De Vorsterman Bijbel

§ Dat .iiij. Cap.

1

⁺ENde seuen vrouwen sullen eenen man aengrijpen, segghende, in die daghe, wi sullen onse broot eten, ende wi sullen met onse cleederen ouerdect worden, Laet alleen uwen ⁺ naem ouer ons aenroepen, neemt onse lachter wech.

+ A

+ § naem ouer ons, dat is, laet ons, maer uwe vrouwen ghenaemt worden.

2

In dien daghe sal een spruyte des HEEREN in groote moghentheyt ende heercliheyt zijn, ende die vrucht der aerden sal hooch zijn, ende opspringhen van vrolicheden den ghenen die behouden zijn sullen van Israel.

3

Ende het sal zijn alle die ouerbleuen sal zijn in Zion, ende die ouerbleuen sal zijn in Ierusalem, sal heylich gheheeten worden, alle die gheschreuen is ^* inden leuen in) Ierusalem.

* the. onder die leuende te.

4

Als die HEERE die vuylheyt der dochteren van Zion afghewasschen sal hebben, ⁺ ende dat hi dat bloet van Ierusalem gesuyuert sal hebben, wten middele, metten gheest des oordeels, ende metten ^* gheest der hitten.)

+ B

* h. brandenden gheest.

[p. I2v]

5

Ende die HEERE sal scheppen, ouer die gheheele plaetse des berghes van Zion ende daer hi aengheroepen is, een wolcke des daechs ende roock, ende dat gheblincke des vlammende vyers des nachts, ^* Want ouer alle glorie is bescherminghe.)

* th. want alle heerlicheyt sal bebedect worden.

6

Ende een Tabernacule sal tot een schaduwe zijn, des daechs vander hitten, ende tot een toevluchte, ende tot een verberghinghe vanden storm ende vanden reghen.

§ Van Christo ende van sinen wijngaert, ende zijns wijngaerts verworpinghe wort hier voorseyt, om die menigherhande sonden wille. Ende die dronckenschap metter welluste wort hier verdoemt.