gheen sluytende zijn, ende hi sal sluyten, ende daer en sal gheen opendoende zijn.

+ Iob. xij.c Apo. iij.c

23

Ende ick sal hem tot eenen ^* staeck) in een ghetrouwe plaetse vestighen, Ende hi sal tot eenen eerlijcken stoel zijns vaders huys zijn.

* th. naghel.

24

Ende ick sal ouer hem hanghen alle die eerlicheyt des huys zijns vaders, verscheyden manieren van vaten een cleyn vat vanden vaten der bekers ende tot allen den muysijck ^* vaten) toe.

* the. spelen

25

In dien daghe seyt die HERE der heyrscharen, sal wechghenomen worden den ^* staeck) [kolom] die gheuesticht was inder getrouwer stadt, ende sal ghebroken worden, ende sal vallen, ende die last die welcke daer op is, sal vergaen, Want die HEERE heuet ghesproken.

* th. naghel.

§ Dot woort Gods teghen Tyrum, dat op haer comen soude verwoestinghe, door Nabuchodonosor na tseuentich iaren, ende daer na weder vermaect soude worden.