De Vorsterman Bijbel

§ Dat .xiij. Capittel.

1

⁺DEn last van Babylonien, den welcken ghesien heeft Esaias Amos sone.

+ A

2

Verheft ^* dat teeken opten donckeren neuelachtighen berch) ende verheft die stemme, heft op die hant, ende laet ingaen door die poorten die vorsten.

* th. die baniere op eenen hoogen berch.

3

Ick heb gheboden minen gheheylichden, ick heb mijn stercke oock gheroepen tot mijnder gramschap, die hen verhueghen in mijn eere.

4

Die stemme der menichten is op die berghen ghelijck van veel volcs, ende die stemme des gheluyts der coninghen ende der vergaderder heydenen, die HERE der heyrscaren heuet gheboden den ruyterschap des oorloochs,

5

den ghenen die comen van verren landen ^* vanden hoochten) des hemels die HERE ende die vaten zijnder verbolghen gramschappe om te verstroeyen alle lant.

* the. eynde.

6

Huylt, want des HEEREN dach is nae bi, hi sal comen ghelijck ^* een woestheyt vanden HEERE.)

* h. verwoestinge vanden almachtighen.

7

Daerom sullen alle handen ontbonden worden, ende alle herte des mans sal verdwijnen, ende in stucken ghewreuen worden.

8

⁺Ende si sullen steecten ende smerten houden, si sullen pijne gheuoelen, ghelijck [kolom] een vrouwe die in arbeyt van kinde is, ⁺ een yeghelijck sal teghen sinen naesten verwonderen, haer aensichte ^* is een verbernt aensichte.)

+ B

+ Naum. ij.c

* theb. wort root als een vyer

9

Siet den dach des HEEREN sal comen, wreet, ende vol veronwaerdinghe, ☞ ende gramschaps ende toornicheyts, om die aerde tot woestheyt te setten, ende die sondaers daer wt te vernielen. ⁺

+ eze. xxxij.d

10

Want die sterren des hemels ende haer schijnsel en sullen haer licht niet wtstrecken, Die Sonne is verduystert in haeren opganck, ende die Mane en sal in haer licht niet blincken.

11

Ende ick sal die boosheyt der werelt besoecken, ende tegen die ongodlijcke haer onrechtuaerdicheyt, Ende ick sal die hoouaerdije der ongheloouigher doen rusten, ende ic sal de vermetentheyt der stercken vernederen.

12

⁺Een man sal costelijcker wesen dan gout, ende een mensche dan ^* fijn ghesuyuert gout.)

+ C

* h. gout van Ophir.

13

Daerom sal ick den hemel beroeren, ende die aerde sal beweecht worden van haerder plaetsen in die veronwaerdicheyt des HEREN der heyrscharen, ende om den daghe der gramscappen zijnder toornicheyt.

14

Ende tsal zijn ghelijck een gheiaechte vlieende dasken, ende ghelijck een ^* schaep, ende daer en sal gheen vergaderende zijn,) een yeghelijck sal tot sinen volcke keeren, ende een yeghelijck sal tot zijn lant vlieden.

* the. cudde die niemant tsamen en drijft.

15

Alle die gheuonden wort, sal dootgheslaghen worden, ende alle die ^* ouercomen sal,) sal int swaert vallen.

* th. ghegrepen wort.

16

Ende haer kinderen sullen gheslaghen worden teghen die aerde voor haeren ooghen, ⁺ si sullen haer huysen roouen, ende haer huysvrouwen sullen ghescheynt worden.

+ D

17

Siet ick verwecke ouer hen die Meden die dat siluer niet soecken en sullen, ende tgout niet willen en sullen,

18

maer si sullen die cleyne kinderkens met ^* pijlen) dooden, ende si en sullen der kinderen, ^* die die borste suyghen) niet ontfermen, ende haer ooghe en sal ouer die kinderen niet sparen.

* th. boghen

* the. inder moeder buyck.

19

☞ Ende Babylonien die gloriose stadt edel in den Conincrijcken groot, die grootdadicheyt der houaerdicheyt der Chaldeen, ⁺ sal omghekeert zijn, ghelijck die HEERE Sodoma ende Gomorra ommekeerde.

+ Genesis. xix.c

20

Sie en sal niet bewoont worden tot inden eynde, ende en sal niet ghefundeert worden van gheslachte tot gheslachte, Noch die Arabier en dal daer gheen tenten slaen, noch die herders en sullen daer niet rusten, Maer die ^* beesten) sullen daer rusten,

* the. meercatten.

21

ende haer huysen sullen veruult worden met ^* draken, ende die struycen) sullen daer woonen, ende die wilde bocken sullen daer springhen.

* th. simmen ende ionghe struycen.

22

Ende in haer huysen sullen die ^* wlen malcan-

* th. slangen

[p. I6r]

deren) ^* antwoorden, die mereminnen inden tempelen der wellusten.)

* th. singhen ende die draken in haer lusttimmeringhen.

§ Hoe die verlossinghe des volcs van Israel voorseyt wort Ende een ghelijckenisse teghen den Coninck van Babylonien, ende van sinen snellen val.