De Vorsterman Bijbel

§ Dat .xvi. Capittel.

1

⁺HEERE seyndet wt dat lam, den heerschapper der aerden, vanden steen der [kolom] woestijnen totten berch der dochteren van Zion.

+ A

2

Ende Moab sal zijn als eenen vliedende voghel, ende als ionghe voghelkens wten neste vlieghende, also sullen si zijn, die dochteren van Moab inden doorganck van Arnon.

3

Aengaet den raet, vergadert den raet, settet uwe schaduwe als den nacht, int midden des daechs, verbercht den vooruluchtighen, en melt den dwalende niet.

4

Mijn vooruluchtighe sullen bi v woonen, Moab zijt ghi zijn ^* verberginghe) vanden aensichte des verwoestendes, want ^* dat stof is gheeyndet, die katijuighe is verteert) ende hi is ontbroken die die aerde vertredet.

* the. schuylhoeck.

* th. dan sal die scheynder aflaten, die verderuer sal ophouden.

5

Ende een conincklijcke stoel, sal bereyt worden in barmherticheden, ende hi sal daer op sitten inder waerheyt, in Dauids tabernacule oordeelende ende soeckende oordeel, ende haestelijck loonende dat rechtuaerdich is.

6

⁺Wi hebben ghehoort die houaerdicheyt van Moab, ⁺ hi is zeer houaerdich, zijn houaerdicheyt ende zijn beroeminghe, ende zijn veronwaerdinghe is meerder dan zijn stercheyt.

+ B

+ Ier. xviij.c

7

Daerom sal Moab ^* tot) Moab huylen, hi sal altemael huylen, Segghet den ghenen die haer plaghen, die hen verblijden ^* op die mueren van ghebacken steenen.)

* the. teghen

* th. den fundament vesten der stadt Kirheres

8

Want die voorstadt van Hesebon is verwoest, ende die wijngaert van Sabama, hebben die der Heydenen afghehouwen, haer gheesselen zijn tot Gazer toe ghecomen, si dwaelden in die woestijne, zijn rancken zijn ghelaten, si zijn door die zee ghegaen.

9

Daeromme sal ick ^* met weeninghe) beschreyen Gazer den wijngaert Sabama, ⁺ Ick sal v ^* droncken maken) met minen tranen,

⁺ Hesebon ende Eleale, want die stemme der tredender is ingheuallen, ouer ws wijngaerts snijdinghe, ende ouer uwen oogst.

* h. droeuich

+ Ie. xlviij.c

* the. netten

+ C

10

☞ Ende die blijschap sal wechghenomen worden, ende die verhueghinghe vanden Carmele In die wijngaerden en sal hi niet verblijden, noch hi en sal niet ontsprekelijck vrolijck singhen, Die te treden plach en sal in die wijnpersse niet treden, ick hebbe der tredender stemme wechghenomen.

11

☞ Hierom sal minen buyck tot Moab luyden, ⁺ ghelijck een harpe ende mijn inghewant tot ^* den mueren van ghebacken steenen.)

+ D

* th. Kirheres.

12

Ende het sal zijn, alst openbaer wesen sal, dat Moab ghearbeyt heeft op zijn hoochten, so sal hi ingaen tot zijn heylige plaetse, dat hi bidde, ende hi en sal des niet vermogen.

13

Dit is dwoort dwelc die HERE gesproken heeft, tot Moab van dien tijt aen.

14

Ende nv heeft die HERE ghesproken, seggende, In drie iaren ghelijck iaren eens huer-

[p. I7r]

lings sal die glorie van Moab wechghenomen worden van zeer veel volcs, ende in hem sal ghelaten worden een cleyn ^* wijndruyue ende luttel,) ende in gheender manieren vele.

* th. luttelken

§ Van den last ouer Damasco. Hoe God hem teghen Iacob ende Israel vertornt, om dat si haers salichmakers vergheten hadden ende teghen die dat volck Gods veruolchden.