De Vorsterman Bijbel

§ Dat .iij. Cap.

1

⁺WAnt siet, die heerschapper die HEERE der heyrscharen sal wechnemen van Ierusalem ende van Iuda den ^* stercken, ende den machtighen, alle stercte) des broots, ende alle stercte des waters,

+ A

* th. ophouder ende die ophoudersse, alle ophoudinge.

2

die stercke ende strijtbaer mannen, den rechter ende den Propheet, den waerseggher, ende den ouden,

3

den prince ouer vijftich mannen, ende den eerlijken van aensichte, ende den raetsman, ende den wijsen vanden constelijken wercmeesteren ende den voorsienighen om gheestelijke dinghen wijslijck te spreken.

4

Ende ick sal hen kinderen tot princen gheuen ^* ende verwijfde mannen) sullen heerschappie ouer hen hebben.

* th. kinderen

5

Ende dat volck sal ^* te samen vallen, die man totten man, ende een yeghelijck tot) sinen naesten, Ende dat kint sal eenen oploop tegen den ouden opsetten, ende die onedele teghen den edelen.

* the. beswaret worden die een vanden anderen, ende een yegelijck van

6

⁺Want een man sal sinen broeder zijns vaders huysghesinne grijpen, ende segghen, Ghi hebt een cleet, zijt onse vorst? want desen val is onder uwe hant.

+ B

7

Ende hi sal in dien daghe ^* antwoorden,) ende segghen, Ick en ben gheen medecijn meester, ende in mijn huys en is gheen broot, noch cleet, en wilt mi niet stellen tot eenen prince des volcs.

* th. sweren.

8

Want Ierusalem is gheuallen, ende Iuda is mede gheuallen, want haer tonghe ende haer nyeuwe vonden zijn teghen den HEERE, om dat si die ooghen zijnder moghentheyt souden verwecken tot gramschappen.

9

^* Die bekennisse haers aensichts sal haer antwoorden) ende si vercondichden haer sonden, ghelijck Sodoma, noch si en verborghens niet. Maer wee haer zielen, want hen zijn quade dinghen wederghegheuen.

* th. Dat also is, sietmen wel aen haer aengesicht

10

Segt den rechtuaerdighen, dat hem sal wel zijn, want hi sal eten die vruchten zijnder vonden.

11

Wee den ongodlijcken int quade, want hem sal wedergheuinghe zijnder handen gheschieden.

12

^* Mijn volck is berooft van zijn verschatters) ende vrouwen hebben heerschappie daer ouer ghehadt. Mijn volck die v segghen, ☞ dat ghi salich zijt, die bedrieghen v, ende verderuende verstooren si den wech uwer ghanghen.

* the. Mijns volcs drijuers zijn kinders.

13

Die HEERE sal ten oordeel comen, ende hi staet om te oordeelen dat volck.

14

⁺Die HEERE sal ten oordeel comen metten ouders zijns volcs, ende met sinen princen, ⁺ Want ghi hebt minen wijngaert afgeweyt, ende den roof des armen is in uwen huyse. [kolom]

+ C

+ Luc. xxi.f.

15

Waerom wrijft ghi mijn volck in stucken, ende die aensichten der armen maeldy te samen? seyt die HEERE die God der heyrscharen.

16

Ende die HEERE die God seyt, Om dat die dochteren van Zion verheuen zijn, ende hebben met wtghestrecten halse ghewandelt, ende met den wencken der ooghen ghegaen, ende sloeghen die handen om hooch van blijschappen, ende wandelden ende ghinghen voort met haeren voeten, met eenen sonderlinghen ghemaecten ghanck.

17

Die HEERE sal den toppe vanden hoofde der dochteren van Zion ^* caluwe) maken, ende die HEERE sal haer ^* hayr) ontdecken.

* th. grillich

* h. schamelheyt.

18

⁺In dien daghe sal die HEERE wechdoen die cyeringhen der schoenen, ende die maenkens

+ D

19

ende halsbanden ende spansels voor die borste, ende armringhen ende mytren,

20

ende vlechten des hayrs, Die armcyeringhen die achter neder hanghen, ende die gulden ketenen als prixkens ende riekerkens, en die ooringhen,

21

en vingerringen, ende die edele gesteente aen tvoorhooft hangende,

22

ende die behaechlike feestelike cleederen, ende mantelkens ende lijnen doecken, ende naelden

23

ende spiegelen, ende blinckende lijnen cleederen, ende die huyuen ende ransche kerspen kelen

24

Ende daer sal voor goeden rueck, stanck zijn, ende voor den gordele een coordeken, ende voor dat crollende hayr caluheyt, ende voor den borstlap een ^* hayren cleet.)

* th. sack ende sullen swart worden voor die schoonte.

25

Ende uwe alder schoonste mannen sullen metten swaerde vallen, ende uwe stercke mannen inden strijt.

26

Ende haer poorten sullen truerich zijn ende screyen ende si sal onghetroost ter aerden sitten.

§ Van die seuen ghemeynten. Van eens menschen grootheyt. Van die gheestelijcke afwasschinghe. Ende van die bescherminghe der ghemeynten.